Read Nepali New Revised Version, 2012 होशे 4 Bible Online

होशे 4 - Nepali New Revised Version, 2012 bible

होशे 4

¹इस्राएलीहरू हो, परमप्रभुको वचन सुन, किनकि यस देशका बासिन्‍दाहरूमाथि परमप्रभुको आरोप छ: “यस देशमा विश्‍वस्‍तता छैन, प्रेम छैन र परमेश्‍वरको मान्‍यता पनि छैन।

²यहाँ सराप दिनु, झूट बोल्‍नु, हत्‍या, चोरी र व्‍यभिचार गर्नुबाहेक अरू केही छैन। तिनीहरू सबै सीमा नाघेर हत्‍यामाथि हत्‍या गर्छन्‌।

³यसैकारण यस देशले विलाप गर्छ, र यसमा बस्‍ने सबै क्षीण हुन्‍छन्, र वनका जन्‍तु, आकाशका पक्षी र समुद्रका माछाहरूसमेत पनि मरिरहेछन्‌।

⁴“तर कसैले आरोप नल्‍याओस्, कसैले कसैलाई दोष नलगाओस्, किनकि तिमीहरूका मानिसहरू पूजाहारीको विरुद्धमा दोष लगाउनेहरूजस्‍ता छन्‌।

⁵तिमीहरू रातदिन ठेस खान्‍छौ, र अगमवक्ताहरू पनि तिमीहरूसितै ठेस खान्‍छन्‌। यसरी तिमीहरूकी आमालाई म नाश गर्नेछु—

⁶मेरा प्रजा ज्ञानको कमीले गर्दा नष्‍ट भएका छन्‌। “तिमीहरूले ज्ञानलाई इन्‍कार गरेका हुनाले, म पनि तिमीहरूलाई मेरा पूजाहारी हुनदेखि इन्‍कार गर्नेछु। तिमीहरूले आफ्‍ना परमेश्‍वरको व्‍यवस्‍थालाई बेवास्‍ता गरेका हुनाले, म पनि तिमीहरूका छोराछोरीको बेवास्‍ता गर्नेछु।

⁷जति-जति पूजाहारीको संख्‍या बढ्‌दैगयो, त्‍यति-त्‍यति तिनीहरूले मेरो विरुद्धमा पाप गर्दैगए। तिनीहरूले आफ्‍नो गौरवलाई नीच कुरासँग साटे।

⁸तिनीहरू मेरा प्रजाका पापद्वारा पोसिन्‍छन्‌ र तिनका दुष्‍ट्याइँ मन पराउँछन्‌।

⁹जस्‍ता प्रजा त्‍यस्‍तै पूजाहारीहरू हुनेछन्‌। म दुवैलाई तिनीहरूका चालको निम्‍ति सजाय दिनेछु, र तिनीहरूका कामहरूको प्रतिफल तिनीहरूलाई दिनेछु।

¹⁰“तिनीहरूले खान त खानेछन्‌ तर अघाउनेछैनन्‌। तिनीहरूले वेश्‍यावृत्ति गर्नेछन्, तर तिनीहरूको संख्‍या बढ्‌नेछैन, किनभने वेश्‍यावृत्तिमा मन लगाउनलाई तिनीहरूले परमप्रभुलाई छोड़ेका छन्‌।

¹¹पुरानो दाखमद्य र नयाँ दाखमद्यतिर तिनीहरू लागेका छन्, जसले मेरा प्रजाको समझलाई नष्‍ट गर्दछन्‌।

¹²तिनीहरूले आफ्‍ना काठका मूर्तिसित सल्‍लाह लिन्‍छन्, र तिनीहरूले काठको लहुरोले जवाफ पाउँछन्‌। वेश्‍यावृत्ति गर्ने आत्‍माले तिनीहरूलाई भ्रममा पार्छ, र तिनीहरू आफ्‍ना परमेश्‍वरप्रति अविश्‍वासी भएका छन्‌।

¹³तिनीहरू पर्वतका टाकुराहरू हुँदो बलि चढ़ाउँदछन्, र असल छायाँ दिने फलाँट, लहरे-पीपल र तारपीनका रूखमुनि डाँड़ाहरूमा धूप बाल्‍छन्‌। यसकारण तिमीहरूका छोरीहरूले वेश्‍यावृत्ति गर्छन्, र तिमीहरूका बुहारीहरूले व्‍यभिचार गर्छन्‌।

¹⁴“तिमीहरूका छोरीहरू वेश्‍यावृत्तिमा लागे पनि म तिमीहरूका छोरीहरूलाई दण्‍ड दिनेछैनँ, र व्‍यभिचार गर्दा तिमीहरूका बुहारीहरूलाई म दण्‍ड दिनेछैनँ, किनभने पुरुषहरू आफै पनि वेश्‍यातिर लागेका छन्, र देवदासीहरूसित बलिदान चढ़ाउँदछन्‌। समझविनाका मानिसहरूको नाश हुने नै छ।

¹⁵“ए इस्राएल, तैंले व्‍यभिचार गरे तापनि यहूदा दोषी नहोस्‌। तिमीहरू गिलगालमा नजाओ, न बेथ-आवनमा जाओ, न ‘परमप्रभु जिउँदो भएझैँ’ भनेर शपथ खाओ।

¹⁶हठी कोरलीझैँ इस्राएलीहरू ढीट छन्‌। तब कसरी परमप्रभुले तिनीहरूलाई चरनमा थुमालाई चराएझैँ चराउनुहुनेछ र?

¹⁷“एफ्राइम मूर्तिहरूको साथी भएको छ। त्‍यसलाई छोड़िदेओ।

¹⁸तिनीहरूको मद्य शेष भइसक्‍दा पनि तिनीहरू वेश्‍यावृत्तिमा लागि नै रहन्‍छन्‌। तिनीहरूका शासकहरू अपमानका कामहरू रुचाउँछन्‌।

¹⁹आँधीले तिनीहरूलाई बेहेरेर लैजानेछ, र तिनीहरू आफ्‍ना बलिदानको कारणले गर्दा लज्‍जित हुनेछन्‌।”