Read Nepali New Revised Version, 2012 इजकिएल 36 Bible Online

इजकिएल 36 - Nepali New Revised Version, 2012 bible

इजकिएल 36

¹“हे मानिसको छोरा, इस्राएलका पहाड़हरूलाई यो अगमवाणी कहेर भन्, ‘हे इस्राएलका पहाड़हरू हो, परमप्रभुको वचन सुन।

²परमप्रभु परमेश्‍वर यसो भन्‍नुहुन्‍छ: शत्रुले तिमीहरूका विषयमा भन्‍यो, “अहा! अब ती प्राचीन पहाड़हरूमा हाम्रै अधिकार भयो’।”

³यसकारण अगमवाणी कहेर भन्, ‘परमप्रभु परमेश्‍वर यसो भन्‍नुहुन्‍छ: तिनीहरूले तिमीहरूलाई हरेक ठाउँबाट बरबाद गरेर कुकुरहरूले जस्‍तै खेदे, फलस्‍वरूप तिमीहरू अरू बाँकी जातिहरूको अधिकारमा परेर मानिसहरूका ईर्ष्‍या र निन्‍दाका पात्र भयौ।

⁴यसैकारण हे इस्राएलका पहाड़हरू हो, परमप्रभु परमेश्‍वरको वचन सुन। पहाड़हरू र डाँड़ाहरू, खोल्‍साहरू र बेँसीहरू, उजाड़ भएका भग्‍नावशेषहरू र निर्जन सहरहरू, जसलाई तिमीहरूका चारैतिर भएका जातिहरूद्वारा हाँसोमा उड़ाएका थिए—

⁵तिमीहरूलाई नै परमप्रभु परमेश्‍वर यसो भन्‍नुहुन्‍छ: मेरो दन्‍केको जोशमा मैले अरू बाँकी जातिहरू र एदोमका विरुद्धमा बोलेको छु, किनकि आफ्‍नो हृदयमा ईर्ष्‍या राखेर तिनीहरूले मेरो देशलाई आफ्‍नो अधिकार गरे, ताकि तिनीहरूले त्‍यसका खर्क लुट्‌न सकून्‌।’

⁶यसकारण इस्राएल देशको विषयमा अगमवाणी भन्, र त्‍यसका पहाड़हरू र डाँड़ाहरू, खोल्‍साहरू र बेँसीहरूलाई भन्‌: ‘परमप्रभु परमेश्‍वर यसो भन्‍नुहुन्‍छ: तिमीहरूले जातिहरूका गिल्‍ला सहनुपरेको हुनाले मैले डाही गरेर मेरो रीसमा म भन्‍दछु।

⁷यसकारण परमप्रभु परमेश्‍वर यसो भन्‍नुहुन्‍छ: तिमीहरूका चारैतिरका जाति-जातिहरूले पनि गिल्‍ला सहनुपर्नेछ। मेरो हात उठाएर म यो शपथ खान्‍छु।

⁸“‘तर तिमीहरू हे इस्राएलका पहाड़हरू हो, तिमीहरूले चाहिँ आफ्‍ना हाँगाहरू पलाउनेछौ र मेरो प्रजा इस्राएलको लागि फलहरू फलाउनेछौ, किनकि तिनीहरू चाँड़ै घर फर्कनेछन्‌।

⁹तिमीहरूको मलाई चिन्‍ता लागेको छ। म तिमीहरूलाई निगाहा गर्नेछु। म तिमीहरूलाई खनजोत गरेर बीउ छर्नेछु।

¹⁰धेरै मानिसहरूको संख्‍याले म तिमीहरूलाई भरिभराउ पार्नेछु, अर्थात्‌ इस्राएलका समस्‍त घरानालाई। सहरहरूमा फेरि मानिसहरू बास गर्नेछन्, र भग्‍नावशेष भएका भवनहरू फेरि निर्माण गरिनेछन्‌।

¹¹म तिमीहरूका मानिसहरू र पशुहरूको वृद्धि गरिदिनेछु, र तिनीहरू फलवन्‍त भएर धेरै हुनेछन्‌। अघिजस्‍तै तिमीहरूमा म मानिसहरू बसाल्‍नेछु, र पहिलेको भन्‍दा अझ बढ़ी तिमीहरूको उन्‍नति गराउनेछु। तब तिमीहरूले म नै परमप्रभु हुँ भनी जान्‍नेछौ।

¹²म मानिसहरू, मेरा मानिसहरू, अर्थात्‌ इस्राएललाई तिमीहरूकै बाटाहरूमा हिँड्‌न लाउनेछु। तिनीहरूले तिमीहरूलाई अधिकार गर्नेछन्, र तिमीहरू तिनीहरूको उत्तराधिकार हुनेछौ। तिमीहरूले कहिल्‍यै तिनीहरूका छोराछोरीहरूलाई खोसेर लानेछैनौ।

¹³“‘परमप्रभु परमेश्‍वर यसो भन्‍नुहुन्‍छ, ‘मानिसहरू तिमीहरूलाई भन्‍छन्, “तिमीहरू मानिसहरूलाई खान्‍छौ, र आफ्‍नो जातिलाई निर्वंश तुल्‍याउँछौ।”

¹⁴यसैकारण तिमीहरूले अब फेरि कहिल्‍यै मानिसहरूलाई खानेछैनौ, अथवा आफ्‍नो जातिलाई निर्वंश तुल्‍याउनेछैनौ, परमप्रभु परमेश्‍वर भन्‍नुहुन्‍छ।

¹⁵म तिमीहरूलाई जाति-जातिहरूका गिल्‍ला फेरि कहिल्‍यै सुन्‍न लाउनेछैनँ, न त तिमीहरूले मानिसहरूको निन्‍दा सहनुपर्नेछ, अथवा आफ्‍नो जातिको पतन हुन लाउनेछौ, परमप्रभु परमेश्‍वर भन्‍नुहुन्‍छ’।”

¹⁶फेरि परमप्रभुको यो वचन मकहाँ आयो:

¹⁷“हे मानिसको छोरा, जब इस्राएलीहरू आफ्‍नै देशमा बसेका थिए, तब तिनीहरूले त्‍यस देशलाई आफ्‍नो व्‍यवहार र कामहरूले बिटुलो पारे। तिनीहरूको व्‍यवहार मेरो दृष्‍टिमा एक स्‍त्रीको रजस्‍वलाको अशुद्धताजस्‍तै थियो।

¹⁸तिनीहरूले देशमा रगत बगाएका र आफ्‍ना मूर्तिहरूद्वारा त्‍यो बिटुलो पारेका हुनाले मैले मेरो क्रोध तिनीहरूमाथि खन्‍याएँ।

¹⁹मैले तिनीहरूलाई जाति-जातिहरूका बीचमा यत्रतत्र पारें, र तिनीहरू देश-देशमा छरपष्‍ट भएर छरिए। तिनीहरूका व्‍यवहार र कामहरूअनुसार मैले तिनीहरूको न्‍याय गरें।

²⁰अनि जब तिनीहरू ती जातिहरूका बीचमा गए, तब तिनीहरूले मेरो पवित्र नाउँलाई अपवित्र पारे, किनकि तिनीहरूका विषयमा यसो भनिएको थियो, ‘यिनीहरू त परमप्रभुको प्रजा हो, तापनि देशलाई तिनीहरूले छोड्‌नुपर्‍यो’।

²¹मेरो पवित्र नाउँको चिन्‍ता मलाई लागेको थियो, जुन नाउँलाई तिनीहरू गएका जाति-जातिहरूका बीचमा इस्राएलको घरानाले अपवित्र पारे।

²²“यसैकारण इस्राएलका घरानालाई भन्, ‘परमप्रभु परमेश्‍वर यसो भन्‍नुहुन्‍छ: हे इस्राएलका घराना हो, तिमीहरूकै खातिर म यी कामहरू गर्नेछैनँ, तर मेरो पवित्र नाउँको खातिर यी गर्नेछु, जुन नाउँलाई तिमीहरू गएका जाति-जातिहरूका बीचमा अपवित्र पारेका छौ।

²³म मेरो महान्‌ नाउँको पवित्रता देखाउनेछु, जो ती जातिहरूका बीचमा अपवित्र भएको छ, जुन नाउँ तिमीहरूले तिनीहरूका बीचमा अपवित्र पारेका छौ। जब म आफैलाई तिमीहरूद्वारा तिनीहरूका अगि पवित्र प्रकट गर्नेछु, तब जाति-जातिहरूले जान्‍नेछन्, कि म नै परमप्रभु हुँ, परमप्रभु परमेश्‍वर भन्‍नुहुन्‍छ।

²⁴“‘किनकि म जाति-जातिहरूबाट तिमीहरूलाई निकाल्‍नेछु, र सबै देशहरूबाट तिमीहरूलाई भेला गर्नेछु, र तिमीहरूलाई तिमीहरूको आफ्‍नै देशमा ल्‍याउनेछु।

²⁵म तिमीहरूमाथि शुद्ध पानी छर्किदिनेछु, र तिमीहरू शुद्ध हुनेछौ। तिमीहरूका सबै अशुद्धतादेखि र तिमीहरूका सबै मूर्तिहरूदेखि म तिमीहरूलाई शुद्ध तुल्‍याउनेछु।

²⁶म तिमीहरूलाई एउटा नयाँ हृदय दिनेछु, र तिमीहरूभित्र म नयाँ आत्‍मा हालिदिनेछु। तिमीहरूबाट ढुङ्गाको हृदय निकालेर म त्‍यसको सट्टामा तिमीहरूलाई मासुको हृदय दिनेछु।

²⁷अनि म मेरा आत्‍मा तिमीहरूमा हालिदिनेछु, र तिमीहरूलाई मेरा विधिहरू पालन गर्ने र मेरा नियमहरू होशियारीसाथ मान्‍ने तुल्‍याउनेछु।

²⁸मैले तिमीहरूका पिता-पुर्खाहरूलाई दिएको देशमा तिमीहरू रहनेछौ। तिमीहरू मेरा प्रजा हुनेछौ र म तिमीहरूका परमेश्‍वर हुनेछु।

²⁹तिमीहरूलाई अशुद्ध पार्ने सबै कुरादेखि म तिमीहरूलाई जोगाउनेछु। म आज्ञा दिनेछु, र अन्‍न प्रशस्‍त हुनेछ, र म तिमीहरूमाथि फेरि कहिल्‍यै अनिकाल पठाउनेछैनँ।

³⁰म रूखहरूका फललाई र खेतको अन्‍नलाई प्रशस्‍त तुल्‍याउनेछु, यतिसम्‍म कि अनिकालले गर्दा जातिहरूका बीचमा तिमीहरू फेरि कहिल्‍यै शर्ममा पर्नेछैनौ।

³¹तब तिमीहरूले आफ्‍ना दुष्‍ट चाल र खराब कामहरूको सम्‍झना गर्नेछौ, र आफ्‍ना पापहरू र घिनलाग्‍दा चालहरूको कारण तिमीहरू आफैलाई घृणा गर्नेछौ।

³²तिमीहरूकै खातिर मैले यी काम गरिरहेको होइनँ भन्‍ने कुराचाहिँ तिमीहरूले बुझेको म चाहन्‍छु, परमप्रभु परमेश्‍वर भन्‍नुहुन्‍छ। हे इस्राएलका घराना हो, तिमीहरूका चालचलनको कारण तिमीहरू लज्‍जित र अपमानित होओ।

³³“‘परमप्रभु परमेश्‍वर यसो भन्‍नुहुन्‍छ: ‘मैले तिमीहरूलाई तिमीहरूका सबै पापहरूदेखि शुद्ध पारेको दिन म तिमीहरूका सहरहरूलाई फेरि आबाद तुल्‍याउनेछु, र भग्‍नावशेष भएका ठाउँहरू पुनर्निर्माण गर्नेछु।

³⁴आवतजावत गर्नेहरूको दृष्‍टिमा उजाड़ै रहनुको सट्टा उजाड़ भएको जमिन फेरि अन्‍न उमार्नलाई खनजोत गरिनेछ।

³⁵मानिसहरूले भन्‍नेछन्, “यो जमिन जो उजाड़ थियो, अब अदनको बगैँचाजस्‍तै भएछ। ती उजाड़, सर्वनाश, र ध्‍वंस भएका सहरहरू अब किल्‍लाहरू र मानिसहरूले भरिएका छन्‌।”

³⁶तब तिमीहरूका चारैतिर बाँकी रहेका जातिहरूले जान्‍नेछन्, कि नष्‍ट पारिएका सहरहरूलाई म परमप्रभुले फेरि बनाइदिएको छु, र उजाड़ भएको जमिनलाई फेरि उर्वरा भूमिमा परिवर्तित गरिदिएको छु। म परमप्रभुले भनेको हुँ, र म यो गर्ने नै छु’।

³⁷“‘परमप्रभु परमेश्‍वर यसो भन्‍नुहुन्‍छ: इस्राएलका घरानाको बिन्‍ती म स्‍वीकार गर्नेछु, र तिनीहरूका निम्‍ति यो काम गरिदिनेछु: म तिनीहरूका मानिसहरूलाई भेड़ाहरूजस्‍तै असंख्‍य तुल्‍याइदिनेछु।

³⁸म तिनीहरूलाई यरूशलेममा तोकिएका चाड़हरूमा भेटीहरू चढ़ाइने भेड़ाहरूका बगाल जत्तिकै असंख्‍य तुल्‍याउनेछु। यसरी भग्‍नावशेष बनेका सहरहरू मानिसहरूका भीड़ले भरिनेछन्‌। तब तिनीहरूले म नै परमप्रभु हुँ भनी जान्‍नेछन्‌।”