Read Nepali New Revised Version, 2012 इजकिएल 19 Bible Online

इजकिएल 19 - Nepali New Revised Version, 2012 bible

इजकिएल 19

¹“इस्राएलका राजकुमारहरूका निम्‍ति यो विलाप गर्, र भन्‌:

²“‘तेरी आमा सिंहहरूका बीचमा कस्‍ती सिंहिनी थिई! त्‍यो आफ्‍ना डमरुहरूलाई हुर्काउँदै जवान सिंहका बीचमा ढल्‍केर बस्‍थी।

³ती डमरुहरूमध्‍ये एउटालाई त्‍यसले हुर्काएर बढ़ाई, र त्‍यो एउटा बलियो सिंह भयो। त्‍यसले शिकारलाई फहराउन सिक्‍यो र मानिसहरूलाई खान लाग्‍यो।

⁴जाति-जातिहरूले त्‍यसको विषयमा सुने, र तिनीहरूले खाड़ल खने, र त्‍यो त्‍यसमा पर्‍यो। तिनीहरूले त्‍यसलाई अङ्‌कुसेले समातेर त्‍यसलाई मिश्रदेशमा लगे।

⁵“‘जब त्‍यसले आफ्‍नो आशा पूरा नभएको, र आफ्‍नो अपेक्षा खतम भएको देखी, तब त्‍यसले आफ्‍ना डमरुहरूमध्‍ये अर्को एउटालाई लिई, र त्‍यसलाई एउटा बलियो सिंह बनाई।

⁶त्‍यो, सिंहहरूमध्‍ये यताउता हिँड्‌डुल गर्न लाग्‍यो, किनकि अब त्‍यो एउटा बलियो जवान सिंह भएको थियो। त्‍यसले शिकारलाई फहराउन सिक्‍यो, र मानिसहरूलाई खान लाग्‍यो।

⁷त्‍यसले तिनीहरूका किल्‍लाहरू भत्‍काइदियो, र तिनीहरूका सहरहरू उजाड़ पार्‍यो। त्‍यो गर्जेको आवाजले देश र त्‍यसमा भएका सबै जना तर्से।

⁸तब जाति-जातिहरू छेउछाउका इलाकाहरूबाट आए, र तिनीहरूले त्‍यसको लागि पासो थापे, र त्‍यसलाई पक्रनलाई तिनीहरूले जाल फिँजाए, र त्‍यो तिनीहरूको खाड़लमा पर्‍यो।

⁹तिनीहरूले अङ्‌कुसेले त्‍यसलाई समातेर एउटा खोरमा हाले, र त्‍यसलाई बेबिलोनको राजाकहाँ ल्‍याए। इस्राएलका डाँड़ाहरूमा त्‍यसको आवाज फेरि कहिल्‍यै नसुनिओस्‌ भनेर तिनीहरूले त्‍यसलाई कैदमा राखे।

¹⁰“‘पानीको छेउमा रोपिएको दाखबारीमा दाखको बोटजस्‍तै तेरी आमा थिई। प्रशस्‍त पानीको कारणले त्‍यो फलैफल भएकी र हाँगाहरूले झ्‍याम्‍म परेकी थिई।

¹¹त्‍यसका हाँगाहरू बलिया थिए, शासकको राजदण्‍डको लागि उचित। बाक्‍ला हाँगाहरूका बीचमा त्‍यो अल्‍गो भएर बढ़्यो। त्‍यसका हाँगाहरू धेरै थिए, र त्‍यो अल्‍गो देखिन्‍थ्‍यो।

¹²तर क्रोधमा त्‍यो उखेलियो, र जमिनमा त्‍यो फ्‍याँकियो। पूर्वीय बतासले त्‍यसलाई सुकाइदियो, र त्‍यसका फलहरू सबै झारिए। त्‍यसका बलिया हाँगाहरू सुकिहाले, र आगोले ती भस्‍म पारियो।

¹³अब त्‍यो मरुभूमिमा रोपियो, सुक्‍खा र पानी नभएको ठाउँमा।

¹⁴त्‍यसका मुख्‍य हाँगाहरूमध्‍ये एउटाबाट आगो निस्‍क्‍यो, र त्‍यसका फलहरू भस्‍म पार्‍यो। त्‍यसमा कुनै बलियो हाँगा बाँकी रहेन, शासकको जो राजदण्‍डको निम्‍ति उचित थियो। यो एउटा विलापी गीत हो, र विलापी गीतजस्‍तै यो प्रयोग गरिनुपर्छ।