Read Nepali New Revised Version, 2012 इजकिएल 12 Bible Online

इजकिएल 12 - Nepali New Revised Version, 2012 bible

इजकिएल 12

¹परमप्रभुको यो वचन मकहाँ आयो:

²“हे मानिसको छोरो, तँ एउटा बागी घरानाको बीचमा बस्‍दैछस्, जसका हेर्ने आँखा त छन्‌ तर देख्‍दैनन्, जसका सुन्‍ने कान त छन्‌ तर सुन्‍दैनन्‌। किनभने तिनीहरू बागी मानिसहरू हुन्‌।”

³“यसकारण हे मानिसको छोरो, निर्वासित भएको व्‍यक्तिझैँ तेरो झिटीमिटी पोको पार्, र दिउँसै तिनीहरूका आँखाकै सामुन्‍ने तँ बसेको ठाउँबाट अर्को ठाउँमा गइहाल्‌। तिनीहरू बागी घराना भए तापनि शायद तिनीहरूले बुझ्‍लान्‌।

⁴निर्वासनको लागि तेरो झिटीमिटी लिएर दिउँसै तिनीहरूका आँखाकै सामुन्‍ने तेरो झिटीमिटी बाँध्‌, र तिनीहरूका आँखाकै सामुन्‍ने बेलुकी निर्वासनमा जानेजस्‍तै गरी जा।

⁵तिनीहरूले देख्‍ने गरी पर्खालमा प्‍वाल पार्, र तेरो झिटीमिटी त्‍यतैबाट निकाल्‌।

⁶तिनीहरूले हेरिरहँदा तैंले आफ्‍नो सामान काँधमा उठा, र साँझ पर्दा बोकेर लैजा। तैंले आफ्‍नो मुख छोप्‌, र यसरी भूइँ देख्‍न नपाएस्‌। किनभने इस्राएलका घरानाको निम्‍ति मैले तँलाई एउटा चिन्‍ह बनाएको छु।

⁷यसैले मलाई आज्ञा गरेबमोजिम मैले गरें। निर्वासनको लागि मैले मेरो झिटीमिटी दिउँसो बाहिर पोको पारेर निकालें। अनि बेलुका आफ्‍नै हातले पर्खालमा प्‍वाल पारें, र साँझमा तिनीहरूले हेर्दाहेर्दै मैले मेरो झिटीमिटी काँधमा बोकेर गइहालें।

⁸बिहान परमप्रभुको यो वचन मकहाँ आयो:

⁹“हे मानिसको छोरो, के इस्राएलको त्‍यो बागी घरानाले यसो भनेर तँलाई सोधेन, ‘तिमी के गर्दैछौ?’

¹⁰तिनीहरूलाई भन्, ‘परमप्रभु परमेश्‍वर यसो भन्‍नुहुन्‍छ। “यो ईश्‍वरवाणी यरूशलेममा भएका राजकुमार र सारा इस्राएलका घरानाको विषयमा हो’।

¹¹तिनीहरूलाई भन्, ‘म तिमीहरूका निम्‍ति एउटा चिन्‍ह हुँ’। “मैले जसो गरेको छु, त्‍यसरी नै तिनीहरूलाई गरिनेछ। तिनीहरू देशबाट कैदीहरूजस्‍तै निर्वासित हुनेछन्‌।

¹²“तिनीहरूका बीचमा हुने राजकुमारले साँझमा आफ्‍नो काँधमा सामान बोकेर लैजानेछ, र पर्खाल फोरेर बाहिर जानलाई त्‍यसको निम्‍ति एउटा प्‍वाल बनाउनेछ, र आफ्‍नो आँखाले भूइँ देख्‍नु नपरोस्‌ भनेर त्‍यसले आफ्‍नो मुख छोप्‍नेछ।

¹³म आफ्‍नो जाल त्‍यसमाथि फिँजाउनेछु, र त्‍यो मेरो पासोमा पर्नेछ। म त्‍यसलाई कल्‍दीहरूको देश बेबिलोनियामा ल्‍याउनेछु, तर त्‍यसले त्‍यो देख्‍नेछैन, र त्‍यो त्‍यहीँ मर्नेछ।

¹⁴त्‍यसका चारैतिर हुने त्‍यसका कर्मचारीहरू र त्‍यसका फौजलाई म हावामा तितरबितर पार्नेछु, र तरवार थुतेर तिनीहरूलाई खेद्‌नेछु।

¹⁵“जब जाति-जातिहरूका बीचमा म तिनीहरूलाई यत्रतत्र पार्नेछु र देश-देशमा तितरबितर पार्नेछु, तब म नै परमप्रभु हुँ भनी तिनीहरूले जान्‍नेछन्‌।

¹⁶तर म तिनीहरूमध्‍येका थोरैलाई तरवार, अनिकाल र रूढ़ीबाट छोड़िदिनेछु, ताकि जहाँ तिनीहरू जानेछन्, त्‍यहाँका जाति-जातिहरूका बीचमा आफ्‍ना घिनलाग्‍दा व्‍यवहारहरू तिनीहरूले स्‍वीकार गरून्‌। तब म नै परमप्रभु हुँ भनी तिनीहरूले जान्‍नेछन्‌।”

¹⁷फेरि परमप्रभुको यो वचन मकहाँ आयो:

¹⁸“हे मानिसको छोरो, तैंले आफ्‍नो भोजन खाँदा काम्‌, र आफ्‍नो पानी पिउँदा डरले थरथरा।

¹⁹देशका मानिसहरूलाई भन्‌: ‘यरूशलेम र इस्राएलको देशमा बस्‍नेहरूका बारे परमप्रभु परमेश्‍वर यसो भन्‍नुहुन्‍छ: तिनीहरूले आफ्‍नो भोजन डर मानेर खानेछन्, र नैराश्‍यमा तिनीहरूले आफ्‍नो पानी पिउनेछन्, किनकि त्‍यहाँ बस्‍नेहरूका उपद्रवको कारणले त्‍यसमा भएका सबै कुराहरूसमेत तिनीहरूको देश उजाड़ पारिनेछ।

²⁰मानिसहरू बसेका नगरहरू भत्‍काइनेछन्, र देश नष्‍ट हुनेछ। तब म नै परमप्रभु हुँ भन्‍ने तिमीहरूले जान्‍नेछौ’।”

²¹फेरि परमप्रभुको यो वचन मकहाँ आयो:

²²“हे मानिसको छोरो, ‘दिन बित्‍दैजान्‍छ, र पनि दर्शन भने कुनै पूरा हुँदैन’ भन्‍ने तिमीहरूको देश इस्राएलमा चल्‍दैआएको यो उखान के हो?

²³यसकारण तिनीहरूलाई भन्, ‘परमप्रभु परमेश्‍वर यसो भन्‍नुहुन्‍छ: म यस उखानको अन्‍त गरिदिनेछु, र तिनीहरूले इस्राएलमा फेरि कहिल्‍यै यो उखान प्रयोग गर्नेछैनन्‌।’ तिनीहरूलाई भन्, ‘दिनहरू नजिकै छन्, जब हरेक दर्शन पूरा हुनेछ।

²⁴किनकि अब फेरि कहिल्‍यै इस्राएलका मानिसहरूका बीचमा झूटा दर्शन र जोखना हेर्ने हुनेछैनन्‌।

²⁵तर मैले भन्‍ने कुरा म, परमप्रभु आफैले नै भन्‍नेछु, र त्‍यो ढिलो नभई पूरा हुनेछ। किनकि हे बागी घराना, तिमीहरूका दिनमा नै मैले भनेको कुरा म पूरा गर्नेछु, परमप्रभु परमेश्‍वर भन्‍नुहुन्‍छ’।”

²⁶तब परमप्रभुको यो वचन मकहाँ आयो:

²⁷“हे मानिसको छोरो, इस्राएलका घराना यसो भन्‍दैछ, ‘त्‍यसले देखेको दर्शन धेरै वर्षपछि मात्र पूरा हुनेछ, र त्‍यसले धेरै समयपछिका कुराहरूको अगमवचन कहन्‍छ।”

²⁸“यसैकारण तिनीहरूलाई भन्, ‘परमप्रभु परमेश्‍वर यसो भन्‍नुहुन्‍छ: मैले भनेको एउटै कुरा पनि अब ढिलो हुनेछैन, तर जे कुरा म भन्‍दछु, सो पूरा हुने नै छ, परमप्रभु परमेश्‍वर भन्‍नुहुन्‍छ।