Read Nepali New Revised Version, 2012 इजकिएल 7 Bible Online

इजकिएल 7 - Nepali New Revised Version, 2012 bible

इजकिएल 7

¹परमप्रभुको यो वचन मकहाँ आयो:

²“हे मानिसको छोरो, इस्राएलको देशलाई परमप्रभु परमेश्‍वर यसो भन्‍नुहुन्‍छ: अन्‍त्‍य! देशका चारै दिशामा अन्‍त्‍य आइपुगेको छ।

³अब अन्‍त्‍य तँमाथि आएको छ, र म मेरो रीस तँमाथि खन्‍याउनेछु। तेरो चालचलनअनुसार म न्‍याय गर्नेछु, र तेरा सबै घिनलाग्‍दा कामहरूका निम्‍ति म तँसँग साटो फेर्नेछु।

⁴म तँलाई दयाको दृष्‍टिले हेर्नेछैनँ, तँलाई म टिठ्याउनेछैनँ। तेरो माझमा भएका घृणित व्‍यवहार र घिनलाग्‍दा कामहरूका निम्‍ति म तँलाई दण्‍ड दिनेछु। तब तैंले म नै परमप्रभु हुँ भनी जान्‍नेछस्‌।

⁵“परमप्रभु परमेश्‍वर यसो भन्‍नुहुन्‍छ: विपत्तिमाथि विपत्ति! सर्वनाश तँमाथि आउँदैछ!

⁶अन्‍त्‍य आएको छ! अन्‍त्‍य आएको छ! त्‍यो तिमीहरूका विरुद्धमा उठेको छ। त्‍यो आएको छ!

⁷देशमा बस्‍ने तिमीहरूमाथि सत्‍यनाश आएको छ। बेला आइपुगेको छ, दिन नजिकै छ। पर्वतहरूमा खैलाबैला भएको छ, आनन्‍द त होइन।

⁸अब म मेरो क्रोध तँमाथि पोखाउनेछु, र मेरो रीस तँमाथि खन्‍याउनेछु। तेरो चालचलनअनुसार म न्‍याय गर्नेछु, र तेरा सबै घिनलाग्‍दा कामहरूका निम्‍ति म तँसँग साटो फेर्नेछु।

⁹म तँलाई दयाको दृष्‍टिले हेर्नेछैनँ, तँलाई म टिठ्याउनेछैनँ। तेरो माझमा भएका घृणित व्‍यवहार र घिनलाग्‍दा कामहरूका निम्‍ति म तँलाई दण्‍ड दिनेछु। तब प्रहार गर्नेचाहिँ म परमप्रभु नै हुँ भनी तैंले जान्‍नेछस्‌।

¹⁰“त्‍यो दिन यहीँ छ! त्‍यो आएको छ। तेरो सर्वनाश निस्‍केर आएको छ, लट्ठीको कोपिला लागेको छ, अहङ्कारको फूल फुलेको छ!

¹¹उपद्रव बढ़ेर दुष्‍टतालाई दण्‍ड दिने लट्ठीतुल्‍य भएको छ। तिनीहरूमध्‍येको कुनै पनि मानिस छोड़िनेछैन। कुनै धन-सम्‍पत्ति, कुनै बहुमूल्‍य चीज छोड़िनेछैन।

¹²बेला आएको छ, दिन आइपुग्‍यो। किन्‍नेले आनन्‍द नगरोस्, बेच्‍नेले शोक नगरोस्, किनकि क्रोध तिनीहरू जम्‍मै भीड़माथि परेको छ।

¹³ती दुवै बाँचुञ्‍जेल बेच्‍नेले आफूले बेचेको त्‍यो जमिन फेरि प्राप्‍त गर्नेछैन, किनभने समस्‍त भीड़को बारे यो दर्शन बद्‌लिनेछैन। तिनीहरूका पापको कारण एक जनाले पनि आफ्‍नो ज्‍यान जोगाउनेछैन।

¹⁴तिनीहरूले तुरही फुके र सबै कुरा तयार पारे तापनि कोही लड़ाइँ गर्न जानेछैन, किनकि मेरो क्रोध ती जम्‍मै भीड़माथि परेको छ।

¹⁵“बाहिर तरवार र भित्रचाहिँ रूढ़ी र अनिकाल छन्‌। बाहिर गाउँतिर हुने तरवारले मारिनेछन्‌ र सहरमा हुनेचाहिँ अनिकाल र रूढ़ीको गाँस हुनेछन्‌।

¹⁶अनि बाँचेर उम्‍कने सबै पर्वतहरूमा बेँसीका ढुकुरझैँ हरेक आ-आफ्‍ना पापहरूको कारण शोक गर्दैरहनेछ।

¹⁷हरेक हात शिथिल हुनेछ र हरेक घुँड़ा निर्बल हुनेछ।

¹⁸तिनीहरूले कम्‍मरमा भाङ्‌ग्रा लाउनेछन्‌ र त्रास पहिरिनेछन्‌। सबैका अनुहार लाजले ढाकिनेछन्‌ र तिनीहरू सबैका कपाल खौरिनेछन्‌।

¹⁹तिनीहरूले आफ्‍नो चाँदी सड़कहरूमा फालिदिनेछन्, र तिनीहरूको सुन अशुद्ध थोकजस्‍तो हुनेछ। परमप्रभुका क्रोधको दिनमा तिनीहरूका चाँदी र सुनले तिनीहरूलाई बचाउन सक्‍नेछैनन्‌। सुन र चाँदीले तिनीहरूले आफ्‍नो भोक मार्न वा पेट भर्न सक्‍नेछैनन्, किनभने तिनीहरूलाई पापमा पार्ने ठक्‍कर यही नै थियो।

²⁰आफ्‍ना बहुमूल्‍य गरगहनामा तिनीहरूले घमण्‍ड गरे, र तीबाट तिनीहरूले आफ्‍ना घिनलाग्‍दा मूर्तिहरू र घृणित प्रतिमाहरू बनाए। यसकारण म यी कुरा तिनीहरूका निम्‍ति अशुद्ध थोक तुल्‍याइदिनेछु।

²¹म ती सबै विदेशीहरूलाई लुट्‌न दिनेछु। म पृथ्‍वीका दुष्‍टहरूलाई लूटको मालसरह ती कुरा दिनेछु, र उनीहरूले ती बिटुला पार्नेछन्‌।

²²मेरो अनुहार म तिनीहरूदेखि फर्काउनेछु, र तिनीहरूले मेरो धन-सम्‍पत्ति संग्रह गरेको ठाउँ बिटुलो पार्नेछन्‌। डाँकूहरू त्‍यहाँ पसेर त्‍यसलाई बिटुलो पार्नेछन्‌।

²³“साङ्‌लाहरू तयार पार, किनभने देश रक्तपातले भरिएको छ, र सहर उपद्रवले भरिएको छ।

²⁴म जाति-जातिहरूका सबैभन्‍दा दुष्‍ट मानिसहरूलाई तिनीहरूका घरहरू अधिकार गर्नलाई ल्‍याउनेछु। बलिया मानिसहरूको घमण्‍ड म खतम गर्नेछु, र तिनीहरूका पवित्र ठाउँहरू बिटुला पारिनेछन्‌।

²⁵जब त्रास आउँछ, तब तिनीहरूले शान्‍तिको खोजी गर्नेछन्‌। तर शान्‍ति कहीँ पनि पाइनेछैन।

²⁶विपद्‌माथि विपद्‌ आउनेछ, हल्‍लामाथि हल्‍ला! तिनीहरूले अगमवक्ताबाट दर्शन खोज्‍नेछन्‌। पूजाहारीबाट व्‍यवस्‍थाको शिक्षा र धर्म-गुरुहरूबाट परामर्श लोप भइजानेछन्‌।

²⁷राजाले शोक गर्नेछ। राजकुमार निराशमा डुब्‍नेछ। देशका मानिसहरूका हात त्रासले काँप्‍नेछन्‌। तिनीहरूको व्‍यवहारअनुसार नै म तिनीहरूसित व्‍यवहार गर्नेछु। तिनीहरूले गरेकै न्‍यायअनुसार म तिनीहरूको न्‍याय गर्नेछु। तब म नै परमप्रभु हुँ भनी तिनीहरूले जान्‍नेछन्‌।”