Read Nepali New Revised Version, 2012 इजकिएल 29 Bible Online

इजकिएल 29 - Nepali New Revised Version, 2012 bible

इजकिएल 29

¹दशौँ वर्षको दशौँ महिनाको बाह्रौँ दिनमा परमप्रभुको यो वचन मकहाँ आयो:

²“हे मानिसको छोरो तेरो, मुख मिश्रदेशको राजा फारोतिर फर्काएर त्‍यसको र सारा मिश्रदेशको विरुद्धमा अगमवाणी भन्‌।

³त्‍योसँग कुरा गर्‌ र त्‍यसलाई भन्‌: ‘परमप्रभु परमेश्‍वर यसो भन्‍नुहुन्‍छ: “‘हे मिश्रदेशको राजा फारो, म तेरो विरुद्धमा छु, आफ्‍ना खोलाहरूका बीचमा पड़िरहने, तँ ठूलो अजिङ्गर, तँ भन्‍छस्, “नील नदी मेरै हो, त्‍यो मैले नै बनाएँ।”

⁴तर म तेरो मुखमा बल्‍छी लगाउनेछु, तेरै कत्‍लाहरूमा तेरा खोलाका माछाहरू, म टाँस्‍न लाउनेछु। तेरा कत्‍लाहरूमा टाँसिएका ती माछाहरूसमेत, म तँलाई तेरा खोलाहरूका बीचबाट तानेर निकाल्‍नेछु।

⁵तँ र तेरा खोलाका सबै माछाहरूलाई म मरुभूमिमा छोड़िदिनेछु। तँ खुला मैदानमा लोट्‌नेछस्‌। तँलाई कसैले जम्‍मा गरेर उठाउनेछैन। म तँलाई पृथ्‍वीका पशुहरू र आकाशका पक्षीहरूको आहारा तुल्‍याइदिनेछु।

⁶तब मिश्रदेशमा बस्‍नेहरू सबैले म नै परमप्रभु हुँ भनी जान्‍नेछन्‌। “‘तँ इस्राएलका घरानाको निम्‍ति एउटा नर्कटको लट्ठी भएको छस्‌।

⁷जब तिनीहरूले तँलाई समात्‍थे, तब तँ भाँचिन्‍थिस्, र तिनीहरूका काँधमा चोटै-चोट हुन्‍थ्‍यो। तिनीहरू तँमा आड़ लिँदा, तँ भाँचिन्‍थिस्, र तिनीहरूका ढाड़ मर्किन्‍थ्‍यो।

⁸“‘यसैकारण परमप्रभु परमेश्‍वर भन्‍नुहुन्‍छ: म तेरो विरुद्धमा तरवार चलाउनेछु, तेरा मानिसहरू र पशुहरू दुवैलाई म मार्नेछु।

⁹मिश्रदेश शून्‍य र उजाड़ हुनेछ। तब तिनीहरूले म नै परमप्रभु हुँ भनी जान्‍नेछन्‌। “‘तैंले भनिस्, “नील नदी मेरै हो, मैले नै त्‍यो बनाएको हुँ।”

¹⁰यसैकारण म तेरो विरुद्धमा र तेरा खोलाहरूका विरुद्धमा छु, र मिग्‍दोलदेखि आश्‍वानसम्‍म, मिश्रदेशलाई कूश देशको सिमानासम्‍मै बिलकुल शून्‍य र भग्‍नावशेष तुल्‍याइदिनेछु।

¹¹कुनै मानिस वा पशुको खुट्टाले त्‍यहाँ टेक्‍नेछैन। चालीस वर्षसम्‍म त्‍यहाँ कोही बस्‍नेछैन।

¹²म मिश्रदेशलाई नष्‍ट भएका देशहरूका बीचमा उजाड़ पारिदिनेछु, र त्‍यसका सहरहरू भग्‍नावशेष भएका सहरहरूका बीचमा चालीस वर्षसम्‍मै उजाड़ रहनेछन्‌। अनि म मिश्रीहरूलाई जाति-जातिहरूका बीचमा छरपष्‍ट र देश-देशमा तितरबितर पारिदिनेछु।

¹³“‘तापनि परमप्रभु परमेश्‍वर यसो भन्‍नुहुन्‍छ: चालीस वर्षको अन्‍तमा म मिश्रीहरूलाई तिनीहरू छरपष्‍ट भएका जाति-जातिहरूका बीचबाट भेला गर्नेछु।

¹⁴म तिनीहरूलाई कैदबाट फर्काई ल्‍याउनेछु, र तिनीहरूका पिता-पुर्खाहरूको देश, माथिल्‍लो मिश्रमा तिनीहरूलाई ल्‍याउनेछु। तिनीहरू त्‍यहाँ एक तुच्‍छ राज्‍य भएर बस्‍नेछन्‌।

¹⁵त्‍यो सारा राज्‍यहरूमा सबैभन्‍दा तुच्‍छ राज्‍य हुनेछ। अरू जातिहरूमाथि त्‍यो फेरि कहिल्‍यै उच्‍च हुनेछैन। म त्‍यसलाई यति कमजोर तुल्‍याइदिनेछु, कि फेरि कहिल्‍यै अरू जातिहरूमाथि त्‍यसले राज्‍य गर्नेछैन।

¹⁶इस्राएलका मानिसहरूका निम्‍ति मिश्रदेश फेरि कहिल्‍यै भरोसाको स्रोत बन्‍नेछैन। तर त्‍यहाँ तिनीहरू सहायता माग्‍न गएर तिनीहरूले गरेको आफ्‍नो पापको सम्‍झना त्‍यसले तिनीहरूलाई गराउनेछ। तब तिनीहरूले म नै परमप्रभु परमेश्‍वर हुँ भनी जान्‍नेछन्‌’।”

¹⁷सत्ताईसौँ वर्षको पहिलो महिनाको पहिलो दिनमा परमप्रभुको यो वचन मकहाँ आयो:

¹⁸“हे मानिसको छोरो, बेबिलोनको राजा नबूकदनेसरले टुरोसको विरुद्धमा आफ्‍नो सेनालाई युद्धको धावा गर्‍यो। हरेकको तालु खुइलियो, र हरेकको काँध दलिँदा-दलिँदा पिल्‍सियो। तापनि टुरोसको विरुद्धमा गरेको परिश्रमको सट्टा त्‍यसले र त्‍यसको सेनाले केही इनाम पाउन सकेनन्‌।

¹⁹यसकारण परमप्रभु परमेश्‍वर यसो भन्‍नुहुन्‍छ: ‘म मिश्रदेशलाई बेबिलोनको राजा नबूकदनेसरको हातमा सुम्‍पिदिनेछु, र त्‍यसले त्‍यसका धन-सम्‍पत्ति लैजानेछ। लूटपीट गरेर त्‍यसले देशलाई सखाप पार्नेछ, र लूटेको त्‍यो धन त्‍यसको सेनाको ज्‍याला हुनेछ।

²⁰त्‍यसले गरेको परिश्रमको निम्‍ति मिश्रदेश नै मैले त्‍यसलाई इनाम स्‍वरूप दिएको छु, किनभने त्‍यसले र त्‍यसका सेनाले मेरै निम्‍ति परिश्रम गरे, परमप्रभु परमेश्‍वर यसो भन्‍नुहुन्‍छ।

²¹“त्‍यस दिन म इस्राएलका घरानाको निम्‍ति एउटा सीङ उमार्नेछु, र तिनीहरूका बीचमा म तेरो मुख खोलिदिनेछु। तब तिनीहरूले म नै परमप्रभु हुँ भनी जान्‍नेछन्‌।”