Read Nepali New Revised Version, 2012 इजकिएल 30 Bible Online

इजकिएल 30 - Nepali New Revised Version, 2012 bible

इजकिएल 30

¹परमप्रभुको यो वचन मकहाँ आयो:

²“हे मानिसको छोरो, यो अगमवाणी गरेर भन्‌: ‘परमप्रभु परमेश्‍वर यसो भन्‍नुहुन्‍छ: “‘विलाप गर्, र भन्, “हाय! त्‍यो दिन।”

³किनकि त्‍यो दिन नजिकै छ, परमप्रभुको दिन नजिकै छ— बादल लागेको दिन, जाति-जातिहरूका अन्‍त्‍यको दिन त्‍यो हुनेछ।

⁴मिश्रदेशमाथि एउटा तरवार आउनेछ, र कूश देशमा पनि सङ्कष्‍ट आइपर्नेछ। जब मिश्रदेशमा मारिएका मानिसहरू जमिनमा ढल्‍नेछन्, तब त्‍यसका धन-सम्‍पत्तिहरू लगिनेछन्, र त्‍यसका जगहरू भत्‍काइनेछन्‌।

⁵कूश, पूत, लूद र सारा अरब देश, लिबिया, र करार गरिएका देशका मानिसहरू, मिश्रदेशसँगसँगै तरवारले ढालिनेछन्‌।

⁶“‘परमप्रभु यसो भन्‍नुहुन्‍छ: “‘मिश्रदेशका मित्रराष्‍ट्रहरूचाहिँ पतन हुनेछन्, त्‍यसको घमण्‍डी शक्तिको पतन हुनेछ। मिग्‍दोलदेखि आश्‍वानसम्‍मै त्‍यसभित्र भएका सबै तरवारले ढालिनेछन्, परमप्रभु परमेश्‍वर यसो भन्‍नुहुन्‍छ।

⁷उजाड़ भएका देशहरूका माझमा तिनीहरू उजाड़ हुनेछन्, र त्‍यसका सहरहरू भग्‍नावशेष भएका सहरहरूका बीचमा पड़िरहनेछन्‌।

⁸जब म मिश्रदेशमा आगो लगाइदिनेछु, र त्‍यसका सबै सहायकहरू चकनाचूर हुनेछन्, तब तिनीहरूले म नै परमप्रभु हुँ भनी जान्‍नेछन्‌।

⁹“‘त्‍यस दिन सन्‍तुष्‍टसँग बसेका कूशीहरूलाई तर्साउने खबर दिनलाई मकहाँबाट समाचारवाहकहरू जानेछन्‌। मिश्रदेशको अन्‍त्‍यको दिनमा तिनीहरूलाई त्रास हुनेछ, किनभने त्‍यो निश्‍चय नै आइपर्नेछ।

¹⁰“‘परमप्रभु परमेश्‍वर यसो भन्‍नुहुन्‍छ: “‘म बेबिलोनको राजा नबूकदनेसरको हातद्वारा मिश्रदेशका सैन्‍य-दलहरूलाई अन्‍त्‍य गरिदिनेछु।

¹¹त्‍यो र त्‍यसको सेना जाति-जातिहरूमा सबैभन्‍दा क्रूर तिनीहरू सर्वनाश गर्नलाई ल्‍याइनेछन्‌। तिनीहरूले आफ्‍ना तरवार मिश्रदेशको विरुद्धमा थुत्‍नेछन्, र तिनीहरूले मृतकहरूले देश भरिदिनेछन्‌।

¹²म नील नदीका पानीहरू सुकाइदिनेछु, र म त्‍यस देशलाई दुष्‍ट मानिसहरूका हातमा बेचिदिनेछु। त्‍यो देश र त्‍यसमा भएका सारा थोकहरूलाई म विदेशीहरूका हातद्वारा उजाड़ पारिदिनेछु। म परमप्रभुले यो भनेको हुँ।

¹³“‘परमप्रभु परमेश्‍वर यसो भन्‍नुहुन्‍छ: “‘म मूर्तिहरूको सर्वनाश गरिदिनेछु, र नोपमा भएका प्रतिमाहरूको अन्‍त्‍य गरिदिनेछु। मिश्रदेशमा फेरि कहिल्‍यै राजकुमार हुनेछैन, र यसरी म देशमा डर फैलाइदिनेछु।

¹⁴माथिल्‍लो मिश्रलाई म उजाड़ पारिदिनेछु, सोअनमा आगो लगाइदिनेछु, नो सहरलाई म दण्‍ड दिनेछु।

¹⁵म मिश्रदेशको किल्‍ला, पेलुसियममाथि मेरो क्रोध खन्‍याउनेछु, र नो सहरका सैन्‍य-दलहरूलाई नष्‍ट पार्नेछु।

¹⁶म मिश्रदेशमा आगो लगाइदिनेछु, र पेलुसियम पीडाले छटपटिनेछ, नो सहरका पर्खालहरूमा धाँदा पारिनेछन्, नोपचाहिँ निरन्‍तर कष्‍टमा परिरहनेछ।

¹⁷हेलीओपोलिस र बुबास्‍तीसका जवान मानिसहरू तरवारद्वारा मारिनेछन्, र सहरहरू स्‍वयम्‌ कैदमा पर्नेछन्,

¹⁸तहपनेसमा जब म मिश्रदेशको जुवा भाँचिदिनेछु, तब त्‍यो दिन अँध्‍यारो हुनेछ, र त्‍यसको घमण्‍डी शक्तिको अन्‍त्‍य हुनेछ। त्‍यो बादलहरूले ढाकिनेछ, र त्‍यसका गाउँहरू कैदमा पर्नेछन्‌।

¹⁹यसरी म मिश्रदेशलाई दण्‍ड दिनेछु, र तिनीहरूले म नै परमप्रभु हुँ भनी जान्‍नेछन्‌’।”

²⁰एघारौँ वर्षको पहिलो महिनाको सातौँ दिनमा परमप्रभुको यो वचन मकहाँ आयो:

²¹“हे मानिसको छोरा, मैले मिश्रदेशको राजा फारोको हात भाँचिदिएको छु। निको भई बलियो भएर फेरि तरवार चलाउनलाई मलहमपट्टीले त्‍यो बाँधिएको छैन।

²²यसकारण परमप्रभु परमेश्‍वर यसो भन्‍नुहुन्‍छ: म मिश्रदेशको राजा फारोको विरुद्धमा छु। म त्‍यसका हातहरू भाँचिदिनेछु, राम्रो र भाँचिएको दुवै, अनि म त्‍यसको तरवार त्‍यसको हातबाट खसाइदिनेछु।

²³म मिश्रीहरूलाई जाति-जातिहरूका बीचमा छरपष्‍ट पारिदिनेछु, र तिनीहरूलाई देश-देशमा तितरबितर पारिदिनेछु।

²⁴म बेबिलोनको राजाका हात शक्तिशाली बनाइदिनेछु, र मेरो तरवार त्‍यसको हातमा दिनेछु। तर म फारोका हात भाँचिदिनेछु, र त्‍योचाहिँ त्‍यसको अगि मरणान्‍त चोट लागेको मानिसझैँ पीडाले कराउनेछ।

²⁵म बेबिलोनको राजाका हात शक्तिशाली बनाइदिनेछु, तर फारोका हात निर्बल हुनेछन्‌। जब म बेबिलोनका राजाको हातमा मेरो तरवार दिनेछु, र त्‍यसले त्‍यो मिश्रदेशको विरुद्धमा चलाउनेछ, तब तिनीहरूले म नै परमप्रभु हुँ भनी जान्‍नेछन्‌।

²⁶म मिश्रीहरूलाई जाति-जातिहरूका बीचमा छरपष्‍ट पारिदिनेछु, र तिनीहरूलाई देश-देशहरूमा तितरबितर पारिदिनेछु। तब तिनीहरूले म नै परमप्रभु हुँ भनी जान्‍नेछन्‌।”