Read Nepali New Revised Version, 2012 आमोस 7 Bible Online

आमोस 7 - Nepali New Revised Version, 2012 bible

आमोस 7

¹परमप्रभु परमेश्‍वरले मलाई यो देखाउनुभयो: राजाका हिस्‍साको कटनी भइसकेपछि र दोस्रो बाली आउँदैगर्दा उहाँले सलहको बथान तयार गरिरहनुभएको थियो।

²जब तिनीहरूले भूमिको बालीनाली सखाप पारे, तब मैले भनें, “हे परमप्रभु परमेश्‍वर, क्षमा गर्नुहोस्‌। याकूब कसरी बाँच्‍न सक्‍छन्‌? किनकि तिनी त साह्रै साना छन्‌।”

³यस कुरामा परमप्रभु नरम हुनुभयो। “यसो हुनेछैन,” परमप्रभुले भन्‍नुभयो।

⁴परमप्रभु परमेश्‍वरले मलाई यो देखाउनुभयो: आगोद्वारा न्‍याय गर्न परमप्रभु परमेश्‍वरले ठहराउनुभयो। त्‍यस आगोले महासागरलाई सुकाएर जमिनलाई पनि भस्‍म पार्‍यो।

⁵तब मैले चिच्‍च्‍याएर भनेँ, “हे परमप्रभु परमेश्‍वर, बिन्‍ती छ, थाम्‍नुहोस्‌। याकूब कसरी खड़ा रहन सक्‍छन्‌? किनकि तिनी त साना छन्‌।”

⁶यस कुरामा परमप्रभु नरम हुनुभयो। “यसो हुनेछैन,” परमप्रभु परमेश्‍वरले भन्‍नुभयो।

⁷उहाँले मलाई यही देखाउनुभयो: साहुल लगाएर ठीक बनाएको भित्तानेर आफ्‍नो हातमा साहुल लिएर परमप्रभु उभिरहनुभएको रहेछ।

⁸परमप्रभुले मलाई भन्‍नुभयो, “आमोस, तँ के देख्‍दैछस्‌?” मैले जवाफ दिएँ, “एउटा साहुल।” तब परमप्रभुले भन्‍नुभयो, “हेर्, म मेरो प्रजा इस्राएलको बीचमा एउटा साहुल लगाइरहेछु। म तिनीहरूलाई अब बाँकी राख्‍नेछैनँ।

⁹इसहाकका अल्‍गा-अल्‍गा ठाउँहरू सर्वनाश गरिनेछन्, र इस्राएलका पवित्रस्‍थानहरू भग्‍नावशेष हुनेछन्‌। म तरवार लिएर यारोबामका घरानाको विरुद्धमा खड़ा हुनेछु।”

¹⁰तब बेथेलका पूजाहारी अमस्‍याहले इस्राएलका राजा यारोबामकहाँ समाचारवाहकलाई यसो भनेर पठाए, “इस्राएलका घरानाको बीचमा आमोसले तपाईंको विरुद्धमा एउटा षड्‌यन्‍त्र रचिरहेछ। यस देशले त्‍यसका सबै कुरा खप्‍न सक्‍दैन,

¹¹किनकि आमोसले यसो भनिरहेछ: ‘यारोबाम तरवारद्वारा मारिनेछन्, र इस्राएल निश्‍चय नै आफ्‍नो देशदेखि टाढ़ा कैदमा जानेछ’।”

¹²तब अमस्‍याहले आमोसलाई भने, “हे दर्शी, यहाँबाट भागेर यहूदामा जाऊ, र त्‍यहीँ रोटी खाऊ अनि आफ्‍नो अगमवाणी गर।

¹³बेथेलमा फेरि कहिल्‍यै अगमवाणी नगर, किनभने यो त राजाको शरणस्‍थान र राज्‍यको मन्‍दिर हो।”

¹⁴आमोसले अमस्‍याहलाई यो जवाफ दिए, “म त अगमवक्ता थिइनँ, र अगमवक्ताको छोरा पनि होइनँ। तर म एउटा गोठालो र अञ्‍जीरका रूखहरू हेरचाह गर्ने मानिस थिएँ।

¹⁵तर परमप्रभुले मलाई भेड़ाबाख्रा चराउनबाट बोलाउनुभयो, र मलाई भन्‍नुभयो, ‘जा, गएर मेरो प्रजा इस्राएललाई अगमवाणी कह’।

¹⁶यसैले अब परमप्रभुको वचन सुन। तिमी भन्‍छौ, ‘इस्राएलको विरुद्धमा अगमवाणी नकह, र इसहाकका घरानाको विरुद्धमा प्रचार गर्न छोड़िदेऊ’।

¹⁷यसकारण परमप्रभु यसो भन्‍नुहुन्‍छ: ‘तिम्री पत्‍नी सहरमा एउटी वेश्‍या हुनेछ, तिम्रा छोराछोरीहरू तरवारले काटिनेछन्, तिम्रो देश नापिनेछ र बाँड़िनेछ। तिमी आफैचाहिँ एउटा मूर्तिपूजक देशमा मर्नेछौ, र इस्राएलचाहिँ निश्‍चय नै आफ्‍नो देशबाट टाढ़ा निर्वासनमा लगिनेछ’।”