Read Nepali New Revised Version, 2012 इजकिएल 23 Bible Online

इजकिएल 23 - Nepali New Revised Version, 2012 bible

इजकिएल 23

²“हे मानिसको छोरो, कुनै समय दुई स्‍त्रीहरू थिए— एउटै आमाका दुई छोरीहरू।

³तिनीहरू मिश्रदेशमा वेश्‍या भए। तरुणी अवस्‍थामा हुँदै तिनीहरूले वेश्‍यावृत्ति गर्न लागे। त्‍यस देशमा तिनीहरूका स्‍तनमा हात लगाइए, र तिनीहरूको कुमारी अवस्‍थाको स्‍तन माड़िए।

⁴तिनीहरूमा दिदीचाहिँको नाउँ ओहोला र बहिनीको नाउँ ओहोलिबा थियो। तिनीहरू मेरा थिए, र तिनीहरूले छोराछोरीहरू जन्‍माए। ओहोलाचाहिँ सामरिया र ओहोलिबाचाहिँ यरूशलेम हो।

⁵“मेरी हुँदाहुँदै पनि ओहोलाले वेश्‍यावृत्ति गरी, र आफ्‍ना प्रेमी, अश्‍शूरीहरूसित त्‍यो मोहित भई—

⁶नीलो वस्‍त्र लाउने योद्धाहरू, राज्‍यपालहरू र सेनापतिहरू, ती सबै सुन्‍दर-सुन्‍दर जवान मानिसहरू, घोड़ामा सवार हुने घोड़चढ़ीहरू थिए।

⁷अश्‍शूरका चुनिएका सबै असल-असल मानिसहरूसित त्‍यसले व्‍यभिचार गरी, र त्‍यो मोहित भएर उनीहरू हरेकका मूर्तिहरूले त्‍यसले आफैलाई अशुद्ध पारी।

⁸आफू मिश्रदेशमा छँदा, जुन बेला त्‍यसको युवावस्‍थामा मानिसहरू त्‍यससित सुते र त्‍यसको कुमारी अवस्‍थाको स्‍तनमा उनीहरूले हात लगाए र आफ्‍नो कामवासना त्‍यसमाथि पोखाए— त्‍यही बेलादेखि गरेको वेश्‍यावृत्ति त्‍यसले छोड़िन।

⁹“यसैकारण मैले त्‍यसका प्रेमी, अश्‍शूरहरूका हातमा त्‍यसलाई सुम्‍पिदिएँ, जोसँग त्‍यो कामवासनाले मोहित भएकी थिई।

¹⁰उनीहरूले त्‍यसलाई नाङ्गो पारे। उनीहरूले त्‍यसका छोराहरू र छोरीहरूलाई पक्रे, र त्‍यसलाई चाहिँ उनीहरूले तरवारले मारे। स्‍त्रीहरूमध्‍ये त्‍यो गिल्‍लाको पात्र भई, र त्‍यसलाई दण्‍ड दिइयो।

¹¹“त्‍यसकी बहिनी ओहोलिबाले यो देखी, तर पनि आफ्‍नो कामवासना र वेश्‍यावृत्तिमा त्‍यो आफ्‍नी दिदीभन्‍दा पनि झन्‌ भ्रष्‍ट भई।

¹²त्‍यो पनि अश्‍शूरीहरू— तिनका राज्‍यपाल र सेनापतिहरू, पूरा जङ्गी-पोशाक पहिरिएका योद्धाहरू, घोड़ामा सवार हुने घोड़चढ़ीहरू— ती सबै सुन्‍दर-सुन्‍दर जवान मानिसहरूसित कामवासनाले त्‍यो मोहित भई।

¹³त्‍यो पनि अशुद्ध भएकी मैले देखें। ती दुवै एउटै चालमा हिँड़े।

¹⁴“तर त्‍यसले त आफ्‍नो वेश्‍यावृत्ति झन्‌ बढ़ाई। भित्तामा मानिसहरूका चित्र कोरिएका त्‍यसले देखी— रातो रङ्गले बनाइएका कल्‍दीहरूका चित्र,

¹⁵कम्‍मरमा पटुका र शिरमा लट्‌कने फेटा बाँधेका सबै कल्‍दी रथ हाँक्‍ने अधिकृतहरूजस्‍ता— कल्‍दियाका देशवासीहरूजस्‍तै— ती देखिन्‍थे।

¹⁶त्‍यसले उनीहरूलाई देख्‍ने बित्तिकै उनीहरूसित कामवासनाले त्‍यो मोहित भएर कल्‍दिया देशमा उनीहरूकहाँ त्‍यसले समाचारवाहकहरू पठाई।

¹⁷तब बेबिलोनीहरू त्‍यसकहाँ त्‍यसको प्रणयशैयामा सम्‍भोग गर्न आए र आफ्‍नो कामवासनाले त्‍यसलाई अशुद्ध पारे। उनीहरूबाट त्‍यो अशुद्ध भएपछि वाक्‍क भएर त्‍यसको मन उनीहरूदेखि हट्यो।

¹⁸जब त्‍यसले त्‍यसरी खुल्‍लमखुल्‍ला वेश्‍यावृत्ति गरेर आफ्‍नो नग्‍नता खुलस्‍त पारी, तब त्‍यसकी दिदीप्रति भएझैँ त्‍यसप्रति पनि वाक्‍क भएर मैले त्‍यसलाई घृणा गर्न लागें।

¹⁹तापनि मिश्रदेशमा आफ्‍नो युवावस्‍थामा बितेको दिनलाई सम्‍झेर त्‍यसले आफ्‍नो वेश्‍यावृत्ति झन्‌-झन्‌ बढ़ाउन लागी।

²⁰त्‍यहाँ त्‍यसका प्रेमीहरूसित त्‍यो मोहित भई, जसका लिङ्ग गधाहरूका जस्‍ता थिए, र वीर्यचाहिँ घोड़ाहरूको झैँ निस्‍कन्‍थ्‍यो।

²¹यसरी मिश्रदेशमा तेरो छातीमा हात लगाएका, तेरा युवावस्‍थाका स्‍तन माड़ेका कुरा सम्‍झेर तैंले आफ्‍नो युवावस्‍थाको कामुकताको कुइच्‍छा गरिस्‌।

²²“यसैकारण हे ओहोलिबा, परमप्रभु परमेश्‍वर यसो भन्‍नुहुन्‍छ: तेरा प्रेमीहरूलाई, जसबाट तँ वाक्‍क भएकी थिईस्, उनीहरूलाई तेरो विरुद्धमा म उठाउनेछु,

²³अर्थात्‌ बेबिलोनी सबै कल्‍दीहरू, र पकोद, शोअ र कोअका मानिसहरू, तिनीहरूसित सबै अश्‍शूरहरूलाई, जो सुन्‍दर जवान छन्, — ती सबै राज्‍यपालहरू, सेनापतिहरू, सबै अधिकृतहरू र उच्‍च दर्जाका मानिसहरूलाई, सबै घोड़ामा सवार हुनेहरूलाई चारैतिरबाट तेरो विरुद्धमा म ल्‍याउनेछु।

²⁴उनीहरू तेरो विरुद्धमा हतियारहरूसित उत्तरबाट रथहरू र गाड़ाहरू र मानिसहरूको भीड़का साथमा आउनेछन्‌। ठूला र साना ढालहरू लिएर र टोप लाएर उनीहरूले तँलाई घेरा हाल्‍नेछन्‌। म तँलाई उनीहरूका हातमा दण्‍डको लागि सुम्‍पिदिनेछु, र उनीहरूले आफ्‍नो चलनअनुसार तँलाई दण्‍ड दिनेछन्‌।

²⁵म मेरो डाहको रीस तँतिर फर्काउनेछु, र क्रोधमा उनीहरूले तँसित व्‍यवहार गर्नेछन्‌। उनीहरूले तेरा नाक र कान काट्‌नेछन्, र तेरा बाँचेकाहरू तरवारले ढल्‍नेछन्‌। उनीहरूले तेरा छोराछोरीहरूलाई पक्रेर लानेछन्, र तेरा बाँचेकाहरू आगोले भस्‍म हुनेछन्‌।

²⁶उनीहरूले तेरा वस्‍त्र उतारेर तँलाई नाङ्गै बनाउनेछन्, र तेरा राम्रा-राम्रा गहनाहरू लैजानेछन्‌।

²⁷यसरी तैंले मिश्रदेशमा सुरु गरेका तेरा वेश्‍यावृत्ति र भ्रष्‍टता म रोकिदिनेछु। तैंले यी कुराहरू तेरो कुइच्‍छाले हेर्नेछैनस्‌ अथवा मिश्रदेशको सम्‍झना गर्नेछैनस्‌।

²⁸“किनभने परमप्रभु परमेश्‍वर यसो भन्‍नुहुन्‍छ: म तँलाई उनीहरूकै हातमा सुम्‍पिदिन लागेको छु, जसलाई तँ घृणा गर्दछस्, उनीहरूकै हातमा जसबाट तँ वाक्‍क भएर फर्केकी थिई।

²⁹उनीहरूले तँसित घृणापूर्वक व्‍यवहार गर्नेछन्, र तैंले काम गरेर पाएको हरेक कुराको फल लानेछन्‌। उनीहरूले तँलाई नाङ्गो भुतुङ्गो पारेर छोड्‌नेछन्, र तेरो वेश्‍यावृत्तिको लाज प्रकट हुनेछ। तेरो वेश्‍यावृत्तिले र भ्रष्‍टताले गर्दा,

³⁰तँमाथि यस्‍तो दशा ल्‍याइएको हो, किनभने तैंले जाति-जातिहरूसित कामवासनाले मोहित भएर वेश्‍यावृत्ति गरिस्, र उनीहरूका मूर्तिहरूबाट तैंले आफूलाई अशुद्ध पारिस्‌।

³¹तेरी दिदीकै चालमा तँ हिँड़ेकी छस्‌। यसैकारण म त्‍यसको कचौरा तेरो हातमा दिनेछु।

³²“शक्तिशाली परमप्रभु यसो भन्‍नुहुन्‍छ: “तैंले तेरी दिदीको कचौरा पिउनेछस्, जो ठूलो र गहिरो छ। त्‍यसले गिल्‍ला र हाँसो ल्‍याउनेछ, किनकि त्‍यस कचौरामा धेरै अटाउँछ।

³³नशा र अफसोसले तँ पूर्ण हुनेछस्‌ तेरी दिदी सामरियाको कचौरा। नाश र उजाड़को कचौरा त्‍यो हो।

³⁴रित्तो नभएसम्‍म तैंले त्‍यो पिउनेछस्, र तैंले त्‍यो कचौरा टुक्रा-टुक्रा गरी फोर्नेछस्, र तैंले आफ्‍नो स्‍तन चिथोर्नेछस्‌।” मैले नै यो कुरा बोलेको हुँ, परमप्रभु परमेश्‍वर भन्‍नुहुन्‍छ।”

³⁵“यसकारण परमप्रभु परमेश्‍वर यसो भन्‍नुहुन्‍छ: तैंले मलाई बिर्सिस्‌ र तेरो पिठिउँ पछाड़ि मलाई राखिस्, यसैकारण तैंले आफ्‍नो कामवासना र भ्रष्‍टताको फल भोग्‍नुपर्नेछ।”

³⁶परमप्रभुले मलाई भन्‍नुभयो, “हे मानिसको छोरो, के तँ ओहोला र ओहोलिबाको न्‍याय गरिदिन्‍छस्‌? त्‍यसो भए तिनीहरूले गरेका घृणित व्‍यवहारहरूसँग तिनीहरूको सामना गर्,

³⁷किनकि तिनीहरूले व्‍यभिचार गरेका छन्, र तिनीहरूका हातमा रगत छ। तिनीहरूले आफ्‍ना मूर्तिहरूसित व्‍यभिचार गरे। मेरो लागि जन्‍माएका तिनीहरूका छोराछोरीहरूलाई तिनीहरूले ती मूर्तिहरूका निम्‍ति खानलाई बलि चढ़ाए।

³⁸तिनीहरूले मसित यसो पनि गरेका छन्‌: एकै समयमा तिनीहरूले मेरो पवित्रस्‍थानलाई बिटुलो र मेरा शबाथहरूलाई अपवित्र पारे।

³⁹जुन दिन तिनीहरूले आफ्‍ना छोराछोरीहरूलाई तिनीहरूका मूर्तिहरूका निम्‍ति बलि चढ़ाए, त्‍यही दिन तिनीहरू मेरो पवित्रस्‍थानभित्र पसे र त्‍यसलाई अपवित्र पारे। तिनीहरूले मेरो भवनमा यस्‍तै काम गरे।

⁴⁰“तिनीहरूले टाढ़ा-टाढ़ाका मानिसहरूलाई समाचारवाहकहरू पनि पठाएर बोलाए र उनीहरू आए। तैंले तिनीहरूका निम्‍ति नुहाइधुवाइ गरिस्, आँखामा गाजल लगाइस्‌ र गरगहना लाएर आफैलाई सिँगारिस्‌।

⁴¹तँ आफै सुन्‍दर पलङ्गमा बसिस्, र त्‍यसको अगाड़ि टेबिल राखेर मेरै धूप र तेल राखिस्‌।

⁴²“विलासीहरूका भीड़को हल्‍ला त्‍यसको चारैतिर थियो। यी साधारण श्रेणीका मानिसहरूबाहेक मरुभूमिबाट ल्‍याएका मतवाला मानिसहरू थिए। उनीहरूले त्‍यसकी र त्‍यसकी दिदीको हातमा चुरा र टाउकामा सुन्‍दर-सुन्‍दर मुकुट लगाइदिए।”

⁴³तब मानिसहरूले वेश्‍यागमन गर्दा दिक्‍क भएकी स्‍त्रीको विषयमा मैले यसो भनें, “अब त्‍यसलाई अरू सब वेश्‍यालाई झैँ उनीहरूले प्रयोग गरून्, किनकि त्‍यो त्‍यही मात्र हो’।

⁴⁴अनि उनीहरू त्‍यससित सुते। मानिसहरू एउटी वेश्‍यासित सुतेझैँ उनीहरू ती कामवासनाले मोहित भएका स्‍त्रीहरू, ओहोला र ओहोलिबासित सुते।

⁴⁵तर धार्मिक मानिसहरूले चाहिँ तिनीहरूलाई व्‍यभिचारिणी र हत्‍या गर्ने स्‍त्री भनी न्‍यायको दण्‍ड सुनाउनेछन्, किनभने तिनीहरू व्‍यभिचारिणी हुन्‌ र तिनीहरूका हातमा हत्‍याको रगत छ।

⁴⁶“परमप्रभु परमेश्‍वर यसो भन्‍नुहुन्‍छ: तिनीहरूका विरुद्धमा एउटा हूलदङ्गा गर्ने भीड़ उठा, र तिनीहरूलाई त्रास र लूटको शिकार बना।

⁴⁷तब हूलदङ्गा गर्ने भीड़ले तिनीहरूलाई ढुङ्गाले हान्‍नेछन्, र उनीहरूका तरवारले तिनीहरूलाई खतम पार्नेछन्, र तिनीहरूका छोराछोरीहरूलाई उनीहरूले मार्नेछन्‌ र तिनीहरूका घरहरू जलाइदिनेछन्‌।

⁴⁸“यसरी म देशमा कामवासना खतम गर्नेछु, र तेरो नकल नगरून्‌ भनी सबै स्‍त्रीहरूको निम्‍ति यो चेताउनी हुनेछ।

⁴⁹तेरा कामवासनाको दण्‍ड तैंले भोग्‍नेछस्, र तैंले गरेको मूर्तिपूजाका पापको नतीजा तैंले भोग्‍नेछस्‌। तब म नै परमप्रभु परमेश्‍वर हुँ भनी तैंले जान्‍नेछस्‌।”