Read Nepali New Revised Version, 2012 इजकिएल 26 Bible Online

इजकिएल 26 - Nepali New Revised Version, 2012 bible

इजकिएल 26

¹एघारौँ वर्षको महिनाको पहिलो दिनमा परमप्रभुको यो वचन मकहाँ आयो:

²“हे मानिसको छोरो, किनभने यरूशलेमको बारेमा टुरोस सहरले यसो भन्‍यो, ‘अहा! जाति-जातिहरूका सामुन्‍ने मूल ढोका भत्‍केको छ। ढोकाहरू मेरो निम्‍ति उघारिएका छन्‌। त्‍यो ध्‍वंस भयो, अब मेरो उन्‍नति हुनेछ’।

³यसैकारण परमप्रभु परमेश्‍वर यसो भन्‍नुहुन्‍छ: ए टुरोस सहर, म तेरो विरुद्धमा छु। समुद्रले छालहरू ल्‍याएझैँ म धेरै जातिहरूलाई तेरो विरुद्धमा ल्‍याउनेछु।

⁴उनीहरूले टुरोसका पर्खालहरू भत्‍काउनेछन्, र त्‍यसका धरहराहरू ढालिदिनेछन्‌। म त्‍यसको ढुङ्गाहरू खुर्की-खुर्कीकन त्‍यसलाई नाङ्गो पहराजस्‍तै तुल्‍याइदिनेछु।

⁵त्‍यो समुद्रको बीचमा जालहरू फिँजाउने ठाउँ हुनेछ, किनभने मैले भनेको छु, परमप्रभु परमेश्‍वर भन्‍नुहुन्‍छ। जाति-जातिहरूका निम्‍ति लूटको माल त्‍यो हुनेछ,

⁶र देशका बस्‍तीहरूमा बस्‍ने मानिसहरू तरवारले मारिनेछन्‌। तब तिनीहरूले म नै परमप्रभु हुँ भनी जान्‍नेछन्‌।

⁷“किनभने परमप्रभु परमेश्‍वर यसो भन्‍नुहुन्‍छ: म उत्तरबाट राजाहरूको राजा बेबिलोनको राजा नबूकदनेसरलाई घोड़ाहरू, रथहरू, घोड़चढ़ी र एउटा ठूलो सेना लिएर टुरोसको विरुद्धमा चढ़ाइ गर्न ल्‍याउनेछु।

⁸त्‍यसले देशका बस्‍ती-बस्‍तीमा बस्‍ने मानिसहरूलाई तरवारले मार्नेछ। त्‍यसले तेरो विरुद्धमा घेरा-मचान निर्माण गर्नेछ, तेरा पर्खालहरूमा आड़ लाग्‍ने किल्‍ला निर्माण गर्नेछ, र तेरो विरुद्धमा ढालहरू उठाउनेछ।

⁹त्‍यसले पर्खाल भत्‍काउने मूढ़ाहरूद्वारा तेरा पर्खालहरू भत्‍काउनेछ, र त्‍यसका हातहतियारहरूद्वारा तेरा धरहराहरू ढालिदिनेछ।

¹⁰त्‍यसका घोड़ाहरू यति धेरै हुनेछन्, कि तिनीहरूले उड़ाएको धूलोले तँलाई ढाक्‍नेछ। कुनै एउटा सहरभित्र छिरिजानलाई मानिसहरूले पर्खाल भत्‍काउनेजस्‍तै जब त्‍यो तेरा ढोकाहरूभित्र पस्‍छ, तब युद्धका घोड़ाहरू, गाढ़ाहरू र रथहरूको आवाजले तेरो सहरका पर्खालहरू हल्‍लिनेछन्‌।

¹¹त्‍यसका घोड़ाका टापहरूले तेरा सबै सड़कहरू कुल्‍चीमिल्‍ची पार्नेछन्‌। त्‍यसले तेरा मानिसहरूलाई तरवारले मार्नेछ, र तेरा बलिया-बलिया खामाहरू जमिनमा ढल्‍नेछन्‌।

¹²उनीहरूले तेरा धन-सम्‍पत्तिहरू लुट्‌नेछन्, तेरा व्‍यापारका मालहरू लूटपीट गरी लैजानेछन्‌। उनीहरूले तेरा पर्खालहरू ढालिदिनेछन्‌ र तेरा सुन्‍दर-सुन्‍दर घरहरू भत्‍काइदिनेछन्‌। तेरा ढुङ्गा र काठपात, कलङ्कसमेत उनीहरूले समुद्रमा फ्‍याँकिदिनेछन्‌।

¹³म तेरो गोलमाले गीतको सोर खतम गरिदिनेछु। तेरा वीणाहरूको सङ्गीत फेरि कहिल्‍यै सुनिनेछैन।

¹⁴म तँलाई नाङ्गो पहरा तुल्‍याइदिनेछु र, तँ जालहरू फिँजाउने ठाउँ हुनेछस्‌। तँ फेरि कहिल्‍यै निर्मित हुनेछैनस्, किनभने म परमप्रभुले नै यो भनेको हुँ, परमप्रभु परमेश्‍वर यसो भन्‍नुहुन्‍छ’।

¹⁵“परमप्रभु परमेश्‍वर टुरोस सहरलाई यसो भन्‍नुहुन्‍छ: घाइतेहरूले जब कष्‍टको सोर निकाल्‍छन्, जब तेरो बीचमा मारकाट हुनेछ, तब तँ ढलेको सोर सुनेर के समुद्र-किनारका मुलुकहरू काम्‍नेछैनन्‌?

¹⁶तब समुद्र-किनारका मुलुकका सबै राजकुमारहरू आ-आफ्‍नो सिंहासनबाट ओर्लेर आ-आफ्‍नो पोशाक उतार्नेछन्, र बुट्टा भरिएका वस्‍त्रहरू फुकाल्‍नेछन्‌। त्रासले तिनीहरू थरथराउनेछन्‌। तिनीहरू भूइँमा बस्नेछन्, र छिन-छिनमा काम्‍दैरहनेछन्, र तँलाई देखेर भयभीत हुनेछन्‌।

¹⁷तब तिनीहरूले तेरो विषयमा विलाप गर्नेछन्‌ र तँलाई यसो भन्‍नेछन्‌: “‘समुद्रका मानिसहरूले भरिपूर्ण भएकी, ए प्रसिद्ध सहर, तँ कसरी लोप भइस्‌! तँ र तेरा बासिन्‍दाहरू समुद्रमा शक्तिशाली थिए, त्‍यहाँ बस्‍ने सबैलाई तैंले थर्कमान तुल्‍याएकी थिइस्‌।

¹⁸अब तेरो पतनको दिनमा समुद्र-किनारका देशहरू काम्‍छन्‌। तँ ढलेर गएकी देखेर समुद्रका टापूहरू त्रासमा परेका छन्‌।’

¹⁹“परमप्रभु परमेश्‍वर यसो भन्‍नुहुन्‍छ: जब म तँलाई मानिसहरू नभएका सहरहरूजस्‍तै एउटा उजाड़िएको सहर तुल्‍याउँछु, र जब म गहिरो सागरलाई तँमाथि उर्लाउँछु, र त्‍यसका ठूला-ठूला छालहरूले तँलाई ढाक्‍छन्,

²⁰तब म तँलाई मृत-लोकमा जानेहरूसित ती तादिका मानिसहरूकहाँ तल खसालिदिनेछु। म तँलाई पृथ्‍वीमुनि, प्राचीन भग्‍नावशेषमा जस्‍तै, मृत-लोकमा जानेहरूसित बस्‍न लाउनेछु, र तँ फेरि कहिल्‍यै जीवितहरूको देशमा फर्केर रहनेछैनस्‌।

²¹म तेरो अन्‍त्‍य डरलाग्‍दो तुल्‍याउनेछु, र म तँलाई निमिठ्यान्‍न पार्नेछु। तेरो खोजी हुनेछ तर कसैले तँलाई भेट्टाउने छैन, परमप्रभु परमेश्‍वर भन्‍नुहुन्‍छ।”