Read Nepali New Revised Version, 2012 होशे 9 Bible Online

होशे 9 - Nepali New Revised Version, 2012 bible

होशे 9

¹ए इस्राएल, नरमाओ। अरू जाति-जातिहरूझैँ आनन्‍दले नरमाओ, किनकि तिमी आफ्‍ना परमेश्‍वरप्रति अविश्‍वासी भएका छौ! अन्‍नको प्रत्‍येक खलामा वेश्‍यावृत्तिको ज्‍याला लिन तिमीलाई मन पर्छ।

²अन्‍नका खला र दाखबारीका कोलले मानिसहरूलाई खुवाउनेछैनन्, नयाँ दाखमद्य तिनीहरूका निम्‍ति अपुग हुनेछ।

³तिनीहरू परमप्रभुको देशमा बस्‍नेछैनन्‌। एफ्राइम मिश्रदेशमा फर्किजानेछ, र अश्‍शूरमा अशुद्ध खानेकुरा खानेछ।

⁴तिनीहरूले परमप्रभुको सामु अर्घको रूपमा दाखमद्य खनाउनेछैनन्, न त तिनीहरूका बलिदानले उहाँ प्रसन्‍न हुनुहुनेछ। यस्‍ता बलिदानहरू तिनीहरूका लागि मरेकाहरूका निम्‍ति शोक गर्नेको रोटीझैँ हुनेछ। ती खाने सबै अशुद्ध हुनेछन्‌। यस्‍ता भोजन तिनीहरूका आफ्‍नै लागि हुनेछ, त्‍यो परमप्रभुको मन्‍दिरमा आउनेछैन।

⁵तिमीहरूका नियुक्त चाड़हरूका दिन, परमप्रभुका उत्‍सवका दिनमा तिमीहरू के गर्नेछौ?

⁶तिनीहरू सर्वनाशदेखि भागे तापनि मिश्रदेशले तिनीहरूलाई बटुल्‍नेछ, र मोपका मानिसहरूले तिनीहरूलाई गाड्‌नेछन्‌। तिनीहरूका चाँदीको धन-सम्‍पत्ति काँढ़ाघारीले पुर्नेछ। तिनीहरूका पालहरू काँढ़ाका झाँगहरूले भरिनेछन्‌।

⁷दण्‍ड दिने दिनहरू नजिकै छन्, प्रतिशोधका दिनहरू आइरहेछन्‌। इस्राएलले त्‍यो थाहा पाऊन्‌। तिम्रा धेरै पाप र ठूलो वैरभावको कारणले तिम्रो लागि अगमवक्ताचाहिँ मूर्ख र आत्‍माले प्रेरित भएको मानिसचाहिँ बौलाहासरह हुनेछ।

⁸अगमवक्ता मेरा परमेश्‍वरको साथसाथै एफ्राइमको रखवाली गर्ने हो, तापनि त्‍यसका सबै बाटोमा पासोहरू थापिएका छन्, र त्‍यसका परमेश्‍वरको भवनमा त्‍यसप्रति दुश्‍मनी छ।

⁹गिबाका दिनमा झैँ तिनीहरू आफूले आफैलाई साह्रै भ्रष्‍ट पारेका छन्‌। परमेश्‍वरले तिनीहरूका अधर्मको सम्‍झना गर्नुहुनेछ। उहाँले तिनीहरूका पापको दण्‍ड दिनुहुनेछ।

¹⁰“मैले इस्राएललाई पाउनुचाहिँ उजाड़-स्‍थानमा दाख पाउनु बराबर थियो। मैले तिमीहरूका पिता-पुर्खालाई देख्‍नुचाहिँ नेभाराका अगौटे फल देख्‍नु बराबर थियो। तर जब तिनीहरू बाल-पोरमा गए, तब तिनीहरूले आफैलाई त्‍यस घिनलाग्‍दो मूर्तिमा अर्पण गरे, र तिनीहरूले रुचाएको मूर्तिझैँ तिनीहरू घिनलाग्‍दा भए।

¹¹एफ्राइमको गौरव पक्षी झैँ उड़िजानेछ। तिनीहरूमा न त कुनै जन्‍म, न कुनै गर्भवास, न गर्भधारण हुनेछ।

¹²तिनीहरूले छोराछोरी पाएर हुर्काए तापनि एउटै बालक पनि नरहने गरी म तिनीहरूलाई निस्‍सन्‍तान तुल्‍याउनेछु। हाय! तिनीहरूलाई, जब म तिनीहरूबाट फर्केर जानेछु!

¹³मैले एफ्राइमलाई टुरोसजस्‍तै सुन्‍दर स्‍थलमा रोपिएको देखें, तर एफ्राइमले आफ्‍नो छोराछोरीहरूलाई संहारको निम्‍ति डोर्‍याएर ल्‍याउनेछ।”

¹⁴हे परमप्रभु, तिनीहरूलाई दिनुहोस्‌— तपाईं तिनीहरूलाई के दिनुहुन्‍छ? तिनीहरूको गर्भ तुहोस्‌ र स्‍तन सुकिजाने होस्‌।

¹⁵“गिलगालमा गरेका तिनीहरूका सारा खराबीको कारण मैले तिनीहरूलाई घृणा गरें। तिनीहरूका पापका कामले गर्दा म तिनीहरूलाई मेरो भवनबाट लघारिदिनेछु। म तिनीहरूलाई अब कहिल्‍यै प्रेम गर्नेछैनँ। तिनीहरूका सबै अगुवाहरू बागीहरू हुन्‌।

¹⁶एफ्राइममाथि प्रहार परेको छ! तिनीहरूको जरो सुक्‍यो। तिनीहरूमा फल लाग्‍दैनन्‌। तिनीहरूले छोराछोरी जन्‍माए तापनि तिनीहरूका प्रिय बालकहरू म मार्नेछु।

¹⁷मेरा परमेश्‍वरले तिनीहरूलाई इन्‍कार गर्नुहुनेछ, किनभने तिनीहरूले उहाँका कुरा पालन गरेका छैनन्‌। जाति-जातिहरूका बीचमा तिनीहरू फिरन्‍तेहरू हुनेछन्‌।