Read Nepali New Revised Version, 2012 इजकिएल 28 Bible Online

इजकिएल 28 - Nepali New Revised Version, 2012 bible

इजकिएल 28

¹परमप्रभुको यो वचन मकहाँ आयो:

²“हे मानिसको छोरो, टुरोसको शासकलाई भन्, ‘परमप्रभु परमेश्‍वर यसो भन्‍नुहुन्‍छ: “तेरो हृदयको घमण्‍डमा तँ भन्‍छस्, ‘म एउटा देवता हुँ। म समुद्रको बीचमा एउटा देवताको सिंहासनमा बस्‍तछु!’ तर तँ त एक जना मानिस मात्र होस्, देवता होइनस्, यद्यपि तैंले आफैलाई एक देवता जत्तिकै बुद्धिमान्‌ सम्‍झन्‍छस्‌।

³के तँ दानिएलभन्‍दा पनि बुद्धिमान्‌ छस्‌? के तँबाट कुनै गुप्‍त कुरा लुकिएको छैन र?

⁴तेरो बुद्धि र समझशक्तिले तैंले आफ्‍नो निम्‍ति धेरै धन-सम्‍पत्ति प्राप्‍त गरेको छस्, र तैंले आफ्‍ना भण्‍डारहरूमा सुन र चाँदी थुपारेको छस्‌।

⁵व्‍यापारमा ठूलो निपुणता देखाएर तैंले आफ्‍नो धन-सम्‍पत्ति बढ़ाएको छस्, र तेरो धन-सम्‍पत्तिको कारण तेरो हृदय घमण्‍डले फुलेको छ।

⁶“‘यसकारण परमप्रभु परमेश्‍वर यसो भन्‍नुहुन्‍छ: “‘तैंले आफूलाई एउटा देवताजत्तिकै बुद्धिमान्‌ ठान्‍छस्,

⁷यसकारण जाति-जातिहरूमा सबैभन्‍दा क्रूर विदेशीहरूलाई म तँकहाँ ल्‍याउनेछु। तिनीहरूले आफ्‍ना तरवार तेरो सौन्‍दर्य र बुद्धिको विरुद्धमा थुत्‍नेछन्, र तेरो चमत्‍कारपूर्ण गौरवलाई वारपार छेड्‌नेछन्‌।

⁸तिनीहरूले तँलाई मृत-लोकमा पुर्‍याउनेछन्, र हिंसक वेगसित तँ समुद्रमा मर्नेछस्‌।

⁹तब तँलाई मार्नेहरूका सामुन्‍ने के तँ अझै पनि “म देवता हुँ” भन्‍नेछस्‌ र? तँलाई मार्नेहरूका हातमा तँ मानिस मात्र हुनेछस्, एक देवता होइन।

¹⁰विदेशीहरूका हातमा तँ बेखतनाको मृत्‍युमा मर्नेछस्‌। मैले यो भनेको छु, परमप्रभु परमेश्‍वर भन्‍नुहुन्‍छ’।”

¹¹परमप्रभुको यो वचन मकहाँ आयो:

¹²“हे मानिसको छोरो, टुरोसका राजाको विषयमा विलाप गर्, र त्‍यसलाई भन्‌: ‘परमप्रभु परमेश्‍वर यसो भन्‍नुहुन्‍छ: “‘तँ त सिद्धताको एक नमूना थिइस्, र बुद्धिले पूर्ण सर्वाङ्गसुन्‍दर।

¹³परमेश्‍वरको बगैँचा अदनमा तँ थिइस्‌। हरेक बहुमूल्‍य पत्‍थरले तँ सिँगारिएको थिइस्‌— मानिक, पुष्‍पराज, पन्‍ना, पीतमणि, आनिक्‍स, बिल्‍लौर, नीर, फिरोजा र बेरूजले तँ आभूषित थिइस्‌। तेरा मणिघरहरू सुनले मोहोरिएका थिए, तँ सृजेको दिनमा नै ती तयार पारिएका थिए।

¹⁴अभिभावक करूब हुनलाई तँ अभिषेक गरिएको थिइस्, किनकि त्‍यसरी नै मैले तँलाई नियुक्त गरेको थिएँ। परमेश्‍वरको पवित्र पर्वतमा तँ थिइस्‌। अग्‍निमय पत्‍थरहरूका बीचमा तँ हिँड्‌थिस्‌।

¹⁵तँ सृजिएको दिनदेखि तँमा अधर्म फेला नपरेको दिनसम्‍म, तेरो चाल-ढङ्गमा तँ दोषरहित थिइस्‌।

¹⁶तेरा चारैतिरका व्‍यापारद्वारा तँ उपद्रवले भरिइस्, र तैंले पाप गरिस्‌। यसैले मैले तँलाई परमेश्‍वरको पर्वतबाट अपमान गरी खेदिदिएँ, र हे अभिभावक करूब, मैले तँलाई अग्‍निमय पत्‍थरहरूका बीचदेखि धपाइदिएँ।

¹⁷तेरो सुन्‍दरताले गर्दा तेरो हृदय घमण्‍डले फुलियो, तैंले आफ्‍नो गौरवको कारण तेरो बुद्धिलाई भ्रष्‍ट पारिस्‌। यसैले मैले तँलाई जमिनमा फालिदिएँ। राजाहरूका अगि मैले तँलाई तमाशा बनाइदिए।

¹⁸तेरा धेरै पापहरू र बेईमान व्‍यापारद्वारा तैंले तेरा पवित्रस्‍थानहरूलाई बिटुलो पारेको छस्‌। यसैले गर्दा मैले तँबाटै एउटा आगो निकालिदिएँ, र त्‍यसले नै तँलाई भस्‍म पार्‍यो। तँलाई नियालेर हेर्नेहरू सबैका दृष्‍टिमा मैले तँलाई जमिनमा खरानी तुल्‍याइदिएँ।

¹⁹जाति-जातिहरूमा तँलाई चिन्‍नेहरू तँलाई देखेर भयभीत हुन्‍छन्‌। तँ एक डरलाग्‍दो अन्‍त्‍यमा आइपुगेको छस्, र तँ फेरि कहिल्‍यै रहनेछैनस्‌।

²⁰परमप्रभुको यो वचन मकहाँ आयो:

²¹“हे मानिसको छोरो, सीदोनतिर तेरो मुख फर्का, र त्‍यसको विरुद्धमा यो अगमवाणी गर्,

²²र भन्‌: परमप्रभु परमेश्‍वर यसो भन्‍नुहुन्‍छ: “‘हे सीदोन, म तेरो विरुद्धमा छु, तँभित्रै म महिमा प्राप्‍त गर्नेछु। जब म त्‍यसलाई दण्‍ड दिनेछु, र मेरो पवित्रता त्‍यसभित्रै प्रकट गर्नेछु, तब तिनीहरूले म नै परमप्रभु हुँ भनी जान्‍नेछन्‌।

²³म त्‍यसमाथि एउटा रूढ़ी पठाउनेछु, र त्‍यसका गल्‍लीहरूमा म रगत बगाउनेछु। त्‍यसका चारैतिर त्‍यसको विरुद्धमा भएको तरवारले मारिएकाहरू त्‍यसभित्रै ढल्‍नेछन्‌। तब म नै परमप्रभु हुँ भनी तिनीहरूले जान्‍नेछन्‌।

²⁴“‘इस्राएलका मानिसहरूलाई द्वेष गर्ने छिमेकीहरू, जो दु:ख दिने सिउँड़ी र तीखा काँढ़ाहरू हुन्, ती अब कहिल्‍यै हुनेछैनन्‌। तब तिनीहरूले म नै परमप्रभु परमेश्‍वर हुँ भनी जान्‍नेछन्‌।

²⁵“‘परमप्रभु परमेश्‍वर यसो भन्‍नुहुन्‍छ: तिनीहरू छरपष्‍ट भएका जाति-जातिहरूबाट जब इस्राएलका मानिसहरूलाई म भेला गर्छु, तब तिनीहरूका बीचमा म जाति-जातिहरूका दृष्‍टिमा आफैलाई पवित्र गर्नेछु। अनि मेरो दास याकूबलाई मैले दिएको तिनीहरूको आफ्‍नै देशमा तिनीहरू बस्‍नेछन्‌।

²⁶तिनीहरू त्‍यहाँ सुरक्षित रहनेछन्, र तिनीहरूले घरहरू बनाउनेछन्‌ र दाखबारी लगाउनेछन्‌। तिनीहरूलाई घृणा गर्ने सबैलाई म दण्‍ड दिन्‍छु, तब तिनीहरू त्‍यहाँ सुरक्षित रहनेछन्‌। तब तिनीहरूले म नै परमप्रभु तिनीहरूका परमेश्‍वर हुँ भनी जान्‍नेछन्‌’।”