Read Nepali New Revised Version, 2012 विलाप 5 Bible Online

विलाप 5 - Nepali New Revised Version, 2012 bible

विलाप 5

¹हे परमप्रभु, हामीमाथि के भएको हो, स्‍मरण गर्नुहोस्‌। हाम्रो अपमान हेर्नुहोस्‌।

²हाम्रा पैतृक-धन पराईहरूका भए, हाम्रा घर विदेशीहरूका भए।

³हामी टुहुरा-टुहुरी र पितृहीन भएका छौं, हाम्रा आमाहरू विधवाजस्‍ता भएका छन्‌।

⁴हामीले आफ्‍नै पानी पनि किनेर खानुपर्छ, आफ्‍नै दाउरा पनि किनेर लिनुपर्छ।

⁵हामीलाई खेद्‌नेहरू हाम्रा पाइलामै छन्, हामी थकित छौं, अनि विश्राम छैन।

⁶आवश्‍यक रोटीको निम्‍ति हामीले आफैलाई मिश्र र अश्‍शूरमा सुम्‍पिदियौं।

⁷हाम्रा पिता-पुर्खाहरूले पाप गरे, र अब उनीहरू छैनन्, अनि हामी उनीहरूका अधर्मको फल भोग्‍दछौं।

⁸कमाराहरू हामीमाथि शासन गर्छन्, हामीलाई तिनीहरूका हातबाट छुटाउने कोही पनि छैन।

⁹उजाड़-स्‍थानमा भएको तरवारले गर्दा हामीले आफ्‍ना प्राणलाई खतरामा राखेर पनि रोटी ल्‍याउनुपर्छ।

¹⁰भोकले गर्दा हाम्रो छाला चुलोझैँ तातिएको छ।

¹¹सियोनमा स्‍त्रीहरू, र यहूदाका सहरहरूमा कन्‍ये-केटीहरू भ्रष्‍ट पारिएका छन्‌।

¹²शासकहरू आ-आफ्‍ना हातबाट झुण्‍ड्याइएका छन्, धर्म-गुरुहरूलाई केही सम्‍मान देखाइएको छैन।

¹³जवान मानिसहरूले परिश्रमसाथ जाँतो पिँध्‍नुपर्दछ, ठिटाहरू दाउराको भारीले थिचिएर लड़बड़ाउँदै हिँड्‌छन्‌।

¹⁴बूढ़ाहरू सहरका मूल ढोकामा जम्‍मा हुन छोड़ेका छन्, जवान मानिसहरूले सङ्गीत छोड़िदिएका छन्‌।

¹⁵हाम्रा मनबाट आनन्‍द हटेको छ, हाम्रो नाच शोकमा परिवर्तन भएको छ।

¹⁶हाम्रो शिरबाट मुकुट खसेको छ। हामीलाई धिक्‍कार, किनभने हामीले पाप गरेका छौं।

¹⁷यसैकारण हाम्रो हृदय निर्बल भएको छ, यिनै कामको कारण हाम्रा आँखा धमिलिएका छन्‌।

¹⁸सियोन पर्वत उजाड़ भएको छ, स्‍यालहरू त्‍यसमा घुमिहिँड्‌छन्‌।

¹⁹हे परमप्रभु, तपाईं सदासर्वदै शासन गर्नुहुन्‍छ। तपाईंको सिंहासन पुस्‍तौँसम्‍म रहिरहन्‍छ।

²⁰तपाईंले किन हामीलाई सधैँ भुल्‍नुहुन्‍छ? तपाईंले किन यति धेरै समयसम्‍म हामीलाई त्‍याग्‍नुहुन्‍छ?

²¹हे परमप्रभु, हामीलाई आफूतिर फर्काउनुहोस्, र हामी फर्किऔं। हाम्रा दिन तादिका दिनझैँ बनाइदिनुहोस्,

²²यदि तपाईंले हामीलाई बिलकुलै इन्‍कार गर्नुभएको छैन र सम्‍झन नसक्‍ने गरी रिसाउनुभएको छैन भने!