Read Nepali New Revised Version, 2012 दानिएल 2 Bible Online

दानिएल 2 - Nepali New Revised Version, 2012 bible

दानिएल 2

¹आफ्‍नो शासनकालको दोस्रो वर्षमा नबूकदनेसरले सपनाहरू देखे। उनको मनमा छटपटी भयो र उनी सुत्‍न सकेनन्‌।

²यसकारण राजाले जादूगरहरू, मन्‍त्रतन्‍त्र गर्नेहरू, बिजुवाहरू र ज्‍योतिषीहरूलाई उनले देखेको सपना बताइदेऊन् भनी बोलाउने हुकुम गरे। जब तिनीहरू आए र राजाको सामु खड़ा भए,

³उनले तिनीहरूलाई भने, “मैले एउटा सपना देखेको छु। त्‍यसले मलाई विचलित बनाएको छ, र यसको अर्थ बुझ्‍न चाहन्‍छु।”

⁴तब ती ज्‍योतिषीहरूले आरमेइक भाषामा राजालाई उत्तर दिए, “महाराजा, अमर रहून्‌! हजूरका दासहरूलाई सपना बताइदिनुहोस्, र हामी त्‍यसको अर्थ बताउनेछौं।”

⁵राजाले ती ज्‍योतिषीहरूलाई जवाफ दिए, “मैले यही निर्णय गरेको छु: यदि तिमीहरूले मैले देखेको सपना र त्‍यसको अर्थ बताएनौ भने, तिमीहरू टुक्रा-टुक्रा पारिनेछौ र तिमीहरूका घरहरू उजाड़ पारिनेछन्‌।

⁶तर यदि तिमीहरूले मलाई सपना र त्‍यसको अर्थ बतायौ भने, मबाट तिमीहरूले उपहारहरू र इनामहरू तथा ठूलो सम्‍मान पाउनेछौ। यसकारण मलाई मेरो सपना र त्‍यसको अर्थ बताओ।”

⁷फेरि एक चोटि तिनीहरूले जवाफ दिए, ‘महाराजाले आफ्‍ना दासहरूलाई आफ्‍नो सपना बताइदिनुहोस्‌ र हामी त्‍यसको अर्थ खोलिदिनेछौं।”

⁸तब राजाले जवाफ दिए, “म निश्‍चित छु कि तिमीहरूले मबाट समय लिएर टार्ने कोशिश गर्दैछौ, किनभने मैले के निर्णय गरिसकेको छु भनेर तिमीहरूलाई थाहा भएको छ।

⁹यदि तिमीहरूले मलाई सपना बताएनौ भने तिमीहरूका लागि एउटै मात्र सजाय छ। यो परिस्‍थिति बद्‌लिएला भन्‍ने आशाले मलाई भ्रम र दुष्‍ट कुरा गर्ने तिमीहरूले मतो गरेका छौ। यसकारण मलाई सपना बताओ, अनि मलाई थाहा हुनेछ कि तिमीहरूले यसको अर्थ मलाई बताउन सक्‍नेछौ।

¹⁰ज्‍योतिषीहरूले राजालाई उत्तर दिए, “महाराजाले भन्‍नुभएको कुरा गर्न सक्‍ने पृथ्‍वीमा कोही छैन। जति महान्‌ र शक्तिशाली भए पनि कुनै राजाले कुनै जादूगर वा मन्‍त्रतन्‍त्र गर्ने वा ज्‍योतिषीहरूसँग यस्‍तो कुरा कहिल्‍यै माग गरेका छैनन्‌।

¹¹महाराजाले गर्नुभएको यो प्रश्‍न अति नै गाह्रो छ। महाराजालाई यो कुरा देवताहरूबाहेक अरू कसैले पनि प्रकट गर्न सक्‍दैन। ती देवताहरू मानिसहरूका बीचमा बस्‍दैनन्‌।”

¹²यसले गर्दा राजा रीसले यति चूर भए कि उनले बेबिलोनका सबै ज्ञानी पुरुषहरूलाई मृत्‍युदण्‍ड दिने हुकुम गरे।

¹³यसरी ज्ञानी पुरुषहरूलाई मृत्‍युदण्‍ड दिने घोषणा निस्‍क्‍यो र दानिएल र तिनका साथीहरूलाई पनि मार्न भनी तिनीहरूलाई झिकाउन मानिसहरू पठाइए।

¹⁴जब राजाका अङ्गरक्षकका कप्‍तान अर्योक बेबिलोनका ज्ञानी पुरुषहरूलाई मार्न निस्‍के, दानिएलले बुद्धिमानी र बड़ो निपुणतासाथ उनलाई प्रश्‍न गरे,

¹⁵“राजाले किन यस्‍तो कठोर आदेश निकाल्‍नुभयो?” तब अर्योकले दानिएललाई सबै कुरा बताइदिए।

¹⁶यो सुनेर दानिएल राजाकहाँ गए र सपनाको अर्थ खोल्‍नलाई समय पाऊँ भनी बिन्‍ती गरे।

¹⁷तब दानिएल आफ्‍नो घर फर्के र आफ्‍ना साथीहरू हनन्‍याह, मीशाएल र अजर्याहलाई सो कुरा बताइदिए।

¹⁸बेबिलोनका अरू ज्ञानी पुरुषहरूका साथमा तिनी र तिनका साथीहरू नमारिऊन्‌ भन्‍ने खातिर यो रहस्‍य खोल्‍न स्‍वर्गका परमेश्‍वरको कृपा मिलोस्‌ भनी तिनले आफ्‍ना साथीहरूलाई उहाँसँग प्रार्थना गर्न अनुरोध गरे।

¹⁹राती दर्शनमा दानिएललाई यसको रहस्‍य प्रकट गरियो। तब दानिएलले स्‍वर्गका परमेश्‍वरलाई प्रशंसा गरे,

²⁰र भने, परमेश्‍वरको नाउँ सदासर्वदै धन्यको होऊन्। बुद्धि र पराक्रम उहाँकै हुन्‌।

²¹उहाँले नै समय र ऋतुहरू परिवर्तन गर्नुहुन्‍छ। उहाँले राजाहरूलाई सिंहासनमा राख्‍नुहुन्‍छ र उनीहरूलाई अपदस्‍थ गर्नुहुन्‍छ। उहाँले समझदारहरूलाई बुद्धि दिनुहुन्‍छ अनि विवेकीहरूलाई ज्ञान दिनुहुन्‍छ।

²²उहाँले गहिरा र लुकिएका कुराहरू प्रकट गर्नुहुन्‍छ, उहाँले अन्‍धकारमा के छ भनी जान्‍नुहुन्‍छ, र ज्‍योतिले उहाँमा वास गर्छ।

²³हे मेरा पिता-पुर्खाका परमेश्‍वर, तपाईंलाई म धन्‍यवाद दिँदछु र तपाईंको प्रशंसा गर्दछु, तपाईंले मलाई बुद्धि र शक्ति दिनुभएको छ, हामीले मागेको कुरा तपाईंले मलाई प्रकट गर्नुभयो, तपाईंले हामीलाई राजाको सपना प्रकट गर्नुभयो।”

²⁴तब दानिएल बेबिलोनका ज्ञानी पुरुषहरूलाई मार्न भनी राजाले खटाएका अर्योककहाँ गएर उनलाई भने, “बेबिलोनका ज्ञानी पुरुषहरूलाई नमार्नुहोस्‌। मलाई राजाकहाँ लैजानुहोस्‌ र म उहाँलाई उहाँको सपनाको अर्थ बताइदिनेछु।”

²⁵अनि अर्योकले दानिएललाई तुरुन्‍तै राजाकहाँ लगे र भने, “यहूदाबाट आएका प्रवासीहरूमध्‍ये एक जना मानिसलाई मैले भेट्टाएको छु, जसले राजालाई सपनाको अर्थ बताउन सक्‍छ।”

²⁶राजाले दानिएललाई (जसको नाउँ बेलतसजर पनि हो) सोधे, “के तिमी मेरो सपना र त्‍यसको अर्थ बताउन सक्‍छौ?”

²⁷दानिएलले जवाफ दिए, “महाराजाले सोध्‍नुभएको रहस्‍यको कुरा कुनै पनि ज्ञानी पुरुष, मन्‍त्रतन्‍त्र गर्ने, जादूगर वा जोखना हेर्नेले बताउन सक्‍दैन,

²⁸तर स्‍वर्गमा एक परमेश्‍वर हुनुहुन्‍छ, जसले रहस्‍यका कुराहरू प्रकट गर्नुहुन्‍छ। उहाँले महाराजा नबूकदनेसरलाई भविष्‍यमा हुने कुराहरू देखाउनुभएको छ। हजूर ओछ्यानमा ढल्‍किरहनुहुँदा हजूरको मनमा भएका सपना र दर्शनहरू यी नै हुन्‌:

²⁹“हे महाराजा, हजूर ओछ्यानमा ढल्‍किरहनुभएको बेला हजूरको मन भविष्‍यमा के हुने होला भन्‍ने तर्फ गयो, र रहस्‍य प्रकट गर्नुहुनेले भविष्‍यमा हुने कुरा देखाउनुभएको छ।

³⁰तर जसै मलाई यो रहस्‍य खोलिएको छ, अरू जीवित प्राणीहरूभन्‍दा ममा बढ्‌ता बुद्धि भएको कारणले होइन तर यसैकारण कि हजूर महाराजालाई सपनाको अर्थ खोलिओस्‌ र हजूरको आफ्‍नो मनमा भएका कुरा बुझ्‍न सक्‍नुभएको होस्‌ भनेर हो।

³¹“हे महाराजा, हजूरले हेरिरहनुहुँदा एउटा ठूलो सालिक उभिएको देख्‍नुभयो। यो सालिक विशाल र अत्‍यन्‍तै चहकिलो देखिन्‍थ्‍यो र त्‍यसको रूप भयानक थियो।

³²त्‍यस सालिकको टाउको निक्‍खर सुनको, त्‍यसका छाती र हातहरू चाँदीका, त्‍यसका पेट र तिघ्राहरू काँसाका,

³³त्‍यसका गोड़ाहरू फलामका, र त्‍यसका खुट्टाहरू केही फलाम र केही माटोका थिए।

³⁴हजूरले हेरिरहनुहुँदा चट्टानबाट एउटा ढुङ्गा काटियो, तर मानिसको हातद्वारा होइन। यसले त्‍यस सालिकका फलाम र माटोले बनेका खुट्टालाई हान्‍यो र ती चकनाचूर पारिदियो।

³⁵त्‍यसपछि त्‍यो फलाम, काँसो, चाँदी र सुन सबै एकै चोटि धूलोपीठो भए, र ग्रीष्‍म ऋतुमा अन्‍न चुट्‌ने खलाबाट भुसलाई उड़ाएझैँ बतासले त्‍यसलाई नाउँनिशानै नहुने गरी उड़ाएर लग्‍यो। तर त्‍यस सालिकलाई हान्‍ने त्‍यो ढुङ्गा बढ्‌दैगएर ठूलो पहाड़ बन्‍यो र पूरै पृथ्‍वीलाई ढाकिदियो।

³⁶“सपना यही थियो, र अब महाराजालाई यसको अर्थ बताउनेछौं।

³⁷हजूर नै राजाहरूका महाराजा हुनुहुन्‍छ। स्‍वर्गका परमेश्‍वरले हजूरलाई राज्‍य, पराक्रम, शक्ति र महिमा दिनुभएको छ।

³⁸हजूरको हातमा उहाँले सारा पृथ्‍वीका मानिसहरू र पशुहरू र आकाशका पक्षीहरू दिनुभएको छ। जहाँ-जहाँ उनीहरू बस्‍छन्, उहाँले हजूरलाई उनीहरूमाथि अधिकार गर्न दिनुभएको छ। हजूर नै त्‍यो सुनको टाउको हुनुहुन्‍छ।

³⁹“हजूरपछि, हजूरको भन्‍दा अलि कमजोर राज्‍य खड़ा हुनेछ। त्‍यसपछि काँसोको तेस्रो राज्‍यले सारा पृथ्‍वीमाथि अधिकार जमाउनेछ।

⁴⁰अन्‍त्‍यमा, फलामजस्‍तै बलियो चौथो राज्‍य आउनेछ, किनभने फलामले सबै थोक चकनाचूर पारिदिएझैँ त्‍यसले अरू सबैलाई तोड़फोड़ गरी तितरबितर पार्नेछ।

⁴¹हजूरले यसका खुट्टा र औँलाहरू केही माटोले, केही फलामले बनेका देख्‍नुभएझैँ यो विभाजित राज्‍य हुनेछ, तैपनि यसमा केही मात्रामा फलामको बल हुनेछ, जसरी हजूरले फलाम माटोसित मिसिएको देख्‍नुभयो।

⁴²जसरी ती औँलाहरू केही फलाम र केही माटोका थिए, त्‍यसरी नै यो राज्‍य केही बलियो, केही सजिलैसित टुक्रिने हुनेछ।

⁴³र हजूरले फलाम माटोमा मिसिएको देख्‍नुभएझैँ मानिसहरू पनि मिश्रित जाति हुनेछन्‌ र एकतामा रहनेछैनन्, जसरी फलाम माटोसित मिल्‍न सक्‍दैन।

⁴⁴“यी राजाहरूको समयमा स्‍वर्गका परमेश्‍वरले एउटा राज्‍य खड़ा गर्नुहुनेछ, जुनचाहिँ कहिल्‍यै नष्‍ट हुनेछैन, न त यसको सार्वभौमिकता अरू कुनै जातिको हातमा दिइनेछ। यसले यी सबै राज्‍यहरूलाई चकनाचूर पार्नेछ र अन्‍त्‍य गर्नेछ, तर यो राज्‍यचाहिँ सदासर्वदा रहिरहनेछ।

⁴⁵हजूरले देख्‍नुभएको ढुङ्गाको अर्थ यही हो, जुनचाहिँ मानिसको हातद्वारा नकाटिईकनै पहरोबाट आएको थियो— त्‍यो ढुङ्गा जसले फलाम, काँसो, माटो, चाँदी र सुनलाई धूलोपीठो पारिदियो। “महान्‌ परमेश्‍वरले महाराजालाई भविष्‍यमा हुने कुराहरू देखाउनुभएको छ। त्‍यो सपना सत्‍य हो, र यसको अर्थ विश्‍वासयोग्‍य छ।”

⁴⁶तब राजा नबूकदनेसरले दानिएलको अगाड़ि घोप्‍टो परी दण्‍डवत्‌ गरे र तिनलाई आदर गरे, र साथै तिनलाई भेटी र धूप चढ़ाउन भनी हुकुम गरे।

⁴⁷राजाले दानिएललाई भने, “साँच्‍ची नै तिमीहरूका परमेश्‍वर देवताहरूका पनि परमेश्‍वर र राजाहरूका प्रभु र रहस्‍य खोलिदिनुहुने हुनुहुन्‍छ, किनभने तिमीले यो रहस्‍य खोल्‍न सक्‍यौ।”

⁴⁸तब राजाले दानिएललाई उच्‍च पदमा राखे र धेरै बहुमूल्‍य उपहारहरू दिए। उनले तिनलाई बेबिलोनका समस्‍त प्रदेशमाथि शासक बनाए र त्‍यहाँका सबै ज्ञानी पुरुषहरूका प्रधान तुल्‍याए।

⁴⁹त्‍यसबाहेक दानिएलको अनुरोधमा राजाले शद्रक, मेशक र अबेद्‌नगोलाई बेबिलोनको प्रदेशमाथि प्रशासक नियुक्त गरे। दानिएल आफैचाहिँ राजदरबारमै रहे।