Read Nepali New Revised Version, 2012 इजकिएल 13 Bible Online

इजकिएल 13 - Nepali New Revised Version, 2012 bible

इजकिएल 13

¹परमप्रभुको यो वचन मकहाँ आयो:

²“हे मानिसको छोरो, अहिले अगमवाणी कहिरहने इस्राएलका अगमवक्ताहरूका विरुद्धमा अगमवाणी भन्‌। आफ्‍नै कल्‍पनाको अगमवाणी कहनेहरूलाई भन्, ‘परमप्रभुको वचन सुन!

³परमप्रभु परमेश्‍वर यसो भन्‍नुहुन्‍छ: मूर्ख अगमवक्ताहरूलाई धिक्‍कार, जो केही दर्शन नदेखेर पनि आफ्‍ना आत्‍माको कुराको पछि लाग्‍छन्‌।

⁴हे इस्राएल, तिमीहरूका अगमवक्ताहरू त भग्‍नावशेषहरूमा बस्‍ने स्‍यालहरूजस्‍ता छन्‌।

⁵परमप्रभुको दिनमा युद्धमा त्‍यो स्‍थिर रहोस्‌ भनी तिमीहरू इस्राएलका घरानाको निम्‍ति पर्खालका चर्केका ठाउँहरू मरम्‍मत गर्न पनि तिमीहरू गएनौ।

⁶तिनीहरूका दर्शन असत्‍य छन्‌ र तिनीहरूका जोखना झूटा हुन्‌। तिनीहरू भन्‍छन्, “परमप्रभु भन्‍नुहुन्‍छ,” तर परमप्रभुले तिनीहरूलाई पठाउनुभएकै होइन। तापनि तिनीहरूको वचन पूरा गरिओस्‌ भनी तिनीहरू आशा गर्दछन्‌।

⁷मैले नभने तापनि जब तिमीहरू “परमप्रभु भन्‍नुहुन्‍छ” भनी भन्‍दछौ, तब के तिमीहरूले असत्‍य दर्शन देखेका र झूटा जोखना हेरेका होइनौ र?

⁸“‘यसैकारण परमप्रभु परमेश्‍वर यसो भन्‍नुहुन्‍छ: तिमीहरूले झूटा कुरा गरेका र असत्‍य दर्शनहरू देखेका हुनाले म तिमीहरूका विरुद्धमा छु, परमप्रभु परमेश्‍वर भन्‍नुहुन्‍छ।

⁹मेरो हात ती अगमवक्ताहरूका विरुद्धमा हुनेछ, जसले असत्‍य दर्शनहरू देख्‍छन्‌ र झूटा जोखनाहरू कहन्‍छन्‌। तिनीहरू मेरो प्रजाको सभामा हुनेछैनन्, अथवा तिनीहरूका नाउँ इस्राएलका घरानाको सूचीमा लेखिनेछैनन्, न त तिनीहरू इस्राएलको देशमा पस्‍न पाउनेछन्‌। तब परमप्रभु परमेश्‍वर म नै हुँ भनी तिमीहरूले जान्‍नेछौ।

¹⁰“‘शान्‍ति नहुँदा पनि “शान्‍ति” भनी तिनीहरूले मेरो प्रजालाई बरालेका छन्, र जब मानिसहरूले कच्‍चा पर्खाल बनाउँछन्‌ तब यिनीहरूले त्‍यसमा चून लाएर त्‍यो ढाक्‍छन्‌।

¹¹यसैकारण ती चून लगाउनेहरूलाई भन्, “घनघोर वृष्‍टि हुनेछ र ठूला-ठूला असिना बर्सनेछन्‌ र आँधीबेहरी म पठाउनेछु।”

¹²जब त्‍यो पर्खाल ढल्‍नेछ, तब के मानिसहरूले तिमीहरूलाई यसो भनेर सोध्‍नेछैनन्, “तिमीहरूले पोतेको चून कहाँ गयो?”

¹³“‘यसैकारण परमप्रभु परमेश्‍वर यसो भन्‍नुहुन्‍छ: म मेरो क्रोधमा एउटा डरलाग्‍दो आँधीबेहरी चलाउनेछु, र मेरो रीसमा असिना र नाशकारी पानीको बाढ़ी आउनेछन्, जसले त्‍यो पर्खाल भत्‍काउनेछ।

¹⁴अनि तिमीहरूले चून पोतेको पर्खाल त्‍यसको जग देख्‍ने गरी भत्‍काएर म त्‍यसलाई भूइँसम्‍मै समतल गरी त्‍यो ढालिदिनेछु। त्‍यो भत्‍काउँदा तिमीहरू पनि त्‍यसको साथमा नष्‍ट हुनेछौ, र परमप्रभु म नै हुँ भनी तिमीहरूले जान्‍नेछौ।

¹⁵यसरी म मेरो क्रोध त्‍यस पर्खालको विरुद्धमा र त्‍यो चूनले पोत्‍नेहरूका विरुद्धमा खन्‍याउनेछु। म तिमीहरूलाई भन्‍नेछु, “त्‍यो पर्खाल अब छैन, त्‍यसलाई चूनले पोत्‍नेहरू पनि छैनन्,

¹⁶इस्राएलका यी अगमवक्ताहरू, जसले यरूशलेमको विषयमा अगमवाणी कहे, र त्‍यहाँ शान्‍ति नहुँदा पनि त्‍यसको निम्‍ति शान्‍तिको दर्शन देखे, परमप्रभु परमेश्‍वर भन्‍नुहुन्‍छ’।”

¹⁷“अब हे मानिसको छोरो, इस्राएलका छोरीहरू, जसले आफ्‍नै कल्‍पनाको अगमवाणी कहन्‍छन्, तिनीहरूतिर तेरो मुख फर्का। तिनीहरूका विरुद्धमा अगमवाणी गर,

¹⁸र भन्, ‘परमप्रभु परमेश्‍वर यसो भन्‍नुहुन्‍छ: धिक्‍कार ती स्‍त्रीहरू, जसले आफ्‍ना नाड़ीहरूमा बूटी बाँधिदिन्‍छन्‌ र मानिसहरूको प्राण पासोमा पार्न तिनीहरूका कदअनुसार शिर ढाक्‍ने घुम्‍टा बनाउँछन्‌। के तिमीहरू मानिसहरूको प्राण पासोमा पार्ने र आफ्‍नो प्राणलाई चाहिँ बचाइराख्‍ने र?

¹⁹दुई-चार मुट्ठी जौ र रोटीका केही टुक्राहरूका निम्‍ति मेरो प्रजाको बीचमा तिमीहरूले मलाई बिटुलो पार्‍यौ। र झूटा कुरा सुन्‍ने मेरो प्रजालाई झूट बोलेर मर्नु नपर्ने मानिसहरूलाई तिमीहरूले मार्‍यौ, र बाँच्‍नु नपर्नेहरूलाई चाहिँ तिमीहरूले बचाइराख्‍यौ।

²⁰“‘यसकारण परमप्रभु परमेश्‍वर यसो भन्‍नुहुन्‍छ: म तिमीहरूका जादूका बूटीहरूका विरुद्धमा छु, जसद्वारा तिमीहरू मानिसहरूलाई चरालाई झैँ पासोमा पार्छौ। म तिमीहरूका हातदेखि ती खोस्‍नेछु। तिमीहरूले चरालाई झैँ पासोमा पारेका मानिसहरूलाई म छुटकारा दिनेछु।

²¹म तिमीहरूका घुम्‍टा पनि निकालिदिनेछु, र मेरो प्रजालाई तिमीहरूका हातदेखि छुटाउनेछु। तिनीहरू फेरि कहिल्‍यै तिमीहरूका हातमा शिकार हुनेछैनन्‌। तब तिमीहरूले म नै परमप्रभु हुँ भनी जान्‍नेछौ।

²²तिमीहरूले झूट बोलेर धर्मीहरूलाई निराश तुल्‍यायौ, जसलाई मैले शोकित तुल्‍याइनँ, र आफ्‍नो चाल त्‍यागी दुष्‍टले आफ्‍नो प्राण बचाउला कि भनेर तिमीहरूले दुष्‍टलाई आफ्‍नो खराब चाल नत्‍याग्‍नलाई उत्‍साह दियौ।

²³यसैकारण तिमीहरूले अब फेरि कहिल्‍यै असत्‍य दर्शन देख्‍नेछैनौ अथवा जोखना हेर्नेछैनौ। म मेरो प्रजालाई तिमीहरूका हातदेखि बचाउनेछु। तब म नै परमप्रभु हुँ भनी तिमीहरूले जान्‍नेछौ’।”