Read Nepali New Revised Version, 2012 इजकिएल 41 Bible Online

इजकिएल 41 - Nepali New Revised Version, 2012 bible

इजकिएल 41

¹तब ती मानिसले मलाई बाहिरी पवित्रस्‍थानमा ल्‍याए, र त्‍यसका ढोकाका थामहरू नापे। ती थामहरूको चौड़ाइ एक-एकपट्टि छ-छ हात चौड़ा थियो।

²प्रवेशद्वार दश हात चौड़ा थियो, र त्‍यसका दुईपट्टिका गाराहरू पाँच-पाँच हात थिए। तिनले बाहिरी पवित्रस्‍थान नापे। त्‍यो चालीस हात लामो र बीस हात चौड़ा थियो।

³तब तिनी पवित्रस्‍थान भित्र पसे, र त्‍यसको प्रवेशद्वारका थामहरू नापे। प्रत्‍येक दुई-दुई हात चौड़ा थियो। प्रवेशद्वार छ हात चौड़ा थियो। प्रवेशद्वारका दुईपट्टिका गाराहरू सात-सात हात चौड़ा थिए।

⁴अनि तिनले भित्री पवित्रस्‍थानको लमाइ नापे। त्‍यो बीस हात थियो, र बाहिरी पवित्रस्‍थानको छेउमा भएको त्‍यसको चौड़ाइचाहिँ बीस हात थियो। तिनले मलाई भने, “योचाहिँ महा-पवित्रस्‍थान हो।”

⁵तब तिनले मन्‍दिरको भित्ता नापे। त्‍यो छ हात बाक्‍लो थियो, र मन्‍दिरका चारैतिर छेउ-छेउ गाँसिएका कोठाहरू चार-चार हात चौड़ा थिए।

⁶ती गाँसिएका कोठाहरू तीन तहमा थिए। प्रत्‍येक तहमा तीस-तीस कोठा थिए। मन्‍दिरका चारैतिरको भित्तामा कोठाहरूका निम्‍ति टेवा स्‍वरूप पालीहरू बनाइएका थिए, ताकि ती टेवाहरू मन्‍दिरको भित्तामा नघुसिऊन्‌

⁷मन्‍दिरका चारैतिरका कोठाहरू जति-जति माथि गएका थिए, त्‍यति-त्‍यति झन्‌ चौड़ा हुँदैगएका थिए। मन्‍दिरलाई घेरेका ती कोठाहरू तहमाथि अर्को तलामा थपिँदैगएका थिए, र यसरी कोठाहरू एउटादेखि अर्कोमाथि जाँदा झन्‌ चौड़ा हुन गए। सबैभन्‍दा तल्‍लो तलादेखि सबैभन्‍दा माथिल्‍लो तलासम्‍म बीचको तला भएर भर्‍याङबाट जाने सिँढ़ी थियो।

⁸त्‍यसपछि मन्‍दिरका चारैपट्टि उठाएको एउटा आधार मैले देखें, जो कोठाहरूको जग बन्‍यो। त्‍यसको लमाइ पूरा एक टाँगो, अर्थात्‌ छ हात लामो थियो।

⁹ती कोठाहरूको बाहिरी भित्ता पाँच हात बाक्‍लो थियो। मन्‍दिरका ती कोठाहरू

¹⁰र पूजाहारीहरूका कोठाहरूका बीचको खुला क्षेत्र मन्‍दिरका चारैतिर बीस हात थियो।

¹¹खुला क्षेत्रबाट ती कोठाहरूमा जाने प्रवेशद्वारहरू थिए, एउटा उत्तरतिर फर्केको र अर्कोचाहिँ दक्षिणतिर फर्केको थियो। त्‍यस खुला क्षेत्रका छेवैको आधार चारैतिर पाँच-पाँच हात चौड़ा थियो।

¹²मन्‍दिरको चोकतिर फर्केको पश्‍चिमपट्टिको भवन सत्तरी हात चौड़ा थियो। त्‍यस भवनको भित्ता चारैतिर पाँच हात बाक्‍लो थियो, र त्‍यसको लमाइचाहिँ नब्‍बे हात थियो।

¹³तब तिनले मन्‍दिर नापे। त्‍यो एक सय हात लामो थियो। मन्‍दिरको चोक र त्‍यो घर पनि, त्‍यसका भित्ताहरूसमेत एक सय हात लामो थियो।

¹⁴मन्‍दिरका पूर्वतिरको चोक पनि, मन्‍दिरको अगाड़िको छेउसमेत एक सय हात लामो थियो।

¹⁵तब तिनले मन्‍दिरका पछाड़िको चोकतिर फर्केको भवन, त्‍यसका हरेक भित्तामा बनाइएका एक-एकपट्टिका बार्दलीसमेत नापे। त्‍यो एक सय हात लामो थियो। बाहिरी र भित्री पवित्रस्‍थान र चोकतिर फर्केको दलान,

¹⁶र ती तीनै वटाका चारैतिर भएका सँघारहरू, साँघुरा झ्‍यालहरू र बार्दलीहरू— सँघारका भित्र र बाहिरका सबै कुरा— काठले मोहोरिएका थिए। भूइँ, झ्‍यालसम्‍मै भएका भित्ता र झ्‍यालहरू पनि काठले मोहोरिएका थिए।

¹⁷भित्री पवित्रस्‍थानमा जाने प्रवेशद्वारबाहिर त्‍यसमाथिको खाली ठाउँमा र भित्री र बाहिरी पवित्रस्‍थानका भित्ताहरूका बीच-बीचमा

¹⁸खोपिएका करूबहरू र तिनका बीचमा खजूरका बोट थिए। हरेक करूबका दुई वटा अनुहार थिए—

¹⁹एउटाचाहिँ मानिसको अनुहारजस्‍तै एकापट्टिको खजूरतिर फर्केको, र अर्कोचाहिँ सिंहको अनुहारजस्‍तै अर्कोपट्टिको खजूरतिर फर्केको थियो। जम्‍मै मन्‍दिरका चारैतिर ती यस्‍तै खोपिएका थिए।

²⁰करूबहरू र खजूरका बोटहरू भूइँदेखि प्रवेशद्वारमाथिको क्षेत्रसम्‍म बाहिरी पवित्रस्‍थानको भित्तामा खोपेर बनाइएका थिए।

²¹बाहिरी पवित्रस्‍थानका द्वारको चौकोस वर्गाकार थियो, र महापवित्रस्‍थानका अगाड़िपट्टिको पनि त्‍यस्‍तै थियो।

²²तीन हात अल्‍गो र एक-एकतिरको चौड़ाइ दुई हात भएको एउटा काठको वेदी थियो। त्‍यसका कुनाहरू, त्‍यसका आधार र पाटाहरू काठकै थिए। ती मानिसले मलाई भने, “योचाहिँ परमप्रभुको सामुन्‍ने राखिएको टेबिल हो।”

²³बाहिर पवित्रस्‍थान र महा-पवित्रस्‍थानका ढोकाहरू दुई-दुई पाटाका थिए।

²⁴प्रत्‍येक ढोकाको लागि दुई-दुई खापा थिए।

²⁵बाहिरी पवित्रस्‍थानका ढोकाहरूमा खोपिएका करूबहरू र खजूरका बोटहरू भित्तामा भएजस्‍तै थिए, र दलानको सामुन्‍ने काठको कार्नेस बनाइएको थियो।

²⁶दलानका भित्ताहरूमा दुवैतिर खजूरका बोटहरू खोपिएका साँघुरा झ्‍यालहरू थिए। मन्‍दिरका चारैतिरका कोठाहरूका पनि झुण्‍डिएका कार्नेसहरू थिए।