Read Nepali New Revised Version, 2012 आमोस 4 Bible Online

आमोस 4 - Nepali New Revised Version, 2012 bible

आमोस 4

¹हे सामरिया डाँड़ामा बस्‍ने बाशानका गाई हो, तिमी स्‍त्रीहरू, जो गरीबहरूलाई थिचोमिचो गर्दछौ, र दरिद्रहरूलाई पेल्‍दछौ, र आफ्‍ना पतिहरूलाई भन्‍दछौ, “हामीहरूलाई केही पिउनलाई ल्‍याइदिनुहोस्‌।” तिमीहरू यो वचन सुन।

²परमप्रभु परमेश्‍वरले आफ्‍नो पवित्रताद्वारा यो शपथ खानुभएको छ, “हेर, समय निश्‍चय नै आउनेछ, जब तिमीहरूलाई अंकुसेले र तिमीहरूका बाँकी रहेकाहरूलाई बल्‍छीले समातेर लगिनेछन्‌।

³तिमीहरू हरेक जना पर्खालका धाँदाहरूका बीचबाट भएर सोझै जानेछौ, र तिमीहरू हर्मोनतिर फ्‍याँकिनेछौ,” परमप्रभु भन्‍नुहुन्‍छ।

⁴“बेथेलमा गएर पाप गर। गिलगालमा गएर अझ धेरै पाप गर। बिहानैपिच्‍छे तिमीहरूका भेटी ल्‍याओ र प्रत्‍येक तेस्रो वर्षमा आ-आफ्‍नो दशांश ल्‍याओ।

⁵खमिर हालेको रोटी धन्‍यवाद बलि चढ़ाओ, र स्‍वेच्‍छा बलिका लागि धाक लगाउँदै हिँड़, तिनको कारणले घमण्‍ड गर, किनकि तिमी इस्राएली हौ, तिमीहरूलाई त्‍यसै गर्न मन पर्छ,” परमप्रभु परमेश्‍वर भन्‍नुहुन्‍छ।

⁶“मैले हरेक सहरहरूमा तिमीहरूलाई रित्तो पेट र हरेक नगरमा रोटीको अभाव पारिदिएँ, तापनि तिमीहरू मतिर फर्केर आएका छैनौ,” परमप्रभु भन्‍नुहुन्‍छ।

⁷“कटनी गर्ने समय अझै अरू तीन महिना बाँकी रहँदै मैले तिमीहरूबाट वर्षा रोकें। मैले एउटा नगरमा वर्षाको पानी पठाइदिएँ, तर अर्कोमा पठाइनँ। एउटा खेतमा पानी पर्‍यो, अर्कोमा केही पनि परेन र त्‍यो सुक्‍यो।

⁸मानिसहरू नगर-नगर हुँदो पानीको लागि धरमरिँदै हिँड़े, तर पिउनलाई यथेष्‍ट पाएनन्, तापनि तिमीहरू मतिर फर्केका छैनौ,” परमप्रभु भन्‍नुहुन्‍छ।

⁹“मैले धेरै पल्‍ट तिमीहरूका बगैँचा र तिमीहरूका दाखबारीमा रोग र ढुसीद्वारा प्रहार गरें। तिमीहरूका नेभारा र भद्राक्षका रूखहरूलाई सलहहरूले सखाप पारे, तापनि तिमीहरू मतिर फर्केका छैनौ,” परमप्रभु भन्‍नुहुन्‍छ।

¹⁰“मैले तिमीहरूका बीचमा मिश्रदेशलाई गरेझैँ रूढ़ीहरू पठाएँ। मैले तिमीहरूका जवान मानिसहरूलाई तिमीहरूले पक्रेर ल्‍याएका घोड़ाहरूसमेत तरवारले मारें, र तिमीहरूका छाउनीको दुर्गन्‍ध तिमीहरूका नाकसम्‍मै भरिदिएँ, तापनि तिमीहरू मतिर फर्केका छैनौ,” परमप्रभु भन्‍नुहुन्‍छ।

¹¹“मैले तिमीहरूमध्‍ये कति जनालाई सदोम र गमोरालाई जस्‍तै गरी ध्‍वंस पारिदिएँ। तिमीहरू जलिरहेको आगोबाट झिकेको अगुल्‍टोजस्‍तै थियौ, तापनि तिमीहरू मतिर फर्केका छैनौ,” परमप्रभु भन्‍नुहुन्‍छ।

¹²“यसकारण हे इस्राएली हो, म तिमीहरूलाई यसो गर्नेछु, म यसो गर्न लागेको कारणले, हे इस्राएली हो, तिमीहरूका परमेश्‍वरसित भेट गर्न तिमीहरू तयार होओ।”

¹³जसले पर्वतहरूको आकार बनाउँछ, बतास सृजना गर्छ, मानिसहरूलाई आफ्‍ना विचार प्रकट गर्छ, प्रभातलाई अँध्‍यारो पार्छ र पृथ्‍वीका अल्‍गा-अल्‍गा ठाउँहरूमा हिँड्‌छ— सर्वशक्तिमान्‌ परमप्रभु परमेश्‍वर उहाँको नाउँ नै हो।