Read Nepali New Revised Version, 2012 होशे 8 Bible Online

होशे 8 - Nepali New Revised Version, 2012 bible

होशे 8

¹“तुरही फुक! एउटा गरुड परमप्रभुको भवनमाथि उड्‌दैछ, किनभने मानिसहरूले मेरो करार भङ्ग गरेका छन्, र मेरो व्‍यवस्‍थाको विरुद्धमा बागी भएका छन्‌।

²इस्राएलले मलाई पुकारा गर्छ, ‘हे हाम्रा परमेश्‍वर, हामी इस्राएलीहरू तपाईंलाई मान्‍दछौं’।

³तर जे भलो छ त्‍यो इस्राएलले इन्‍कार गरेको छ। एउटा वैरीले त्‍यसलाई खेद्‌नेछ।

⁴तिनीहरूले मेरो स्‍वीकृतिविना राजाहरू नियुक्त गर्छन्, तिनीहरूले मेरो स्‍वीकृतिविना भारदारहरू नियुक्त गर्छन्‌। तिनीहरूले आफ्‍नै विनाशको निम्‍ति आफ्‍ना सुन र चाँदीबाट आफ्‍ना लागि मूर्ति बनाउँछन्‌।

⁵ए सामरिया, तेरो बाछाको मूर्ति मिल्‍काइदे। मेरो रीस तिनीहरूका विरुद्धमा दन्‍केको छ। तिनीहरू कहिलेसम्‍म शुद्ध हुनलाई असक्षम रहन्‍छन्‌?

⁶तिनीहरू इस्राएलका हुन्‌। यो बाछो कारीगरले बनाएको हो। त्‍यो त परमेश्‍वर होइन। सामरियाको त्‍यो बाछो टुक्रै-टुक्रा पारिनेछ।

⁷“तिनीहरू बतास छर्दछन्, र तिनीहरूले भुमरीको कटनी गर्नेछन्‌। डाँठमा केही बाला लाग्‍दैन, तिनीहरूको केही फसल रहनेछैन। त्‍यो पसाइहाले तापनि विदेशीहरूले त्‍यो निलिहाल्‍नेछन्‌।

⁸इस्राएल निलिहालियो। त्‍यो जाति-जातिहरूका बीचमा निकम्‍मा वस्‍तुझैँ भएको छ।

⁹वन-गधा एकलै यताउता हिँड़िरहेझैँ तिनीहरू अश्‍शूरमा गए। एफ्राइमले ज्‍यालामा आफ्‍ना प्रेमीहरूसँग आफूलाई बेचेको छ।

¹⁰तिनीहरूले आफैलाई जाति-जातिमा बेचे पनि म अब तिनीहरूलाई एकसाथ जम्‍मा गर्नेछु। शक्तिशाली राजाको अत्‍याचारमुनि तिनीहरू कमजोर भएर जानेछन्‌।

¹¹“एफ्राइमले पापबलिका धेरै वेदीहरूको संख्‍या बढ़ाए पनि ती त्‍यसको निम्‍ति पाप गर्ने वेदीहरू भएका छन्‌।

¹²मैले तिनीहरूका निम्‍ति धेरै विधिहरू मेरो व्‍यवस्‍थामा लेखें, तर तिनीहरूले तिनलाई पराई थोकजस्‍तै ठाने।

¹³मलाई दिइएका बलि तिनीहरू चढ़ाउँछन्‌ अनि मासु तिनीहरू खान्‍छन्, तर परमप्रभु तिनीहरूसँग खुशी हुनुहुन्‍न। अब उहाँले तिनीहरूको अधर्म सम्‍झना गरेर तिनीहरूका पापका निम्‍ति दण्‍ड दिनुहुनेछ। तिनीहरू मिश्रदेशमा फर्केर जानेछन्‌।

¹⁴इस्राएलले आफ्‍ना सृष्‍टिकर्तालाई बिर्सेर महलहरू बनाएको छ, यहूदाले धेरै सहरमा किल्‍लाहरू निर्माण गरेको छ। तर म तिनीहरूका सहरहरूमा आगो लगाइदिनेछु, र त्‍यसले त्‍यसका किल्‍लाहरू भस्‍म पार्नेछ।”