Read Nepali New Revised Version, 2012 इजकिएल 43 Bible Online

इजकिएल 43 - Nepali New Revised Version, 2012 bible

इजकिएल 43

¹तब मलाई ती मानिसले पूर्वतर्फ फर्केको मूल ढोकामा ल्‍याए,

²अनि मैले इस्राएलका परमेश्‍वरको महिमा पूर्वबाट आइरहेको देखें। उहाँको सोर उर्लेर आएका पानीहरूको गर्जनजस्‍तो थियो, र देश उहाँको महिमाले चम्‍क्‍यो।

³मैले देखेको दर्शन त्‍यही दर्शनजस्‍तो थियो, जो उहाँ सहरलाई सर्वनाश गर्न आउनुहुँदा मैले देखेको थिएँ, र जुन दर्शनहरू कबार नदीको किनारमा मैले देखेको थिएँ, र म भूइँमा घोप्‍टो परें।

⁴परमप्रभुको महिमा पूर्वपट्टि फर्केको मूल ढोकाबाट मन्‍दिरभित्र पस्‍यो।

⁵तब आत्‍माले मलाई उचाल्‍नुभयो र मलाई भित्री चोकमा ल्‍याउनुभयो, र परमप्रभुको महिमाले मन्‍दिर भरियो।

⁶ती मानिसचाहिँ मेरो छेउमा उभिरहँदा, मन्‍दिरबाट कोही बोलिरहेको मैले सुनें।

⁷उहाँले मलाई भन्‍नुभयो, “हे मानिसको छोरो, यो त मेरो सिंहासनको ठाउँ हो, र यो ठाउँ मेरा पाउका पैतालाका निम्‍ति पनि हो। यहाँ म इस्राएलीहरूसित सदासर्वदै बस्‍नेछु। इस्राएलका घरानाले र तिनीहरूका राजाहरूले आफ्‍नो वेश्‍यावृत्तिद्वारा र अल्‍गा ठाउँहरूमा भएका आफ्‍ना राजाहरूका निर्जीव मूर्तिहरूद्वारा फेरि कहिल्‍यै मेरो पवित्र नाउँलाई बिटुलो पार्नेछैनन्‌।

⁸जब तिनीहरूले आफ्‍नो सँघार मेरो सँघार नजिक र आफ्‍नो ढोकाका खामाहरू मेरा ढोकाका खामाहरूनजिक बनाए, र मेरो र तिनीहरूको बीच एउटा भित्ता मात्र राखे, तब तिनीहरूका घिनलाग्‍दा व्‍यवहारद्वारा तिनीहरूले मेरो पवित्र नाउँलाई अपवित्र पारे। यसैले मेरो क्रोधमा मैले तिनीहरूलाई नाश गरें।

⁹अब तिनीहरूले आफ्‍नो वेश्‍यावृत्तिलाई त्‍यागून्‌ र तिनीहरूका राजाहरूका निर्जीव मूर्तिहरूलाई मेरो सामुन्‍नेबाट हटाऊन्, र म तिनीहरूका बीचमा सदासर्वदा रहनेछु।

¹⁰“हे मानिसको छोरा, इस्राएलका मानिसहरूलाई यस मन्‍दिरको विषयमा भन्, ताकि तिनीहरू आफ्‍ना पापहरूका निम्‍ति लज्‍जित होऊन्‌। तिनीहरूले यस मन्‍दिरको बनोटलाई विचार गरून्,

¹¹र यदि तिनीहरूले जे गरेका छन्, ती सबैका निम्‍ति लज्‍जित भए भने तैंले तिनीहरूलाई यस मन्‍दिर र त्‍यसका सबै बन्‍दोबस्‍तहरू, त्‍यसका बाहिर जाने र भित्र पस्‍ने प्रवेशद्वारहरू, त्‍यसका सारा नमूना र त्‍यसका सबै विधिहरू सम्‍पूर्ण तिनीहरूलाई बताइदे। तिनीहरूका सामु यी लेख्, ताकि त्‍यसका ढाँचाप्रति तिनीहरू ईमानदार होऊन्, र त्‍यसका विधिहरू पालन गरून्‌।

¹²“मन्‍दिरको नियम यही हो: पर्वतको टाकुराका चारैतिरको क्षेत्र अति पवित्र हुनेछ। मन्‍दिरको नियम यही नै हो।

¹³“वेदीका नापहरू लामो हातको नापअनुसार यस्‍ता हुन्‌— लामो हातको नाप एक हात र चार अङ्‌गुलको चौड़ाइ हो। त्‍यसको नाल एक हात गहिरो र एक हात चौड़ा छ। त्‍यसलाई घेरेको बिटको नाप एक बित्ता हो। वेदीको उचाइ यस्‍तो छ:

¹⁴भूइँमा भएको नालदेखि तल्‍लो तहको किनारसम्‍म वेदी दुई हात अल्‍गो र एक हात चौड़ा छ। सानो बिटदेखि ठूलो बिटसम्‍म त्‍यो चार हात अल्‍गो र एक हात चौड़ा छ।

¹⁵वेदीको अगेनो चार हात अल्‍गो छ, र चार वटा सिंहहरू त्‍यसका चारै कुनामा मास्‍तिर निस्‍केका छन्‌।

¹⁶अगेनोचाहिँ बाह्र हात लामो र बाह्र हात चौड़ा भएको ठीक वर्गाकार हो।

¹⁷वेदीको माथिल्‍लो बिट पनि वर्गाकार हो, चौध हात लामो र चौध हात चौड़ा। बिट एक हात बाक्‍लो छ, र त्‍यसका चारैतिर आधा हात गहिरो नाल छ। वेदीका खुट्‌किलाहरू पूर्वतिर फर्केका छन्‌।”

¹⁸तब तिनले मलाई भने, “हे मानिसको छोरो, परमप्रभु परमेश्‍वर यसो भन्‍नुहुन्‍छ: वेदी बनाइसकेपछि होमबलि चढ़ाउन र वेदीमा रगत छर्कनलाई विधिहरू यी नै हुन्‌:

¹⁹तिमीहरूले पूजाहारीहरूलाई पापबलिको निम्‍ति एउटा बाछो खटाइदिनुपर्छ, जुन पूजाहारीहरू सादोकको परिवारका लेवी हुन्, जो मेरो सेवा गर्न मेरो नजिक आउँछन्, परमप्रभु परमेश्‍वर भन्‍नुहुन्‍छ।

²⁰त्‍यसको रगतबाट केही लिएर तिनीहरूले वेदीका चारै सीङहरू, माथिल्‍लो बिटका चारै कुना र त्‍यसका चारैतिर लगाओ। यसरी तिमीहरूले वेदी शुद्ध पार्नेछौ, र त्‍यसको निम्‍ति प्रायश्‍चित गर्नेछौ।

²¹त्‍यसपछि पापबलिको बाछो लिएर पवित्रस्‍थानको बाहिरपट्टि तोकिएको ठाउँमा तिमीहरूले त्‍यो आगोमा पोल।

²²“दोस्रो दिन तिमीहरूले एउटा निष्‍खोट बोको पापबलिको निम्‍ति चढ़ाओ। तिमीहरूले बाछाले वेदी शुद्ध पारेझैँ यसले पनि वेदी शुद्ध होस्‌।

²³जब तिमीहरूले वेदीलाई पूरै शुद्ध पारेका हुनेछौ, तब बगालबाट एउटा निष्‍खोट बाछा र एउटा निष्‍खोट भेड़ा चढ़ाओ।

²⁴तिमीहरूले तिनलाई परमप्रभुको सामुन्‍ने चढ़ाओ। पूजाहारीहरूले तिनमा नून छर्केर परमप्रभुको सामुन्‍ने होमबलिको रूपमा ती चढ़ाउनुपर्छ।

²⁵“तिमीहरूले सात दिनसम्‍म पापबलिको निम्‍ति दिनहुँ एउटा बोको जुटाउनुपर्छ। तिमीहरूले बगालबाट एउटा निष्‍खोट बाछा र एउटा निष्‍खोट भेड़ा चढ़ाउने गर।

²⁶सात दिनसम्‍म तिनीहरूले वेदीलाई प्रायश्‍चित गरेर त्‍यसलाई शुद्ध पार्नुपर्छ। यसरी तिनीहरूले त्‍यसलाई अर्पण गर्नेछन्‌।

²⁷जब ती दिनहरू पूरा हुन्‍छन्, अर्थात्‌ आठौँ दिनमा र त्‍यस उप्रान्‍त पनि पूजाहारीहरूले वेदीमा तिमीहरूका होमबलि र मेलबलि चढ़ाउने गरून्‌। तब म तिमीहरूलाई ग्रहण गर्नेछु, परमप्रभु परमेश्‍वर भन्‍नुहुन्‍छ।