Read Nepali New Revised Version, 2012 इजकिएल 18 Bible Online

इजकिएल 18 - Nepali New Revised Version, 2012 bible

इजकिएल 18

¹परमप्रभुको यो वचन मकहाँ आयो:

²“इस्राएलका देशको विषयमा भनेको यो उखान दोहोर्‍याएको अर्थ के हो: “‘अमिलो अङ्‌गूर खाने बुबा अनि दाँत कुँड़िनेचाहिँ छोराछोरी’?”

³“‘जस्‍तो म जीवित छु, परमप्रभु परमेश्‍वर भन्‍नुहुन्‍छ, तिमीहरू इस्राएलमा कहिल्‍यै यो उखान कहनेछैनौ।

⁴किनकि हरेक जीवित प्राण मेरै हो— बुबा र छोरा दुवै एकैजस्‍तै मेरा हुन्‌। जुन प्राणले पाप गर्छ, त्‍यही मर्छ।

⁵“मानौं, एक जना मानिस धर्मी छ, जो न्‍यायसङ्गत र ठीक काम गर्छ।

⁶त्‍यसले डाँड़ाका देवता-थानमा खाँदैन, अथवा इस्राएलका घरानाका मूर्तिहरूतिर हेर्दैन। त्‍यसले आफ्‍नो छिमेकीकी पत्‍नीलाई अपवित्र पार्दैन, अथवा रजस्‍वलाको समयमा कुनै स्‍त्रीसँग सुत्‍दैन।

⁷त्‍यसले कसैलाई थिचोमिचो गर्दैन, तर कर्जाको बन्‍धक फर्काइदिन्‍छ। त्‍यसले चोरी गर्दैन, तर भोकालाई आफ्‍नो खानेकुरा दिन्‍छ, र नाङ्गालाई लुगा पहिराइदिन्‍छ।

⁸त्‍यसले ब्‍याजमा रुपियाँ दिँदैन, कुकर्म गर्नबाट आफ्‍नो हात परै राख्‍छ, मानिस-मानिसको बीचमा सत्‍यसित न्‍याय गर्छ।

⁹त्‍यसले मेरा विधिहरू पालन गर्छ, र विश्‍वाससित मेरा नियमहरू पालन गर्छ। त्‍यही मानिस धर्मात्‍मा हो। त्‍यो निश्‍चय नै बाँच्‍नेछ, परमप्रभु परमेश्‍वर भन्‍नुहुन्‍छ।

¹⁰“मानौं, त्‍यसको रिसाहा छोरो छ, जसले हत्‍या गर्छ अथवा यी माथि लेखिएका कामहरू गर्छ,

¹¹यद्यपि त्‍यसका बुबाले चाहिँ यी कामहरूमा एउटै पनि गरेको छैन: त्‍यसले डाँड़ाका देवता-थानहरूमा खान्‍छ, आफ्‍नो छिमेकीकी पत्‍नीलाई बिटुलो पार्छ,

¹²त्‍यसले गरीब र दरिद्रमाथि थिचोमिचो गर्छ, त्‍यसले चोरी गर्छ, बन्‍धकमा राखेको चीज फर्काउँदैन, त्‍यसले मूर्तिहरूतिर हेर्छ, र घिनलाग्‍दा कामहरू गर्छ।

¹³त्‍यसले ब्‍याजमा रुपियाँ दिन्‍छ र दिएको भन्‍दा बढ़ी लिन्‍छ। के यस्‍तो मानिस जीवित रहन्‍छ र? त्‍यो जीवित रहनेछैन। त्‍यसले यी सबै घिनलाग्‍दा कामहरू गरेको कारणले त्‍यो मारिनैपर्छ, र त्‍यसको रगत त्‍यसकै शिरमाथि पर्नेछ।

¹⁴“तर मानौं, त्‍यस मानिसको एक जना यस्‍तो छोरो छ, जसले आफ्‍ना बुबाले गरेका सबै पापहरू देख्‍छ, तर त्‍यसले त्‍यस्‍ता काम गर्दैन:

¹⁵“त्‍यसले डाँड़ाका देवता-थानहरूमा खाँदैन, अथवा इस्राएलका घरानाका मूर्तिहरूतिर हेर्दैन, त्‍यसले आफ्‍नो छिमेकीकी पत्‍नीलाई बिटुलो पार्दैन।

¹⁶त्‍यसले कसैलाई थिचोमिचो गर्दैन, वा बन्‍धकमा ऋण लिँदैन। त्‍यसले चोरी गर्दैन, तर भोकालाई आफ्‍नो खानेकुरा दिन्‍छ, र नाङ्गालाई लुगा पहिराइदिन्‍छ।

¹⁷त्‍यसले पापदेखि आफ्‍नो हात परै राख्‍छ, र ब्‍याजमा रुपियाँ दिँदैन वा दिएको भन्‍दा बढ़ी लिँदैन। मेरा नियमहरू मान्‍छ, र मेरा विधिहरू पालन गर्छ। त्‍यो आफ्‍नो बुबाका पापको कारण मर्नेछैन। त्‍यो निश्‍चय नै बाँच्‍नेछ।

¹⁸तर त्‍यसको बुबाचाहिँ आफ्‍नो अधर्मको कारण मर्नेछ, किनभने त्‍यसले जबरदस्‍ती लिने गर्‍यो, आफ्‍नो भाइलाई डाँका मार्‍यो र आफ्‍ना मानिसहरूका बीचमा त्‍यसले नराम्रो काम गर्‍यो।

¹⁹“तापनि तिमीहरू सोध्‍छौ, ‘छोराले बुबाको दोषको फल किन भोग्‍नुपर्दैन?’ छोराले न्‍यायसङ्गत र ठीक काम गरेको छ, र मेरा सबै विधिहरू होशियारीसित पालन गरेको कारणले, त्‍यो निश्‍चय नै बाँच्‍नेछ।

²⁰त्‍यो प्राण, जसले पाप गर्छ, त्‍यही मर्छ। छोराले बुबाको दोषको फल भोग्‍नेछैन, न त बुबाले छोराको दोषको फल भोग्‍नेछ। धर्मीले आफ्‍नो धार्मिकताको फल र दुष्‍टले आफ्‍नो दुष्‍ट्याइँको फल पाउनेछ।

²¹“तर यदि कुनै दुष्‍ट मानिसले आफूले गरेका सबै पापहरू त्‍यागेर मेरा विधिहरू पालन गर्‍यो, र न्‍यायसङ्गत र ठीक काम गर्‍यो भने, त्‍यो निश्‍चय नै बाँच्‍नेछ। त्‍यो मर्नेछैन।

²²त्‍यसले गरेको कुनै पनि अपराध त्‍यसको विरुद्धमा फेरि सम्‍झना हुनेछैन। त्‍यसले गरेको धर्मको कारण त्‍यो बाँच्‍नेछ।

²³के दुष्‍टको मृत्‍युमा म खुशी हुन्‍छु र? परमप्रभु परमेश्‍वर भन्‍नुहुन्‍छ। बरु आफ्‍नो चाल छोड़ेर तिनीहरू बाँचेका म हेर्न चाहन्‍नँ र?

²⁴“तर धर्मी मानिसले आफ्‍नो धार्मिकतालाई त्‍यागेर पाप गर्छ, र दुष्‍ट मानिसले गरेका घिनलाग्‍दा कामहरू गर्छ भने, के त्‍यो बाँच्‍नेछ र? त्‍यसले अघि गरेको कुनै पनि धर्मको कामको सम्‍झना हुनेछैन। त्‍यसको अविश्‍वास र त्‍यसले गरेका पापको कारणले त्‍यो मर्नेछ।

²⁵“तापनि तिमीहरू भन्‍छौ, ‘परमप्रभुको चाल न्‍यायसङ्गत छैन’। हे इस्राएलका घराना, सुन: के मेरो चाल न्‍यायसङ्गत छैन? के तिमीहरूको चाल पो अन्‍यायी छैन र?

²⁶धर्मी मानिसले आफ्‍नो धार्मिकता त्‍यागेर पाप गर्‍यो भने, त्‍यसको लागि त्‍यो मर्नेछ। त्‍यसले गरेको पापको कारण नै त्‍यो मर्नेछ।

²⁷तर यदि दुष्‍ट मानिसले आफूले गरेको दुष्‍ट्याइँलाई त्‍यागेर ठीक काम गर्छ भने, त्‍यसले आफ्‍नो प्राण बचाउनेछ।

²⁸त्‍यसले विचार गर्छ र आफूले गरेका सबै अपराध सम्‍झन्‍छ र तीबाट फर्कन्‍छ। त्‍यसकारण त्‍यो निश्‍चय नै बाँच्‍नेछ, त्‍यो मर्नेछैन।

²⁹तापनि इस्राएलको घरानाले भन्‍छ, ‘परमप्रभुको चाल न्‍यायसङ्गत छैन’। हे इस्राएलको घराना, के मेरो चाल न्‍यायसङ्गत छैन र? के तिमीहरूको चाल अन्‍यायी छैन र?

³⁰“यसकारण हे इस्राएलका घराना, म तिमीहरू हरेकको न्‍याय त्‍यसको चालअनुसार गर्नेछु, परमप्रभु परमेश्‍वर भन्‍नुहुन्‍छ। पश्‍चात्ताप गर, आफ्‍ना सबै अपराधहरूदेखि फर्क! तब तिमीहरूको पाप आफ्‍नो पतनको कारण हुनेछैन।

³¹तिमीहरूले गरेका सबै अपराधहरू त्‍याग, र नयाँ हृदय र नयाँ आत्‍मा लेओ। तिमीहरू किन मर्छौ, हे इस्राएलका घराना?

³²किनभने कसैको मृत्‍युमा म प्रसन्‍न हुन्‍न, परमप्रभु परमेश्‍वर भन्‍नुहुन्‍छ। पश्‍चात्ताप गर, र बाँच।