Read Nepali New Revised Version, 2012 इजकिएल 27 Bible Online

इजकिएल 27 - Nepali New Revised Version, 2012 bible

इजकिएल 27

¹परमप्रभुको यो वचन मकहाँ आयो:

²“ए मानिसको छोरो, टुरोस सहरको विषयमा विलाप गर्‌।

³समुद्रको ढोकामा हुने, समुद्र-किनारमा बस्‍ने धेरै मानिसहरूका व्‍यापार गर्ने टुरोस सहरलाई भन्, ‘परमप्रभु परमेश्‍वर यसो भन्‍नुहुन्‍छ: “‘ए टुरोस, तँ भन्‍छस्, “म सर्वाङ्गसुन्‍दरी छु।”

⁴तेरा राज्‍य समुद्रमा नै थियो। तँलाई निर्माण गर्नेहरूले तँलाई सर्वाङ्गसुन्‍दरी बनाए।

⁵तिनीहरूले तेरा सबै काठपातहरू सेनीरका सल्‍लाका काठहरूबाट बनाए। तिनीहरूले तेरा लागि मस्‍तूल बनाउनलाई लेबनानको देवदारु लिए।

⁶तेरा पतवारहरू तिनीहरूले बाशानका फलाँटका बनाए। साइप्रसका समुद्र-किनारहरूबाट ल्‍याएका धूपीका काठले तिनीहरूले जहाजका तला बनाए, र त्‍यसलाई हस्‍ती-हाड़ले मोहोरे।

⁷तेरो जहाजको पाल मिश्रदेशको मिहीन बुट्टादार सूती कपड़ाको थियो। त्‍यसैले तेरो झन्‍डाको काम दियो। एलीशाहको समुद्र-किनारका नीलो र बैजनी रङ्गका कपड़ाको तेरो चँदुवा थियो।

⁸सीदोन र अर्वादका मानिसहरू तेरा पतवार चलाउनेहरू थिए। हे टुरोस, तेरा निपुण मानिसहरू तेरा नावीहरू थिए।

⁹गबालका अनुभवी कारीगरहरू तँसित जहाजमा थिए। तिनीहरू नै जहाजका छेड़हरू मरम्‍मत गर्ने तेरा मानिसहरू थिए। तेरा मालसामानहरू व्‍यापार गर्नलाई समुद्रका सबै जहाज र तिनका नावीहरू तेरै छेउमा आउँथे।

¹⁰“‘फारस, लूद र पूतका मानिसहरू तेरो सेनामा सिपाहीका काम गर्थे, तिनीहरूले आ-आफ्‍ना ढाल र टोप तँभित्रै टाँगेर तेरो गौरव बढ़ाइदिए।

¹¹अर्वाद र हेलेकका मानिसहरू तेरा चारैतिरका पर्खालमाथि खड़ा भई गस्‍ती लाउँथे। गमादका मानिसहरू तेरा धरहरामा थिए। तिनीहरूले आ-आफ्‍ना ढाल तेरा चारैतिरका पर्खालमा टाँग्‍थे, र तिनीहरूले तेरो सुन्‍दरतालाई बढ़ाइदिन्‍थे।

¹²“‘तँसँग सरसामानका ठूलो धनसम्‍पत्ति भएको कारण तर्शीशले तँसित व्‍यापार गर्‍यो। तिनीहरूले तेरा व्‍यापारका मालसामानसित चाँदी, फलाम, जस्‍ता र सीसा साटे।

¹³“‘ग्रीस, तूबल र मेशेकले तँसित व्‍यापार गरे। तिनीहरूले आफ्‍ना कमारा-कमारीहरू र काँसाका भाँड़ाहरू तेरा व्‍यापारका मालसामानसित साटे।

¹⁴“‘तेरा व्‍यापारका सामानहरूसित बेथ-तोगर्माका मानिसहरूले मालसामान बोक्‍ने घोड़ा, युद्धका घोड़ा र खच्‍चरहरू साटे।

¹⁵“‘रोडसका मानिसहरूले तँसित व्‍यापार गरे, र समुद्र-किनारका धेरै देशहरू तेरा आफ्‍नै ग्राहक भए। तिनीहरूले तँलाई हात्तीका दाँत र अब्‍नुसको काठ दाम स्‍वरूप दिए।

¹⁶“‘धेरै उत्‍पादनको कारण अरामले तँसित व्‍यापार गर्‍यो। तेरा व्‍यापारका मालसामानको सट्टा तिनीहरूले तँलाई फिरोजा, बैजनी रङ्गले बुनेका लुगा र बुट्टा भरिएका कपड़ा, मलमलका कपड़ा, मूगा-मोती र मानिक दिए।

¹⁷“‘यहूदा र इस्राएलले तँसित व्‍यापार गरे। तेरा व्‍यापारका मालसामानहरूका सट्टामा तिनीहरूले तँलाई मिन्‍नीतको गहूँ, रोटी, मह, तेल र लेप दिए।

¹⁸“‘तेरा हरकिसिमका मालसामान र धेरै धन-सम्‍पत्तिको कारण दमस्‍कसले तँसित व्‍यापार गर्‍यो। तिनीहरूले तेरा मालसामानको सट्टा हेलबोनको दाखमद्य र जाहारको ऊन साटे।

¹⁹“‘ऊजालका दानवंशी र ग्रीकहरूले तेरा व्‍यापारका सामानहरू ल्‍याउँथे। तिनीहरूले तिनका सट्टामा फलाम, तेजपात र बोझो साट्‌थे।

²⁰“‘ददानले तँसित घोड़ाका जीनपोशको व्‍यापार गर्थ्‍यो।

²¹“‘अरब देश र केदारका सबै राजकुमारहरू तेरा ग्राहक थिए। तिनीहरूले थुमा, भेड़ा र बाख्राका व्‍यापार तँसित गर्थे।

²²“‘शेबा र रामाहका व्‍यापारीहरूले तँसित व्‍यापार गर्थे। तिनीहरूले तेरा मालसामानहरूका सट्टामा सबै किसिमका असल-असल मसला, सबै किसिमका बहुमूल्‍य रत्‍नहरू र सुन साट्‌थे।

²³“‘हारान, कन्‍नेह र अदन, अनि शेबा, अश्‍शूर र किल्‍मदका व्‍यापारीहरूले तँसित व्‍यापार गर्थे।

²⁴तेरा बजारमा सुन्‍दर-सुन्‍दर पोशाकहरू, नीलो धागोले बनाएका लुगा, बुट्टादार कपड़ाहरू, डोरीहरूले बाँधिएका किसिम-किसिमका रङ्गका गलैँचाहरू, यिनै चीजहरूको तिनीहरूले तँसित व्‍यापार गर्थे।

²⁵“‘तर्शीशका जहाजहरू तेरा व्‍यापार गर्ने सेवकहरूजस्‍तै छन्‌। समुद्रका बीचमा गह्रौँ-गह्रौँ व्‍यापारका मालसामानले तँ भरिपूर्ण र खचाखच भएका छस्‌।

²⁶तेरा नाविकहरूले तँलाई मध्‍य-समुद्रमा लान्‍छन्, तर पूर्वीय बतासले तँलाई समुद्रकै बीचमा ध्‍वंस पार्नेछ।

²⁷तेरा धन-सम्‍पत्ति, तेरा व्‍यापारका मालसामान, तेरा माझीहरू र तेरा नावीहरू, जहाजका छेड़ टालटुल गर्नेहरू, तेरा व्‍यापारीहरू र तेरा योद्धाहरू, र जहाजमा हुने अरू सबै जना तेरो जहाजका सर्वनाशको दिनमा मध्‍य-समुद्रमा डुब्‍नेछन्‌।

²⁸तेरा नावीहरूका चित्‍कारको आवाजले तेरा किनारहरू काम्‍नेछन्‌।

²⁹र खियाउनेहरू सबैले आ-आफ्‍नो जहाजलाई त्‍यागिदिनेछन्‌। माझी र नावीहरू सबै किनारमा खड़ा हुनेछन्‌।

³⁰तेरो लागि तिनीहरू उच्‍च सोरले कराएर धुरुधुरु रुनेछन्‌। तिनीहरूले आफ्‍ना टाउकोमा धूलो छर्नेछन्, र खरानीमा लड़ीबड़ी गर्नेछन्‌।

³¹तेरो कारण तिनीहरूले आफ्‍नो कपाल मुण्‍डन गर्नेछन्, र तिनीहरूले भाङ्‌ग्रा लाउनेछन्, र तेरो निम्‍ति हृदयमा पीर लिएर साह्रै शोक गरी रुनेछन्‌।

³²तेरो निम्‍ति विलाप र शोक गरिरहँदा, तिनीहरूले तेरो विषयमा यसो भनेर विलाप गर्नेछन्, “समुद्रले घेरेको टुरोसजस्‍तै को कहिले चूपचाप बनाइएको थियो र?”

³³जब समुद्रमा तेरा व्‍यापारका मालसामानहरू जान्‍थे, तब तैंले धेरै जातिहरूलाई सन्‍तुष्‍ट गराइस्, तेरा धेरै धन-सम्‍पत्ति र व्‍यापारका मालहरूले तैंले पृथ्‍वीका राजाहरूलाई धनी तुल्‍याइस्‌।

³⁴अब पानीको गहिराइमा समुद्रले नै तँलाई ध्‍वंस गरेको छ। तेरा व्‍यापारका मालहरू र तेरा सबै दल तँसँगसँगै डुबेका छन्‌।

³⁵समुद्र-किनारमा बस्‍ने सबै तँलाई देखेर तर्सेका छन्‌। तिनीहरूका राजाहरू साह्रै तर्सेर काँप्‍छन्, तिनीहरूका मोहड़ा त्रासले चाउरिएका छन्‌।

³⁶जाति-जातिहरूका व्‍यापारीहरूले तँलाई खिसी गर्छन्‌। तँ फेरि कहिल्‍यै रहनेछैनस्, अब तेरो भयङ्कर अन्‍त्‍य आइपुग्‍यो’।”