Read Nepali New Revised Version, 2012 आमोस 5 Bible Online

आमोस 5 - Nepali New Revised Version, 2012 bible

आमोस 5

¹हे इस्राएलका घराना हो, तिमीहरूका विषयमा मैले गरेको यो विलाप सुन:

²“कन्‍ये-केटी इस्राएल फेरि कहिल्‍यै नउठ्‌ने गरी लोटेकी छ, त्‍यो आफ्‍नै देशमा त्‍यागिएकी छ, त्‍यसलाई उठाउने कोही छैन।”

³परमप्रभु परमेश्‍वर यसो भन्‍नुहुन्‍छ: “जुन सहरबाट इस्राएलको निम्‍ति हजार जना बाहिर निस्‍कन्‍छन्, त्‍यसमा एक सय मात्र रहन्‍छन्‌। सय जना बाहिर निस्‍कनेका दश जना मात्र बाँच्‍नेछन्‌।”

⁴इस्राएलका घरानालाई परमप्रभु यसो भन्‍नुहुन्‍छ: “मलाई खोज र बाँच।

⁵बेथेललाई नखोज, गिलगालमा नजाओ, बेर्शेबामा यात्रा नगर, किनकि गिलगाल अवश्‍य निर्वासनमा जानेछ, र बेथेलचाहिँ केही न केहीको हुनेछ।”

⁶परमप्रभुको खोजी गर र बाँच, नत्रता उहाँ योसेफको घरानामा आगोजस्‍तै भएर जानुहुनेछ, र त्‍यसले भस्‍म पार्छ, र बेथेलमा त्‍यो निभाउने कोही हुनेछैन।

⁷न्‍यायलाई तीतो बनाउने र धर्मलाई माटोमा मिलाउने तिमीहरू हौ।

⁸(किरकिटी र मृगशिरा तारा-समूहलाई सृजनुहुने, र घोर अन्‍धकारलाई प्रभातकालको उज्‍यालोमा परिवर्तन गर्नुहुने, दिनलाई अँध्‍यारो पारेर रात बनाउनुहुने, जसले समुद्रको पानीलाई बोलाउनुहुन्‍छ र त्‍यसलाई जमिनमा खन्‍याउनुहुन्‍छ— उहाँको नाउँ परमप्रभु नै हो।

⁹उहाँले बलियाको विरुद्ध एक्‍कासि सर्वनाश ल्‍याउनुहुन्‍छ, र किल्‍लाबन्‍दी गरिएको सहर नाश गर्नुहुन्‍छ),

¹⁰न्‍यायालयमा बसेर हप्‍काउनेलाई तिमीहरू घृणा गर्छौ, र सत्‍य बोल्‍नेलाई पनि तिमीहरू घृणा गर्छौ।

¹¹तिमीहरू कङ्गालीलाई कुल्‍चन्‍छौ, र अन्‍न दिन तिनीहरूलाई करकाप गर्दछौ। यसैकारण ढुङ्गाका ठूला-ठूला घरहरू तिमीहरूले बनाए तापनि तिमीहरू तिनमा बस्‍नेछैनौ। तिमीहरूले लहलहाउँदो दाखबारी लगाए तापनि तिमीहरूले तिनका दाखमद्य पिउनेछैनौ।

¹²किनकि म जान्‍दछु, तिमीहरूका दोषहरू कति धेरै छन्, र तिमीहरूका पाप कति ठूला छन्‌। तिमीहरू धर्मात्‍माहरूलाई सताउँदछौ र घूस लिन्‍छौ। न्‍यायालयमा गरीबहरूलाई न्‍यायदेखि वञ्‍चित गर्छौ।

¹³यसैकारण बुद्धिमान्‌ मानिस यस्‍तो समयमा चूप लागिरहन्‍छ, किनकि समय खराब छ।

¹⁴भलाइको खोजी गर, खराबीको होइन, र तिमीहरू बाँचिरहो। तब तिमीहरूले भनेझैँ सर्वशक्तिमान्‌ परमप्रभु परमेश्‍वर तिमीहरूसँग रहनुहुनेछ।

¹⁵खराबीलाई घृणा, भलाइलाई प्रेम गर। न्‍यायालयमा न्‍याय कायम राख। शायद सर्वशक्तिमान्‌ परमप्रभु परमेश्‍वरले योसेफका बाँचेकाहरूमाथि कृपा गर्नुहुनेछ।

¹⁶यसकारण परमप्रभु, सर्वशक्तिमान्‌ परमप्रभु परमेश्‍वर यसो भन्‍नुहुन्‍छ: “सबै सड़कहरूमा रुवाबासी हुनेछ, र हरेक चोकमा तिनीहरूले हाय, हाय गर्नेछन्‌। किसानहरू विलाप गर्न र मलामीहरू शोक गर्न बोलाइनेछन्‌।

¹⁷सबै दाखबारीमा रुवाबासी हुनेछ, किनकि म तिमीहरूका बीचबाट भएर जानेछु,” परमप्रभु भन्‍नुहुन्‍छ।

¹⁸धिक्‍कार तिमीहरूलाई, जो परमप्रभुका दिनको अति इच्‍छा गर्दछौ! परमप्रभुका दिनको तिमीहरू किन इच्‍छा गर्दछौ? त्‍यो दिन त अन्‍धकार हुनेछ, उज्‍यालो होइन।

¹⁹सिंहदेखि भागेर कुनै मानिसको भालूसित भेट भएजस्‍तै, अथवा घरभित्र गएर आराम गर्नलाई भित्तामा हात राख्‍दा साँपले त्‍यसलाई डसेजस्‍तै त्‍यो दिन हुनेछ।

²⁰के परमप्रभुको दिन उज्‍यालो होइन तर अन्‍धकार हुँदैन र— पटक्‍कै उज्‍यालो नभएको निष्‍पट्ट अन्‍धकार?

²¹“तिमीहरूका धार्मिक चाड़हरूलाई म घृणा गर्दछु, तिमीहरूका सभाहरू म सहन सक्‍दिनँ।

²²तिमीहरूले मेरो निम्‍ति होमबलि र अन्‍नबलि चढ़ाए तापनि म ती ग्रहण गर्नेछैनँ। तिमीहरूले चढ़ाएका सबैभन्‍दा असल मेलबलिमाथि पनि म परवाह गर्नेछैनँ।

²³तिमीहरूका सङ्गीतहरूको हल्‍ला मदेखि टाढ़ा राख। म तिमीहरूका वीणाहरूका सङ्गीत सुन्‍न चाहन्‍नँ।

²⁴तर न्‍यायचाहिँ नदीझैँ र धार्मिकता कहिले नसुक्‍ने खोलाझैँ बगिरहोस्‌!

²⁵“इस्राएलका मानिस हो, के तिमीहरूले उजाड़-स्‍थानमा ती चालीस वर्षसम्‍म मलाई पशुबलि र भेटीहरू चढ़ायौ र?

²⁶तिमीहरूले आफ्‍नै निम्‍ति बनाएका राजाको तम्‍बू, तिमीहरूका मूर्तिहरूको थान, र तिमीहरूको तारा-देव उठाएका छौ।

²⁷यसकारण दमस्‍कसदेखि पनि पारि म तिमीहरूलाई निर्वासनमा पठाइदिनेछु,” परमप्रभु भन्‍नुहुन्‍छ, जसको नाउँ सर्वशक्तिमान्‌ परमेश्‍वर हो।