Read Nepali New Revised Version, 2012 दानिएल 11 Bible Online

दानिएल 11 - Nepali New Revised Version, 2012 bible

दानिएल 11

¹“मादी दाराको प्रथम वर्षमा उनलाई मदत गर्न र रक्षा गर्न म खड़ा भएँ।

²“अब म तिमीलाई सत्‍य कुरा बताउँछु: फारसका अरू तीन राजाहरू देखा पर्नेछन्‌ र त्‍यसपछि ती सबैभन्‍दा धनी अर्का चौथा पनि निस्‍कनेछन्‌। जब उनले आफ्‍नो सम्‍पत्तिद्वारा शक्ति प्राप्‍त गर्नेछन्, उनले सबैलाई ग्रीस राज्‍यको विरुद्ध उक्‍साउनेछन्‌।

³त्‍यसपछि एक जना शक्तिशाली राजा खड़ा हुनेछन्, जसले आफ्‍नो ठूलो शक्तिसाथ शासन गर्नेछन्‌ र जे मन लाग्‍यो त्‍यही गर्नेछन्‌।

⁴उनी खड़ा भएपछि, उनको साम्राज्‍य टुक्रिनेछ र स्‍वर्गका चार बतासतिर बाँड़िनेछ। त्‍यो उनका सन्‍तानहरूले पाउनेछैनन्, न त उनले चलाएको अधिकार त्‍यसको हुनेछ, किनभने उनको साम्राज्‍य जरैसमेत उखेलिनेछ र अरूलाई दिइनेछ।

⁵“दक्षिणका राजा बलिया हुनेछन्, तर उनका सेनापतिहरूमध्‍ये एक जना उनीभन्‍दा अझ बलिया हुनेछन्‌ र ठूलो शक्तिसाथ तिनले आफ्‍नै राज्‍यको शासन गर्नेछन्‌।

⁶केही वर्षपछि उनीहरू मित्र बन्‍नेछन्‌। एउटा सन्‍धि गर्नका लागि दक्षिणका राजाकी छोरी उत्तरका राजाकहाँ जानेछिन्, तर तिनले आफ्‍नो शक्ति कायम गर्नेछैनन्, र उनी र उनको शक्ति दिगो रहनेछैनन्‌। ती दिनमा तिनका राजकीय रक्षकहरू र तिनका पिता र तिनका समर्थकका साथ तिनी सुम्‍पिइनेछिन्‌।

⁷“तिनको स्‍थान लिनका निम्‍ति एक जना तिनको वंशबाट उठ्‌नेछन्‌। उनले उत्तरका राजाको सैन्‍य शक्तिमाथि आक्रमण गर्नेछन्‌ र उनको किल्‍लाभित्र प्रवेश गर्नेछन्‌। उनले तिनीहरूका विरुद्ध लड़ाइँ गर्नेछन्‌ र विजयी हुनेछन्‌।

⁸उनले तिनीहरूका देवताहरू, तिनीहरूका फलामे मूर्तिहरू र चाँदी र सुनका बहुमूल्‍य भाँड़ाकुँड़ाहरू पनि जफत गर्नेछन्‌ र मिश्रदेशतिर लैजानेछन्‌। केही वर्षका लागि उनले उत्तरका राजालाई छोड्‌नेछन्‌।

⁹तब उत्तरका राजाले दक्षिणका राजाको राज्‍यमाथि हमला गर्नेछन्‌ तर उनी आफ्‍नै देशमा फर्कनेछन्‌।

¹⁰उनका छोराहरूले लड़ाइँको लागि तयार गर्नेछन्‌ र विशाल सेना जम्‍मा गर्नेछन्, जसले रोक्‍न नसक्‍ने बाढ़ले झैँ जित्‍दै किल्‍लासम्‍मै लड़ाइँ पुर्‍याउनेछ।

¹¹“तब दक्षिणका राजा क्रोधित भएर उत्तरका राजाको विरुद्धमा लड़ाइँ गर्न निस्‍कनेछन्, जसले ठूलो सेना उठाउनेछन्‌ तर त्‍यो सेना हार्नेछ।

¹²जब त्‍यो सेना लगिन्‍छ, दक्षिणका राजाले घमण्‍डले फुलेर हजारौँलाई मार्नेछन्, तैपनि उनी विजयी रहनेछैनन्‌।

¹³किनभने उत्तरका राजाले पहिलोभन्‍दा ठूलो सेना तयार गर्नेछन्‌ र केही वर्षपछि उसले सामानले सुसज्‍जित एउटा ठूलो भयङ्कर सेनासित अगि बढ्‌नेछन्‌।

¹⁴“ती दिनहरूमा धेरै जना दक्षिणका राजाको विरुद्धमा उठ्‌नेछन्‌। यो दर्शन पूरा गर्न तिम्रो आफ्‍नै जातिका मानिसहरूमध्‍येबाटै हिंसात्‍मक मानिसहरू निस्‍कनेछन्‌ तर सफल हुनेछैनन्‌।

¹⁵त्‍यसपछि उत्तरका राजा आएर घेरा मचान बनाई पर्खालले घेरिएको सहरलाई कब्‍जा गर्नेछन्‌। दक्षिणको सेना त्‍यसको सामना गर्न शक्तिहीन हुनेछ, तिनीहरूका उत्‍कृष्‍ट टोलीहरू पनि खड़ा हुन सक्‍नेछैनन्‌।

¹⁶आक्रमणकारीले इच्‍छा लागेअनुसार गर्नेछन्, कोही पनि उनको विरुद्ध खड़ा हुन सक्‍नेछैन। उनले आफैलाई त्‍यो सुन्‍दर देशमा बसाल्‍नेछन्‌ र उनीसित त्‍यसलाई नाश गर्ने शक्ति हुनेछ।

¹⁷उनले आफ्‍नो सम्‍पूर्ण राज्‍यको शक्तिसाथ आउने निर्णय गर्नेछन्‌ र दक्षिणका राजासँग सन्‍धि गर्नेछन्‌। अनि त्‍यो राज्‍य पराजित गर्नलाई उनले आफ्‍नी छोरी तिनलाई विवाह गर्न दिनेछन्, तर उनको योजना सफल हुनेछैन न त उनलाई मदत नै हुनेछ।

¹⁸तब उनले आफ्‍नो ध्‍यान समुद्री किनारका देशहरूतिर लगाउनेछन्‌ र तीमध्‍ये धेरैलाई लिनेछन्, तर एक जना सेनापतिले उनको उच्‍चोपनको अन्‍त गर्नेछन्‌ र उनको उच्‍चोपन उनीमाथि नै फर्काउनेछन्‌।

¹⁹यसपछि उनी आफ्‍नै देशका किल्‍लाहरूतर्फ फर्कनेछन्, तर फेरि कहिल्‍यै नदेखिने गरी उनी ठेस खानेछन्‌ र पतित हुनेछन्‌।

²⁰राजकीय वैभवलाई कायम राख्‍न उनका उत्तराधिकारीले एक जना कर उठाउने व्‍यक्तिलाई पठाउनेछन्‌। तर केही वर्षमा नै कुनै रीसभाव वा लड़ाइँमा नपरीकनै यिनी नाश गरिनेछन्‌।

²¹“राजकीय सम्‍मान नपाएको एक तिरस्‍कृत व्‍यक्तिद्वारा उनको स्‍थान लिइनेछ। जब मानिसहरूले सुरक्षाको महसूस गरिरहेका हुनेछन्, त्‍यसले त्‍यस राज्‍यमाथि आक्रमण गर्नेछ र त्‍यसले षड्‌यन्‍त्रद्वारा त्‍यस राज्‍यलाई लिनेछ।

²²त्‍यसपछि त्‍यसको सामु एक जना शक्तिशाली सेना खतम पारिनेछ, र साथै करारका राजकुमार पनि नाश गरिनेछन्‌।

²³त्‍यससँग सन्‍धि गरिसकेपछि त्‍यसले छलपूर्ण तरीकाले काम गर्नेछ र थोरै मानिसहरूसहित त्‍यसले अधिकार जमाउनेछ।

²⁴सबैभन्‍दा धनी प्रान्‍तहरूले सुरक्षाको महसूस गरिराखेको बेला त्‍यसले तिनीहरूमाथि आक्रमण गर्नेछ, र त्‍यसका पिता-पुर्खाहरूले नगरेका काम त्‍यसले गर्नेछ। त्‍यसले लुटेका सामान र सम्‍पत्तिहरू आफ्‍नो पछि लाग्‍नेहरूका बीचमा बाँड्‌नेछ। त्‍यसले किल्‍लाहरूका हारको निम्‍ति षड्‌यन्‍त्र गर्नेछ— तर थोरै समयको लागि मात्र।

²⁵“ठूलो सेनाका साथ दक्षिणका राजाको विरुद्ध त्‍यसले आफ्‍नो बल र साहसलाई उत्तेजित पार्नेछ। दक्षिणका राजाले एक विशाल र अत्‍यन्‍तै शक्तिशाली सेना उठाएर लड़ाइँ गर्नेछन्, तर उनको विरुद्धमा रचिएका षड्‌यन्‍त्रको कारण उनी खड़ा हुन सक्‍नेछैनन्‌।

²⁶उनकै खाना खानेहरूले उनलाई नष्‍ट पार्न प्रयत्‍न गर्नेछन्‌। उनको सेना परास्‍त गरिनेछ र धेरै जना लड़ाइँमा मर्नेछन्‌।

²⁷ती दुई राजाहरू दुष्‍ट हृदय लिएर एउटै टेबिलमा बसेर एक-अर्कासँग झूट बोल्‍नेछन्, तर कुनै लाभ मिल्‍नेछैन, किनभने अन्‍तको दिनचाहिँ तोकिएको समयमा नै आउनेछ।

²⁸ठूलो सम्‍पत्तिको साथ उत्तरको राजा आफ्‍नै देशमा फर्कनेछ, तर त्‍यसको हृदय पवित्र करारको विरुद्ध हुनेछ। त्‍यसले यसको विरुद्ध काम गर्नेछ, अनि आफ्‍नै देशमा फर्कनेछ।

²⁹“तोकिएको समयमा त्‍यसले फेरि दक्षिणमा हमला गर्नेछ, तर यस पल्‍टको परिणाम पहिलाको भन्‍दा फरक हुनेछ।

³⁰पश्‍चिमी किनारका देशहरूबाट त्‍यसको विरुद्धमा जहाजहरू आउनेछन्, र त्‍यसले हरेस खानेछ। तब फर्केर पवित्र करारको विरुद्धमा त्‍यसले आफ्‍नो रीस पोख्‍नेछ। त्‍यो फर्कनेछ र त्‍यसले पवित्र करार त्‍याग्‍नेहरूलाई कृपा देखाउनेछ।

³¹“त्‍यसको सशस्‍त्र सेना मन्‍दिरको किल्‍लालाई बिटुलो पार्न खड़ा हुनेछ र दैनिक बलिदान रोक्‍नेछ। त्‍यसपछि तिनीहरूले विनाशकारी घृणित थोकको स्‍थापना गर्नेछन्‌।

³²करार भङ्ग गर्नेहरूलाई त्‍यसले झूठो प्रशंसा गरेर भ्रष्‍ट पार्नेछ, तर आफ्‍ना परमेश्‍वरलाई चिन्‍नेहरूले दृढ़तासाथ त्‍यसको विरोध गर्नेछन्‌।

³³“जो बुद्धिमान्‌ छन्, तिनीहरूले धेरै मानिहरूलाई शिक्षा दिनेछन्, यद्यपि केही समयको लागि तिनीहरू तरवारको शिकार बन्‍नेछन्‌ वा आगोले जलाइनेछन्‌ वा कैदमा पर्नेछन्‌ वा लुटिनेछन्‌।

³⁴जब तिनीहरू यसमा लड्‌नेछन्, तिनीहरूले थोरै सहायता पाउनेछन्, र जो ईमानदार छैनन्, उनीहरू सामेल हुनेछन्‌।

³⁵बुद्धिमान्‌हरूमध्‍ये केहीले ठेस खानेछन्, यसरी तिनीहरू अन्‍तको दिनसम्‍मको लागि खारिऊन्, शुद्ध पारिऊन्‌ र दागरहित बनाइऊन्, किनभने त्‍यो दिन तोकिएको समयमा आउनेछ।

³⁶“त्‍यस राजाले जे मन लाग्‍यो त्‍यही गर्नेछ। उसले आफैलाई हरेक देवभन्‍दा माथि उचाल्‍नेछ र देवहरूका पनि परमेश्‍वरको विरुद्धमा कहिल्‍यै नसुनिएका कुरा गर्नेछ। क्रोधको समय समाप्‍त नहोउञ्‍जेल त्‍यो सफल हुनेछ, किनभने जे निश्‍चय गरिएको छ, त्‍यो पूरा हुनैपर्छ।

³⁷आफ्‍ना पिता-पुर्खाहरूका देवहरू वा स्‍त्रीहरूले रुचाएका देवको पनि उसले वास्‍ता गर्नेछैन, न त उसले कुनै पनि देवको वास्‍ता गर्छ, तर त्‍यसले आफैलाई ती सबैभन्‍दामाथि उचाल्‍नेछ।

³⁸तिनीहरूका सट्टा उसले किल्‍लाहरूको एउटा देवतालाई मान गर्नेछ, आफ्‍ना पिता-पुर्खाले नजानेको देवतालाई सुन र चाँदी, बहुमूल्‍य पत्‍थरहरू र दामी उपहारहरू चढ़ाएर मान गर्नेछ।

³⁹उसले एक विदेशी देवताको सहायताले सबैभन्‍दा शक्तिशाली किल्‍लाहरूमाथि आक्रमण गर्नेछ र उसलाई मान्‍नेहरूलाई उसले ठूलो सम्‍मान गर्नेछ। उसले उनीहरूलाई धेरै मानिसहरूमाथि शासकहरू तुल्‍याउनेछ र एउटा मूल्‍यमा जमिन वितरण गर्नेछ।

⁴⁰“अन्‍तको समयमा दक्षिणका राजाले ऊसँग लड़ाइँ गर्नेछन्, र उत्तरको राजा रथहरू, घोड़चढ़ीहरू र धेरै जहाजहरू लिएर उनको विरुद्धमा आँधीझैँ आउनेछ। उसले धेरै देशहरूलाई आक्रमण गर्नेछ, ऊ बाढ़ीझैँ तिनीहरूमाथि बग्‍नेछ।

⁴¹उसले त्‍यस सुन्‍दर देशलाई पनि हमला गर्नेछ। धेरै देशहरूको पतन हुनेछ, तर एदोम, मोआब र अम्‍मोनका अगुवाहरूचाहिँ उसको हातबाट बचाइनेछन्‌।

⁴²उसले धेरै देशहरूमाथि आफ्‍नो शक्ति फैलाउनेछ, मिश्रदेश उम्‍कनेछैन।

⁴³उसले लिबियालीहरू र कूशीहरूलाई अधीनमा पारेर मिश्रदेशका सुन र चाँदी र सबै सम्‍पत्तिहरू आफ्‍नो नियन्‍त्रणमा लिनेछ।

⁴⁴तर पूर्व र उत्तरबाट आएका खबरहरूले उसलाई तर्साउनेछन्‌ र ऊ अति क्रोधित भएर धेरैलाई विनाश र नामेट पार्न अगि बढ्‌नेछ।

⁴⁵उसले त्‍यस सुन्‍दर पवित्र पर्वतमा समुद्रहरूका बीचमा आफ्‍ना राजकीय पालहरू खड़ा गर्नेछ। तापनि उसको अन्‍त हुनेछ र कसैले पनि उसलाई सहायता गर्नेछैन।