Read Nepali New Revised Version, 2012 इजकिएल 24 Bible Online

इजकिएल 24 - Nepali New Revised Version, 2012 bible

इजकिएल 24

¹नवौँ वर्षको दशौँ महिनाको दशौँ दिनमा परमप्रभुको यो वचन मकहाँ आयो:

²“हे मानिसको छोरो, आजको दिन, आजकै मिति लेखिराख्, किनभने आजकै दिन बेबिलोनको राजाले यरूशलेमलाई घेरा हालेको छ।

³यस बागी घरानालाई यो उखान कहेर तिनीहरूलाई भन्‌: ‘परमप्रभु परमेश्‍वर भन्‍नुहुन्‍छ: ‘आगोमाथि भाँड़ो राख्, भाँड़ो राख्, र त्‍यसमा पानी हाल्‌।

⁴त्‍यसमा मासुका टुक्राहरू हाल्, सबै असल-असल टुक्राहरू— खुट्टा र कुम, ती असल-असल हड्डीहरूले त्‍यो पूरा भर्‌।

⁵बगालको सबैभन्‍दा असल पशु छानेर ले, हड्डीका निम्‍ति त्‍यसमुनि दाउराको थुप्रो लगा। उमालेर त्‍यसमा हड्डीहरूलाई पका।

⁶“किनकि परमप्रभु परमेश्‍वर यसो भन्‍नुहुन्‍छ: “‘यस खूनी सहरलाई धिक्‍कार! त्‍यो थिग्रो लागेको भाँड़ालाई, जसको थिग्रो त्‍यसबाट गएको छैन! तिनमा चिट्ठा नहाली टुक्रा-टुक्रा गरी त्‍यसलाई रित्तो पार्‌।

⁷“‘किनकि त्‍यसले बगाएको रगत त्‍यसकै बीचमा छ। त्‍यसले त्‍यो रगत नाङ्गो चट्टानमा बगायो, धूलाले ढाक्‍नलाई त्‍यसले त्‍यो रगत भूइँमा पोखाएन।

⁸क्रोध जगाएर साटो लिनलाई त्‍यसले बगाएको रगत नढाकोस्‌ भनेर मैले नाङ्गो चट्टानमा त्‍यो राखें’।

⁹“‘यसैकारण परमप्रभु परमेश्‍वर यसो भन्‍नुहुन्‍छ: “‘धिक्‍कार, त्‍यस खूनी सहरलाई! म पनि दाउरा थुपार्नेछु।

¹⁰यसैले दाउरा थुपार्‌ र आगो सल्‍का। मसला हालेर मासु राम्ररी पका, र हड्डीहरू डढून्‌।

¹¹त्‍यसपछि भाँड़ो खाली गरेर आगोमाथि राख्, र त्‍यो गरम होस्, र त्‍यसको तामा चम्‍कोस्‌। र त्‍यस भित्रको मैला गलिजाओस्, र त्‍यसको थिग्रो डढ़ेर जाओस्‌।

¹²त्‍यसले गर्दा सबै परिश्रम व्‍यर्थै भयो। त्‍यसको बाक्‍लो थिग्रो आगोले पनि जाँदैजाँदैन।

¹³“‘तेरो थिग्रोचाहिँ कामवासना हो। मैले त तँलाई शुद्ध गर्ने कोशिश गरें, तर तेरो अशुद्धताबाट शुद्ध हुन तैंले मानिनस्‌। यसकारण जबसम्‍म म आफ्‍नो क्रोध तेरो विरुद्धमा पोखाएर सन्‍तुष्‍ट हुन्‍नँ, तबसम्‍म तँ फेरि शुद्ध पारिनेछैनस्‌।

¹⁴“‘म परमप्रभुले यो कुरा बोलेको हुँ। मैले काम गर्ने समय आएको छ। म पछि हट्‌नेछैनँ। म दया देखाउनेछैनँ। न त म पछितो गर्नेछु। तेरै चालचलन र तेरै कामअनुसार म तेरो न्‍याय गर्नेछु, परमप्रभु परमेश्‍वर भन्‍नुहुन्‍छ।

¹⁵परमप्रभुको यो वचन मकहाँ आयो:

¹⁶“हे मानिसको छोरो, एकै प्रहारमा म तँबाट तेरो आँखाको नानीलाई लैजान लागेको छु। तापनि तैंले शोक नगर्‌। नरो, र तेरा आँखाबाट केही आँसु नझार्‌।

¹⁷चूपचाप बसेर सुस्‍केरा हाल्‌। मृतकको निम्‍ति शोक नगर्‌। टाउकोमा फेटा र खुट्टामा जुत्ता लगा। तेरो मुख नछोप्‌। मलामीहरूको खाने कुरा नखा।”

¹⁸यसैले बिहानै मैले यो कुरा मानिसहरूलाई भनें, र त्‍यही बेलुकी मेरी पत्‍नीको मृत्‍यु भयो। भोलि बिहान मैले जे आज्ञा पाएको थिएँ, त्‍यसै गरें।

¹⁹तब मानिसहरूले मलाई सोधे, “यी कामहरूसँग हाम्रो के सम्‍बन्‍ध? के तपाईं हामीलाई बताउनुहुन्‍न?”

²⁰तब मैले तिनीहरूलाई भनें, “परमप्रभुको यो वचन मकहाँ आयो:

²¹इस्राएलको घरानालाई भन्‌: “परमप्रभु परमेश्‍वर यसो भन्‍नुहुन्‍छ: म मेरो पवित्रस्‍थान, त्‍यो किल्‍ला, जसमा तिमीहरू गर्व गर्दछौ, तिमीहरूका आँखाको प्‍यारो, तिमीहरूका प्रेमको पात्रलाई अपवित्र तुल्‍याउन लागेको छु। अनि तिमीहरूले छोड़िराखेका तिमीहरूका छोराछोरीहरू तरवारले मारिनेछन्‌।

²²अनि मैले गरेझैँ तिमीहरूले पनि गर्नेछौ। तिमीहरूले आफ्‍नो मुख छोप्‍नेछैनौ, अथवा मलामीहरूको खानेकुरा तिमीहरूले खानेछैनौ।

²³तिमीहरूले आफ्‍नो फेटा टाउकोमा र तिमीहरूका जुत्ता तिमीहरूका खुट्टामा लगाउनेछौ। तिमीहरूले शोक गर्नेछैनौ न त रुनेछौ, तर तिमीहरू आफ्‍ना पापहरूको कारण सुकेर जानेछौ, र आ-आफ्‍ना बीचमा सुस्‍केरा हाल्‍नेछौ।

²⁴यसरी इजकिएल तिमीहरूका निम्‍ति एउटा चिन्‍ह हुनेछ। उसले गरेजस्‍तै तिमीहरूले पनि गर्नेछौ। जब यो कुरा हुन्‍छ, तब परमप्रभु परमेश्‍वर म नै हुँ भनी तिमीहरूले जान्‍नेछौ।”

²⁵“हे मानिसको छोरो, त्‍यस दिन जब म तिनीहरूबाट तिनीहरूको किल्‍ला, तिनीहरूको आनन्‍द र गौरव, तिनीहरूका आँखाको अति प्रिय कुरा, तिनीहरूका हृदयको इच्‍छा र तिनीहरूका छोराछोरीहरू पनि लानेछु,

²⁶त्‍यस दिन तँलाई यो समाचार सुनाउनलाई एउटा भागेर आएको मानिस तँकहाँ आउनेछ।

²⁷त्‍यस बेला तेरो मुख खोलिनेछ। तँ त्‍यससँग कुरा गर्नेछस्, र तँ चूपचाप रहनेछैनस्‌। यसरी तँ तिनीहरूका निम्‍ति एउटा चिन्‍ह हुनेछस्, र तिनीहरूले म नै परमप्रभु हुँ भनी जान्‍नेछन्‌।”