Read Nepali New Revised Version, 2012 दानिएल 7 Bible Online

दानिएल 7 - Nepali New Revised Version, 2012 bible

दानिएल 7

¹बेबिलोनका राजा बेलसजरको पहिलो वर्षमा दानिएल आफ्‍नो ओछ्यानमा पल्‍टिरहँदा तिनले सपना र दर्शनहरू देखे। तिनले त्‍यस सपनाको सार लेखे।

²दानिएलले भने, “मेरो दर्शनमा राती मैले हेरिरहँदा मेरो अगि आकाशका चार बतासहरूले ठूलो समुद्रलाई मन्‍थन गरिएका थिए।

³एक-अर्काबाट फरक चार ठूला पशुहरू समुद्रबाट निस्‍के।

⁴“पहिलोचाहिँ सिंहजस्‍तै थियो, र त्‍यसका पखेटाहरू चीलका जस्‍तै थिए। त्‍यसका पखेटाहरू नचुँड़ाएसम्‍म मैले हेरिरहें, र त्‍यो मानिसजस्‍तै दुई खुट्टाले उभिने गरी जमिनबाट उठ्यो र त्‍यसलाई एक जना मानिसको हृदय दिइयो।

⁵“अनि मेरो अगि दोस्रो पशु थियो, जुनचाहिँ भालूजस्‍तै देखिन्‍थ्‍यो। त्‍यसलाई शरीरको एकपट्टिबाट उठाइयो, र त्‍यसको मुखको दाँतहरूका बीचमा तीन वटा करङहरू थिए। त्‍यसलाई यस्‍तो आज्ञा दिइयो: ‘उठ्‌ र खानसक्‍ने जत्ति मासु खा!’

⁶“त्‍यसपछि मैले हेरें, र त्‍यहाँ मेरो अगि अर्को पशु थियो, जुनचाहिँ चितुवाजस्‍तै देखिन्‍थ्‍यो। अनि त्‍यसको पिठिउँमा चराको जस्‍तै चार वटा पखेटाहरू थिए। त्‍यस पशुका चार वटा टाउकाहरू थिए, र त्‍यसलाई शासन गर्ने अधिकार दिइयो।

⁷“त्‍यसपछि राती दर्शनमा मैले देखें र मेरो अगि भयङ्कर र डरलाग्‍दो र अत्‍यन्‍तै शक्तिशाली चौथो पशु थियो। त्यसका ठूला-ठूला फलामका दाँतहरू थिए। त्‍यसले आफ्‍नो शिकारलाई चकनाचूर पारी खाइदिन्‍थ्‍यो र बाँकी रहेकालाई खुट्टाले कुल्‍चीमिल्‍ची पार्थ्‍यो। अघिका पशुहरूभन्‍दा त्‍यो फरक थियो र त्‍यसका दश वटा सीङहरू थिए।

⁸“जसै म ती सीङहरूका बारेमा विचार गर्दैथिएँ, मेरो अगि एउटा सानो सीङ थियो, जुनचाहिँ तिनीहरूमध्‍येबाट उम्रेको थियो, र पहिलेका सीङहरूमध्‍ये तीन वटाचाहिँ त्‍यसको सामु जरैसमेत उखेलिए। मानिसका आँखाजस्‍तै त्‍यस सीङका आँखा थिए, र अहङ्कारी कुरा गर्ने त्‍यसको मुख थियो।

⁹जसै मैले हेरें, सिंहासनहरू बसालिए, र अति प्राचीन आफ्‍नो सिंहासनमा बस्‍नुभयो। उहाँका लुगा हिउँजस्‍तै सेता थिए, उहाँको शिरको केश ऊनजस्‍तै सेतो थियो। उहाँको सिंहासनमा बलिरहेको आगोको ज्‍वाला थियो, र त्‍यसका चक्‍काहरूमा दन्‍केको आगो थियो।

¹⁰उहाँको सामुबाट आइरहेको आगोको एउटा नदी बगिरहेको थियो। हजारौँ हजारले उहाँको सेवा गर्थे; दश हजार गुणा दश हजार उहाँको सामु उभिएका थिए। न्‍यायको निम्‍ति अदालतको बैठक बसेको थियो, र पुस्‍तकहरू खोलिए।

¹¹“तब यो सीङ बोलिरहेको अहङ्कारपूर्ण शब्‍दहरूको कारणले गर्दा मैले त्‍यसलाई हेर्दैरहें। त्‍यो पशु मारिएर त्‍यसको शरीर नष्‍ट पारी आगोको ज्‍वालामा नफ्‍याँकिएसम्‍म मैले हेर्दैरहें।

¹²अरू पशुहरूको अधिकार खोसिएको थियो, तर केही समयको लागि तिनीहरूलाई बाँच्‍न दिइयो।

¹³“राती मैले मेरो दर्शनमा हेरें, र त्‍यहाँ मेरो सामु आकाशका बादलका साथ आइरहनुभएको एक जना मानिसको पुत्रजस्‍तै हुनुहुन्‍थ्‍यो। उहाँ ती अति प्राचीनकहाँ आउनुभयो, र उहाँकै सामु उपस्‍थित गराइनुभयो।

¹⁴उहाँलाई अधिकार, महिमा र सार्वभौमिक शक्ति दिइयो, र हरेक भाषा बोल्‍ने सबै मानिसहरू र जातिहरूले उहाँको आराधना गरे। उहाँको प्रभुत्‍व अनन्‍तसम्‍म रहने प्रभुत्‍व छ, जुनचाहिँ कहिल्‍यै टल्‍नेछैन, र उहाँको राज्‍य त्‍यो हो जुन कहिल्‍यै नष्‍ट हुनेछैन।

¹⁵“म, दानिएल, आत्‍मामा बेचैन भएँ, र मैले पाएका दर्शनहरूले मलाई विचलित तुल्‍याए।

¹⁶त्‍यहाँ उभिएकाहरूमध्‍ये एक जनाकहाँ म गएँ र यी सबै कुराको सत्‍य अर्थ बताउन अनुरोध गरें। “यसकारण उनले मलाई यी कुराको अर्थ बताइदिए:

¹⁷‘चार ठूला पशुहरूचाहिँ पृथ्‍वीमा खड़ा हुने चार राज्‍यहरू हुन्‌।

¹⁸तर सर्वोच्‍चका पवित्र जनहरूले यो राज्‍य पाउनेछन्‌ र सदासर्वदाको लागि अधिकार गर्नेछन्‌— हो, सदासर्वदाको लागि’।

¹⁹“तब मैले त्‍यो चौथो जनावरको साँचो अर्थ जान्‍न चाहें, जुनचाहिँ फलामका दाँत र काँसाका नङ्‌ग्रा भएको अरूभन्‍दा फरक र अत्‍यन्‍तै डरलाग्‍दो थियो— त्‍यो जनावर जसले आफ्‍नो शिकारलाई चपाएर खाइदियो र बाँकी रहेकालाई खुट्टाले कुल्‍चीमिल्‍ची पार्‍यो।

²⁰मैले त्‍यसको टाउकोमा भएका दश सीङका बारेमा र त्‍यहाँबाट निस्‍केको अर्को सीङको बारेमा पनि जान्‍न चाहें, जसको सामु तीमध्‍ये तीन वटा सीङ झरे— त्‍यो सीङ जो अरूभन्‍दा प्रभावशाली देखिन्‍थ्‍यो र जसका आँखा र अभिमानपूर्ण कुरा गर्ने मुख थिए।

²¹जसै मैले हेरें, त्‍यो सीङ पवित्र जनहरूका विरुद्ध लड़ाइँ गर्दैथियो र तिनीहरूलाई परास्‍त गर्दैथियो,

²²जबसम्‍म ती अति प्राचीन आएर सर्वोच्‍चका पवित्र जनहरूको पक्षमा इन्‍साफको घोषणा गरे, अनि समय आयो जब तिनीहरूले राज्‍य अधिकार गरे।

²³“तिनले मलाई यसरी बताए: ‘चौथो जनावरचाहिँ पृथ्‍वीमा देखा पर्ने चौथो राज्‍य हो। योचाहिँ अरू राज्‍यहरूभन्‍दा फरक हुनेछ र समस्‍त पृथ्‍वीलाई कुल्‍चीमिल्‍ची पारी निल्‍नेछ।

²⁴दश सीङहरू त्‍यस राज्‍यबाट आएका दश राजाहरू हुन्‌। त्‍यसपछि पहिलेको भन्‍दा फरक, अर्को राजा खड़ा हुनेछ। उसले तीन राजाहरूलाई दबाउनेछ।

²⁵उसले सर्वोच्‍चको विरुद्धमा बोल्‍नेछ र उहाँका पवित्र जनहरूलाई अत्‍याचार गर्नेछ र ठहर्‍याइएका समय र व्‍यवस्‍थाहरू फेर्न प्रयत्‍न गर्नेछ। पवित्र जनहरू साढ़े तीन वर्षसम्‍म [1] उसको हातमा सुम्‍पिइनेछन्‌।

²⁶“तर अदालत बस्‍नेछ, र त्‍यसको अधिकार खोसिनेछ र सदाको निम्‍ति पूर्ण रूपले नाश गरिनेछ।

²⁷तब सम्‍पूर्ण स्‍वर्गमुनिका राज्‍यहरूको सार्वभौमिकता, शक्ति र महानता सर्वोच्‍चका मानिसहरू, अर्थात्‌ पवित्र जनहरूलाई दिइनेछ। उहाँको राज्‍य अनन्‍तको राज्‍य हुनेछ, र सबै शासकहरूले उहाँको आराधना र आज्ञापालन गर्नेछन्‌।

²⁸“कुराको अन्‍त यही हो। म, दानिएल, मेरा विचारहरूले गर्दा अत्‍यन्‍तै बेचैन भएँ, र मेरो अनुहार पहेँलो भयो, तर मैले यो कुरा आफ्‍नो मनैमा राखें।”