Read Nepali New Revised Version, 2012 होशे 12 Bible Online

होशे 12 - Nepali New Revised Version, 2012 bible

होशे 12

¹एफ्राइमले बतास खान्‍छ, त्‍यसले सारा दिन पूर्वीय बतासलाई खेद्‌छ। त्‍यसले निरन्‍तर झूट र हिंसाको संख्‍या बढ़ाउँछ। त्‍यसले अश्‍शूरसित सन्‍धि गर्छ, र मिश्रदेशमा जैतूनको तेल पठाउँछ।

²यहूदाको विरुद्धमा परमप्रभुको एउटा आरोप छ। अनि याकूबलाई [1] तिनका चालअनुसार उहाँले दण्‍ड दिनुहुनेछ, र तिनका कामअनुसार उहाँले तिनलाई बदला दिनुहुनेछ।

³गर्भमा तिनले आफ्‍नो दाजुको कुर्कुच्‍चो पक्रे, र जवान भएपछि तिनले परमेश्‍वरसँग लड़न्‍त गरे।

⁴तिनले स्‍वर्गदूतसित लड़न्‍त गरे, र उनलाई जिते। तिनी रोए र उनीसित निगाहको निम्‍ति बिन्‍ती गरे। तिनले बेथेलमा उहाँलाई भेटे, र उहाँसँग तिनले बातचीत गरे—

⁵सर्वशक्तिमान्‌ परमप्रभु परमेश्‍वरसँगै। उहाँको नाउँ प्रसिद्ध छ।

⁶तर तिमीहरू आफ्‍ना परमेश्‍वरतिर फर्कनैपर्छ। प्रेम र न्‍याय कायम राख, र निरन्‍तर आफ्‍ना परमेश्‍वरको प्रतीक्षा गर।

⁷व्‍यापारीले छलको तराजू प्रयोग गर्छ, छल गर्न त्‍यो मन पराउँछ।

⁸एफ्राइमले यस कुराको घमण्‍ड गर्छ, “म असाध्‍य धनी छु, म धनाढ्य भएको छु। मेरा सारा धन-सम्‍पत्तिले गर्दा तिनीहरूले ममा कुनै अधर्म पाउनेछैनन्‌।”

⁹“म तेरा परमप्रभु परमेश्‍वर हुँ। मैले तँलाई मिश्रदेशदेखि ल्‍याएको छु। तेरा ठहराइएका चाड़का दिनमा झैँ म तँलाई फेरि पालहरूमा बस्‍न लाउनेछु।

¹⁰मैले अगमवक्ताहरूसित कुरा गरें, तिनीहरूलाई धेरै दर्शनहरू दिएँ, र तिनीहरूद्वारा मैले दृष्‍टान्‍तहरू दिएँ।”

¹¹के गिलाद दुष्‍ट छ? त्‍यसका मानिसहरू बेकामका छन्‌! के तिनीहरू गिलगालमा साँढ़ेहरूको बलि गर्छन्‌? तिनीहरूका वेदीहरू हलो जोतेका खेतमा ढुङ्गाका रासजस्‍तै हुनेछन्‌।

¹²याकूब भागेर अरामको देशमा गए। इस्राएलले एउटी पत्‍नीको निम्‍ति चाकरी गरे, र त्‍यसको ज्‍यालाको निम्‍ति भेड़ाहरू चराए।

¹³परमप्रभुले इस्राएललाई मिश्रदेशबाट निकालेर ल्‍याउन एक जना अगमवक्ता प्रयोग गर्नुभयो, र एक जना अगमवक्ताद्वारा उहाँले तिनको हेरचाह गर्नुभयो।

¹⁴तर एफ्राइमले उहाँलाई असाध्‍यै रीस उठाएको छ। त्‍यसका परमप्रभुले त्‍यसले बगाएको रगतको दोष त्‍यसमाथि रहन दिनुहुनेछ, र त्‍यसका अवहेलनाको निम्‍ति उहाँले बदला लिनुहुनेछ।