Read Nepali New Revised Version, 2012 दानिएल 8 Bible Online

दानिएल 8 - Nepali New Revised Version, 2012 bible

दानिएल 8

¹अघिल्‍लो दर्शन मलाई देखा परेपछि, राजा बेलसजरको राज्‍यकालको तेस्रो वर्षमा म, दानिएलले एउटा अर्को दर्शन देखें।

²मेरो दर्शनमा मैले आफैलाई एलाम प्रदेशको शूशनको किल्‍लामा देखें; दर्शनमा म ऊलै नहरको छेउमा थिएँ।

³मैले हेरें, र मेरो सामु नहरको छेउमा उभिरहेको दुई सीङ भएको एउटा भेड़ा थियो, र ती सीङहरू लामा थिए। तीमध्‍ये एउटा अर्कोभन्‍दा लामो थियो, तर त्‍यो पछि उम्रेको थियो।

⁴त्‍यो भेड़ाले पश्‍चिम र उत्तर र दक्षिणतिर हानिरहेको मैले हेरें। त्‍यसको विरुद्धमा कोही पनि खड़ा हुन सकेन र कसैले पनि त्‍यसको शक्तिबाट छुटाउन सकेन। त्‍यसले जे इच्‍छा लाग्‍यो, त्‍यही गर्‍यो र महान्‌ बन्‍यो।

⁵जसै मैले यसबारे विचार गर्दैथिएँ, अचानक आँखाहरूका बीचमा एउटा विशेष सीङ भएको एउटा बोका जमिनलाई नछोइकन पूरा पृथ्‍वीलाई पार गर्दै पश्‍चिमबाट आयो।

⁶मैले देखेको नहरको छेउमा खड़ा भएको दुई सीङ्गे भेड़ातिर त्‍यो आयो र ठूलो झोँकले त्‍यसलाई हान्‍यो।

⁷रीसले चूर भई त्‍यसले भेड़ालाई आक्रमण गरी हानेर त्‍यसका दुई वटै सीङ भाँचिदिएको मैले देखें। त्‍यसको विरुद्ध खड़ा हुन त्‍यो भेड़ा शक्तिहीन थियो। त्‍यस बोकाले त्‍यसलाई जमिनमा पछारिदियो र त्‍यसमाथि टेक्‍यो, र त्‍यसको शक्तिबाट भेड़ालाई छुटाउन कसैले पनि सकेन।

⁸त्‍यो बोको अति ठूलो भयो, तर त्‍यसका शक्तिको चरम सीमामा त्‍यसको विशाल सीङ भाँचियो र त्‍यसको सट्टामा आकाशका चारै बतासतर्फ विशेष सीङहरू उम्रे।

⁹तिनीहरूमध्‍येबाट अर्को एउटा सीङ आयो, जो सानोबाट सुरु भयो तर दक्षिणतिर र पूर्वतिर र सुन्‍दर भूमितिर शक्तिशाली हुँदै बढ्‌दैगयो।

¹⁰स्‍वर्गका सेनाहरूसम्‍म नपुगुञ्‍जेल त्‍यो बढ्‌दैगयो, र त्‍यसले केही ताराका दललाई तल पृथ्‍वीमा खसाल्‍यो र तीमाथि खुट्टाले कुल्‍च्‍यो।

¹¹त्‍यसले आफैलाई राजकुमार जत्तिकै महान्‌ तुल्‍यायो। त्‍यसले उहाँबाट दैनिक बलिदान खोस्‍यो, र उहाँको पवित्रस्‍थान तल झारियो।

¹²विद्रोहको कारणले पवित्र जनहरूका सेना र दैनिक बलिदान त्‍यसलाई सुम्‍पियो। त्‍यसले गरेका सबै काममा त्‍यो सफल भयो, र सत्‍यलाई भूइँमा फ्‍याँकियो।

¹³त्‍यसपछि मैले एउटा पवित्र जनले बोलेको सुनें, र अर्का पवित्र जनले उनलाई भने, “यो दर्शन पूरा हुन कति समय लाग्‍ला— अर्थात्, दैनिक बलिदान, उजाड़ पार्ने विद्रोह, र पवित्रस्‍थान र सेनालाई खुट्टाले कुल्‍चिनेसम्‍बन्‍धी दर्शन पूरा हुन कति समय लाग्‍ला?”

¹⁴उनले मलाई भने, “दुई हजार तीन सय साँझ र बिहान लाग्‍नेछ, तब पवित्रस्‍थानको पून:अर्पण हुनेछ।”

¹⁵जसै म, दानिएल, दर्शन हेर्दैथिएँ र त्‍यो बुझ्‍न कोशिश गर्दैथिएँ, मानिसको रूपमा एक जना मेरो सामु उभिए।

¹⁶अनि मैले ऊलैबाट यसो भनेर बोलाएको मानिसको स्‍वर सुनें, “हे गब्रिएल, यस मानिसलाई दर्शनको अर्थ बताइदेऊ।”

¹⁷जसै तिनी म उभिएको ठाउँ नजिक आए, म डरले भयभीत भएर लम्‍पसार परें। तिनले मलाई भने, “हे मानिसको पुत्र, यो बुझ कि दर्शनले अन्‍तको समयलाई सङ्केत गर्दछ।”

¹⁸तिनले मसँग बोल्‍दैगर्दा, मेरो अनुहार भूइँमा थियो र म मस्‍त निद्रामा थिएँ। तब तिनले मलाई छोएर मेरो खुट्टामा उभ्‍याए।

¹⁹तिनले भने, “क्रोधको समयमा पछि के हुनेछ, म तिमीलाई बताउन लागिरहेछु, किनभने दर्शनले तोकिएको अन्‍तको समयलाई बताउँदछ।

²⁰तिमीले देखेको त्‍यस दुई सीङे भेड़ाले मादी र फारसका राजाहरूलाई जनाउँछ।

²¹त्‍यो रौँले ढाकेको बोकाचाहिँ ग्रीसको राजा हो, र त्‍यसका आँखाका बीचमा भएको ठूलो सीङ त्‍यसको प्रथम राजा हो।

²²त्‍यस भाँचिएको सीङको सट्टामा उम्रेका चार सीङहरूचाहिँ त्‍यसैबाट निस्‍केका चार राज्‍यहरू हुन्, तर पहिलो राज्‍यजस्‍तो ती बलिया हुनेछैनन्‌।

²³तिनीहरूका राज्‍यकालका पछिल्‍ला दिनहरूमा जब विद्रोहीहरूको दुष्‍टता चरम सीमामा पुगेको हुनेछ, तब एक जना हठी, षड्‌यन्‍त्रमा पोख्‍त राजा उठ्‌नेछ।

²⁴त्‍यो धेरै बलवान्‌ हुनेछ, तर त्‍यसको आफ्‍नो शक्तिले होइन। त्‍यसले अचम्‍मको विध्‍वंस ल्‍याउनेछ, र जे गर्छ त्‍यसमा सफल हुनेछ। त्‍यसले शक्तिशाली मानिसहरू र पवित्र जनहरूलाई नाश गर्नेछ।

²⁵त्‍यसले छललाई सफल पार्नेछ र आफैलाई उच्‍च ठान्‍नेछ। जब तिनीहरूले सुरक्षाको महसूस गर्छन्, त्‍यसले धेरैलाई नष्‍ट गर्नेछ र राजकुमारहरूका राजकुमारको विरुद्धमा त्‍यो खड़ा हुनेछ। तापनि त्‍यो नष्‍ट हुनेछ, तर कुनै मानिसको शक्तिद्वारा होइन।

²⁶“तिमीलाई दिइएको साँझहरू र बिहानहरूसम्‍बन्‍धी दर्शन सत्‍य छ, तर त्‍यो दर्शनलाई मोहोर लगाई बन्‍द गर, किनभने यो धेरै पछिको भविष्‍यसँग सम्‍बन्‍धित छ।”

²⁷म, दानिएल, अति थकित भएँ र केही दिनसम्‍म बिरामी भई पस्रिएँ। तब म उठेर राजाको कामधन्‍धामा लागें। दर्शनको कारण म व्‍याकुल भएँ, यो समझदेखि बाहिरको कुरा थियो।