Read Nepali New Revised Version, 2012 दानिएल 5 Bible Online

दानिएल 5 - Nepali New Revised Version, 2012 bible

दानिएल 5

¹बेलसजर राजाले आफ्‍ना एक हजार जना भारदारहरूलाई एक ठूलो भोज दिए र उनीहरूसित उनले दाखमद्य पिए।

²दाखमद्य पिउँदैगर्दा बेलसजर राजाले आफू, आफ्‍ना भारदारहरू, आफ्‍ना श्रीमतीहरू र रखौटीहरूले दाखमद्य पिउनलाई उनका पिता नबूकदनेसरले यरूशलेमको मन्‍दिरबाट ल्‍याएका सुन र चाँदीका भाँड़ाकुँड़ाहरू त्‍यहाँ ल्‍याउने हुकुम गरे।

³यसकारण उनीहरूले सुनका भाँड़ाहरू ल्‍याए, जुनचाहिँ यरूशलेममा भएको परमेश्‍वरको मन्‍दिरबाट ल्‍याइएका थिए, र राजा र उनका भारदारहरू, उनका श्रीमतीहरू र रखौटीहरूले तीबाट पिए।

⁴जसै उनीहरूले दाखमद्य पिए, उनीहरूले सुन र चाँदीका, काँसो, फलाम, काठ र ढुङ्गाका देवताहरूको प्रशंसा गरे।

⁵अचानक राजदरबारमा भएको पानसको नजिक एक मानव हातका औँलाहरू देखा परे र लिपिएको भित्तामा लेख्‍न लागे। त्‍यो लेख्‍दैगरेको हात राजाले हेरे।

⁶उनको अनुहार पहेँलो भयो, र उनी यति डराए कि उनका घुँड़ाहरू कामेर ठोकिन थाले र गोड़ाहरू लल्‍याकलुलुक भए।

⁷राजाले मन्‍त्रतन्‍त्र गर्नेहरू, ज्‍योतिषीहरू र जोखना हेर्नेहरूलाई बोलाउन लगाए र बेबिलोनका यी ज्ञानी पुरुषहरूलाई भने, “जसले यो लेख पढ्‌छ र यसको अर्थ मलाई बताइदिन्‍छ, त्‍यसलाई बैजनी पोशाक पहिराइनेछ र त्‍यसको गलामा सुनको सिक्री लगाइनेछ र त्‍यसलाई राज्‍यको तेस्रो उच्‍च शासक बनाइनेछ।”

⁸तब राजाका सबै ज्ञानी पुरुषहरू आए, तर उनीहरूले यो लेख पढ्‌न वा त्‍यसको अर्थ राजालाई बताउन सकेनन्‌।

⁹यसकारण राजा बेलसजर अझ भयभीत भए र उनको अनुहार अझ पहेँलो हुँदैगयो। उनका भारदारहरू अलमल्‍ल परे।

¹⁰राजा र उनका भारदारहरूका स्‍वर सुनेर रानी भोजको कोठामा आइन्‌ र तिनले भनिन्, “महाराजा अमर रहून्‌! नआत्तिनुहोस्‌। यस्‍तो पहेँलो अनुहार नबनाउनुहोस्‌।

¹¹तपाईंको राज्‍यमा एक जना मानिस छन्, जोसँग पवित्र देवताहरूका आत्‍मा छ। तपाईंका पिताको पालोमा उनमा देवताको जस्‍तै अन्‍तर्दृष्‍टि, ज्ञान र बुद्धि पाइएको थियो। तपाईंका पिता राजा नबूकदनेसरले उनलाई जादूगरहरू, मन्‍त्रतन्‍त्र गर्नेहरू, ज्‍योतिषीहरू र जोखना हेर्नेका प्रमुख नियुक्त गर्नुभएको थियो।

¹²यी दानिएल नाउँ गरेका मानिस, जसलाई राजाले बेलतसजर भन्‍नुहुन्‍थ्‍यो, तीव्र मन र ज्ञान र समझ भएका भेट्टाइए र साथै उनले सपनाका अर्थ बताउन, अड्‌कोहरू फुकाउन र कठिन समस्‍याहरू हल गर्न पनि सक्‍थे। दानिएललाई बोलाउनुहोस्, र उनले तपाईंलाई यस लेखको अर्थ बताउनेछन्‌।”

¹³यसकारण दानिएललाई राजाको सामुन्‍ने उपस्‍थित गराइयो अनि राजाले तिनलाई भने, “के तिमी दानिएल, देशनिकाला गरिएकामध्‍ये एक हौ, जसलाई राजा, मेरा पिताले यहूदाबाट ल्‍याउनुभएको थियो?

¹⁴मैले सुने, तिमीमा देवताहरूको आत्‍मा छ, र तिमी अन्‍तर्दृष्‍टि, ज्ञान र बिछट्ट बुद्धि भएका मानिस छौ अरे।

¹⁵ज्ञानी पुरुषहरू र मन्‍त्रतन्‍त्र गर्नेहरू यो लेख पढ्‌न र मलाई यसको अर्थ बताउन मेरो सामु ल्‍याइए। तर उनीहरूले यो बताउन सकेनन्‌।

¹⁶अब मैले सुनेको छु कि तिमी अर्थ खोल्‍न र कठिन समस्‍याहरू समाधान गर्न सक्‍छौ। यदि तिमीले यो लेख पढ्‌न र यसको अर्थ बताउन सक्‍छौ भने, तिमीलाई बैजनी पोशाक पहिराइनेछ र गलामा सुनको सिक्री लगाइनेछ र राज्‍यमा तिम्रो स्‍थान तेस्रो हुनेछ।”

¹⁷तब दानिएलले राजालाई उत्तर दिए, “हजूरका उपहारहरू हजूर आफै राख्‍नुहोस्‌ र हजूरका इनामहरू अरू कसैलाई दिनुहोस्‌। तापनि महाराजाको लागि यो लेखोट पढ़िदिनेछु र यसको अर्थ बताइदिनेछु।

¹⁸“हे महाराजा, सर्वोच्‍च परमेश्‍वरले हजूरका पिता नबूकदनेसरलाई स्‍वाधीन राज्‍य र महानता र महिमा र गौरव दिनुभयो।

¹⁹उहाँले उनलाई उच्‍च स्‍थान दिनुभएकोले र प्रत्‍येक भाषा बोल्‍ने सबै मानिसहरू र जातिहरूले उनको डर र भय मान्‍थे। राजाले जसको प्राण लिन चाहन्‍थे, लिन्‍थे, जसलाई बाँकी राख्‍न चाहन्‍थे, राख्‍थे, जसलाई पदोन्‍नति गर्न चाहन्‍थे, पदोन्‍नति गर्थे, र जसलाई होच्‍याउन चाहन्‍थे, होच्‍याउँथे।

²⁰तर जब उनको हृदय घमण्‍डले हठी र कठोर भयो, उनलाई राजगद्दीबाट हटाइयो र उनको महिमा उनीबाट खोसियो।

²¹उनलाई मानिसहरूबाट हटाइएर एउटा पशुको मन दिइयो। उनी वनका गधाहरूसँग बस्‍थे र गाईबस्‍तुले जस्‍तै घाँस खान्‍थे, र उनको शरीर आकाशको शीतले भिज्‍थ्‍यो, जबसम्‍म उनले मानिलिएनन्‌ कि मानिसका राज्‍यहरूमाथि सर्वोच्‍च परमेश्‍वरकै अधिकार छ र उहाँले इच्‍छा गर्नुभएकालाई त्‍यो दिनुहुन्‍छ।

²²“तर उनका छोरा, हजूर बेलसजरले यी सबै कुरा जान्‍दाजान्‍दै पनि आफूलाई नम्र बनाउनुभएन।

²³बरु स्‍वर्गका परमप्रभुको विरुद्धमा आफैलाई खड़ा गर्नुभएको छ। हजूरले उहाँको मन्‍दिरबाट भाँड़ाहरू हजूरकहाँ ल्‍याउन लगाउनुभयो, र हजूर र हजूरका भारदारहरू, हजूरका श्रीमतीहरू र रखौटीहरूले तीबाट दाखमद्य पिउनुभयो। हजूरले चाँदी र सुनका, काँसाका, फलामका, काठ र ढुङ्गाका देवताहरूको प्रशंसा गर्नुभयो, जो न देख्‍छन्‌ न सुन्‍छन्‌ न बुझ्‍छन्‌। तर हजूरले यी परमेश्‍वरको आदर गर्नुभएन, जसको हातमा हजूरको जीवन र हजूरका मार्गहरू छन्‌।

²⁴यसैकारण उहाँले यो लेखोट लेख्‍ने हात पठाउनुभयो।

²⁵“लेखिएको लेखोट यस्‍तो छ: मेने, मेने, टेकेल, पर्सिन

²⁶“यी शब्‍दहरूको अर्थ यही हो: मेने: [1] परमेश्‍वरले हजूरका राज्‍यका दिन गन्‍ती गर्नुभएको छ, र त्‍यसको अन्‍त गर्नुभएको छ।

²⁷टेकेल: [2] हजूर तराजूमा जोखिनुभएको छ, र हल्‍का भेट्टाइनुभएको छ।

²⁸पेरेस: [3] हजूरको राज्‍य विभाजन भई मादी र फारसीहरूलाई दिइएको छ।”

²⁹त्‍यसपछि बेलसजरको हुकुममा दानिएललाई बैजनी वस्‍त्र पहिराइयो। तिनको गलामा सुनको सिक्री लगाइयो, र तिनलाई राज्‍यको तेस्रो सर्वोच्‍च शासक भनी घोषणा गरियो।

³⁰त्‍यही रात बेबिलोनीहरूका [4] राजा बेलसजर मारिए,

³¹अनि मादी राजा दाराले बयसट्ठी वर्षको उमेरमा त्‍यो राज्‍य लिए।