Read Nepali New Revised Version, 2012 इजकिएल 40 Bible Online

इजकिएल 40 - Nepali New Revised Version, 2012 bible

इजकिएल 40

¹हामी निर्वासित भएको पच्‍चीसौँ वर्षको सुरुमा, महिनाको दशौँ दिनमा, यरूशलेम सहरको पतन भएको चौधौँ वर्षपछि त्‍यही दिन परमप्रभुको हात ममाथि पर्‍यो, र उहाँले मलाई त्‍यहाँ लानुभयो।

²परमेश्‍वरको दर्शनमा उहाँले मलाई यरूशलेममा लानुभयो, र एउटा अति अल्‍गो पर्वतमा मलाई राख्‍नुभयो। त्‍यसको दक्षिणपट्टि सहरका केही घरहरूजस्‍तै देखिन्‍थे।

³उहाँले मलाई त्‍यहाँ लानुभयो, र एक जना मानिसलाई त्‍यहाँ मैले देखें, जसको अनुहार काँसाजस्‍तै थियो। तिनको हातमा एउटा सूती डोरी र नाप्‍ने टाँगो लिएर तिनी मूल ढोकामा उभिरहेका मैले देखें।

⁴तिनले मलाई भने, “ए मानिसको छोरा, तेरो आँखाले हेर्, र कानले सुन्‌। म जे-जे तँलाई देखाउँछु सो ध्‍यानसित मनमा राख्, किनकि यसैको निम्‍ति तँ यहाँ ल्‍याइएको होस्‌। तैंले जे देख्‍छस्, ती सबै इस्राएलको घरानालाई बता।”

⁵मन्‍दिरका क्षेत्रको पूरै बाहिर चारैतिर घेरेको एउटा पर्खाल मैले देखें। ती मानिसको हातमा भएको नाप्‍ने टाँगोको लमाइ छ हात लामो थियो, अर्थात्‌ प्रत्‍येक हात एक हात र चार अङ्‌गुलको चौड़ाइ थियो। तिनले त्‍यो पर्खाल नापे। त्‍यो एक नाप्‍ने टाँगो मोटो र एक टाँगो अल्‍गो थियो।

⁶तब तिनी पूर्वतिर फर्केको मूल ढोकामा गए। त्‍यसका खुट्‌किलाबाट उक्‍लेर ढोकाको सँघार तिनले नापे। तिनले त्‍यो एक टाँगो गहिरो भेट्टाए।

⁷गारदहरू बस्‍ने कोठाहरू एक टाँगो लामो र एक टाँगो चौड़ा थिए। कोठाहरूका बीचबीचमा गारो पाँच-पाँच हात बाक्‍लो थियो। मन्‍दिरतिर फर्केको दलानको छेउमा भएको ढोकाको सँघार एक टाँगो थियो।

⁸तिनले मूल ढोकाको दलान नापे।

⁹त्‍यो आठ हात गहिरो थियो। त्‍यसका थामहरू दुई-दुई हात बाक्‍ला थिए। ढोकाको दलानचाहिँ मन्‍दिरतिर फर्केको थियो।

¹⁰पूर्वपट्टिको मूल ढोकाभित्र हरेक भित्तामा तीन-तीन वटा भित्री कोठाहरू थिए। ती तीनै वटा एउटै नापका थिए। तिनका हरेक गाराहरू एकै नापका थिए।

¹¹तब तिनले प्रवेशद्वारको चौड़ाइ नापे। त्‍यसको चौड़ाइ दश हात थियो, र त्‍यसको लमाइ तेह्र हात थियो।

¹²हरेक कोठाको अगाड़िपट्टि एक-एक हात अग्‍लो होचो गारो थियो। प्रत्‍येक कोठा छ हात वर्गाकारको थियो।

¹³तब तिनले प्रवेशद्वार हरेक कोठाका पछाड़िको भित्ताको टुप्‍पादेखि त्‍यसैको विपरीत टुप्‍पासम्‍म नापे। कौसीका बारको एक झ्‍यालदेखि त्‍यसको विपरीत झ्‍यालसम्‍म पच्‍चीस हात थियो।

¹⁴तिनले प्रवेशद्वारको भित्रपट्टिका गाराहरू चारैतिर नापे, र ती साठी हात थिए। यो नापचाहिँ चोकतिर फर्केको दलानसम्‍म थियो।

¹⁵प्रवेशद्वारदेखि त्‍यसको दलानको पल्‍लो छेउसम्‍म पचास हात थियो।

¹⁶प्रवेशद्वारभित्रका कोठाहरू र गाराहरूका मास्‍तिर झ्‍यालहरू चारैतिर थिए, र दलानमा पनि त्‍यस्‍ता झ्‍यालहरू थिए। ती गाराहरूमा खजूरका बोटका चित्रहरू बनाइएका थिए।

¹⁷तब तिनले मलाई बाहिरी चोकमा ल्‍याए। मैले त्‍यहाँ चोकका चारैतिर केही कोठाहरू र ढुङ्गा छापेको एउटा भूइँ देखें। यो छापेको भूइँमा तीस वटा कोठाहरू थिए।

¹⁸ढुङ्गा ओछ्याएको भूइँ प्रवेशद्वारको छेउसम्‍मै निस्‍केको थियो। भूइँको चौड़ाइ र प्रवेशद्वारको लमाइ बराबर थियो। योचाहिँ तल्‍लो पिँड़ी थियो।

¹⁹तब तिनले तल्‍लो प्रवेशद्वारको भित्रपट्टिदेखि भित्री चोकको बाहिरसम्‍म नापे। त्‍यो पूर्व र उत्तरपट्टि पनि एक सय हात थियो।

²⁰तब बाहिरी चोकमा पुर्‍याउने उत्तरतिर फर्केको मूल ढोकाको लमाइ र चौड़ाइ तिनले नापे।

²¹त्‍यसका हरेक भित्तामा भएका तीन-तीन वटा ससाना कोठाहरू र साथै त्‍यसका गाराहरू र दलानका नापहरूचाहिँ पहिलेको ढोकाका नापहरूजत्रै थिए। त्‍यो पचास हात लामो र पच्‍चीस हात चौड़ा थियो।

²²त्‍यसका झ्‍यालहरू र त्‍यसको दलान र त्‍यसका खजूरका बोटहरूले सिँगारेका चित्रका नापहरू पनि पूर्वतिर फर्केको ढोकाका नापहरूजत्रै थिए। त्‍यहाँ जानलाई सात वटा खुट्‌किला थिए, र त्‍यसको दलानचाहिँ खुट्‌किलाको विपरीत थियो।

²³पूर्वमा भएजस्‍तै उत्तरका ढोकाको सामुन्‍ने भित्री चोकमा पुर्‍याउने एउटा ढोका थियो। तिनले एउटा ढोकादेखि अर्को ढोकासम्‍म नापे। त्‍यो एक सय हात थियो।

²⁴तब तिनले मलाई दक्षिणतिर लगे, र मैले दक्षिणतिर फर्केको एउटा मूल ढोका देखें।

²⁵तिनले त्‍यसका थामहरू र त्‍यसको दलान नापे, र ती पनि अरूजस्‍तै एकै नापका थिए। प्रवेशद्वार र त्‍यसको दलानका चारैतिरका झ्‍यालहरू अरूजस्‍तै थिए। त्‍यो पचास हात लामो र पच्‍चीस हात चौड़ा थियो।

²⁶त्‍यहाँ जानलाई सात वटा खुट्‌किला थिए। त्‍यसको दलानचाहिँ तिनको विपरीत थियो। गाराहरूमा खजूरका बोटका चित्रहरू हरेक भित्तामा बनाइएका थिए।

²⁷भित्री चोकको पनि एउटा दक्षिणतिर फर्केको मूल ढोका थियो। तिनले यस ढोकादेखि दक्षिणतिरको बाहिरी ढोकासम्‍म नापे। त्‍यो एक सय हात थियो।

²⁸तब तिनले मलाई दक्षिणको मूल ढोकाबाट भएर भित्री चोकमा ल्‍याए। तिनले दक्षिणको ढोका नापे र त्‍यसको नाप पनि अरूहरूजस्‍तै थियो।

²⁹त्‍यसका कोठाहरू, गाराहरू र दलान अरूहरूजस्‍तै एकै नापका थिए। प्रवेशद्वार र त्‍यसको दलानका चारैतिर झ्‍यालहरू थिए। त्‍यो पचास हात लामो र पच्‍चीस हात चौड़ा थियो।

³⁰(भित्री चोकका चारैतिरका प्रवेशद्वारहरूका दलानहरूचाहिँ पच्‍चीस हात चौड़ा र पाँच हात गहिरा थिए।)

³¹त्‍यसको दलान बाहिरी चोकतिर फर्केको थियो। त्‍यसका थामहरूमा खजूरका बोटका चित्रहरू बनाइएका थिए। त्‍यहाँ जानलाई आठ वटा खुट्‌किला थिए।

³²तब तिनले मलाई पूर्वतिरको भित्री चोकमा ल्‍याए, र त्‍यसको प्रवेशद्वार नापे, र ती अरूजस्‍तै एकै नापको थियो।

³³त्‍यसका कोठाहरू, गाराहरू र दलान पनि अरूहरूजस्‍तै एकै नापका थिए। प्रवेशद्वार र त्‍यसको दलानका चारैतिर झ्‍यालहरू थिए। त्‍यो पचास हात लामो र पच्‍चीस हात चौड़ा थियो।

³⁴त्‍यसको दलान बाहिरी चोकतिर फर्केको थियो, र त्‍यसका थामहरूमा खजूरका बोटका चित्रहरू एक-एकतिर बनाइएका थिए। त्‍यहाँ जानलाई आठ वटा खुट्‌किला थिए।

³⁵तब तिनले मलाई उत्तरको ढोकामा ल्‍याए, र त्‍यो नापे। त्‍यो पनि अरूजस्‍तै एकै नापको थियो।

³⁶त्‍यसका कोठाहरू, गाराहरू र दलान त्‍यस्‍तै थिए। त्‍यसका चारैतिर झ्‍यालहरू थिए। त्‍यो पचास हात लामो र पच्‍चीस हात चौड़ा थियो।

³⁷त्‍यसको दलान बाहिरी चोकतिर फर्केको थियो। त्‍यसका थामहरू खजूरका बोटहरूका चित्रहरू एक-एकतिर बनाइएका थिए, र त्‍यहाँ जानलाई आठ वटा खुट्‌किला थिए।

³⁸हरेक भित्री प्रवेशद्वारको दलाननेर ढोका भएको एउटा कोठा थियो, जहाँ होमबलि धोइन्‍थे।

³⁹होमबलि, पापबलि र दोषबलि मार्नलाई प्रवेशद्वारको दलानका दुवैपट्टि दुई-दुई वटा टेबिल थिए।

⁴⁰प्रवेशद्वारका दलानको बाहिरी भित्तानेर, उत्तरको मूल ढोकामा जाने खुट्‌किला नजिकै दुई वटा टेबिल थिए, र खुट्‌किलाको अर्कोतिर पनि दुई वटा टेबिल थिए।

⁴¹यसरी प्रवेशद्वारको एकातिर चार वटा टेबिल र अर्कोतिर पनि चार वटा— सबै जम्‍मा आठ वटा टेबिल थिए। त्‍यसैमा बलिदानहरू मारिन्‍थे।

⁴²होमबलिका निम्‍ति काटेका ढुङ्गाका चार वटा टेबिल थिए। प्रत्‍येक टेबिल डेढ़ हात लामो, डेढ़ हात चौड़ा र एक हात अल्‍गो थियो। तीमाथि नै होमबलि र अरू बलिदानहरूका निम्‍ति चलाइने भाँड़ाकुँड़ा राखिन्‍थे।

⁴³अनि दुई चुच्‍चा भएका अङ्‌कुसेहरू— प्रत्‍येक चार अङ्‌गुल चौड़ा— भित्ताका चारैतिर झुण्‍ड्याइएका थिए। टेबिलहरूचाहिँ भेटीको मासु राखिनलाई थिए।

⁴⁴भित्री मूल ढोकाको बाहिरपट्टि, भित्री चोकभित्र दुई वटा कोठा थिए। एउटा कोठा उत्तरको मूल ढोकानेर दक्षिणतिर फर्केको, र अर्कोचाहिँ दक्षिणको मूल ढोकानेर उत्तरतिर फर्केको थियो।

⁴⁵तिनले मलाई भने, “यो दक्षिणतिर फर्केको कोठा ती पूजाहारीहरूका निम्‍ति हो, जसका जिम्‍मामा मन्‍दिर छ।

⁴⁶र उत्तरतिर फर्केको कोठाचाहिँ ती पूजाहारीहरूका निम्‍ति हो, जसका जिम्‍मामा वेदी छ। यी सादोकका छोराहरू हुन्, र लेवीहरूमा ती मात्रै परमप्रभुको सामुन्‍ने सेवा गर्नलाई उहाँको नजिक आउन सक्‍छन्‌।

⁴⁷तब तिनले चोक नापे। त्‍यो वर्गाकार थियो— एक सय हात लामो र एक सय हात चौड़ा। वेदीचाहिँ मन्‍दिरको अगि अवस्‍थित थियो।

⁴⁸तब तिनले मलाई मन्‍दिरको दलानमा ल्‍याए, र दलानका थामहरू तिनले नापे। ती दुवैपट्टि पाँच-पाँच हात चौड़ा थिए। प्रवेशद्वारको चौड़ाइ चौध हात थियो, र त्‍यसका गाराहरू एक-एकतिर तीन-तीन हात चौड़ा थिए।

⁴⁹दलानको चौड़ाइ बीस हात थियो, र त्‍यसको अगाड़िपट्टिदेखि पछाड़िपट्टिसम्‍म बाह्र हात थियो। त्‍यसका उक्‍लिने दश वटा खुट्‌किलाहरू थिए, र थामहरूका दुवैपट्टि खम्‍बाहरू थिए।