Read Nepali New Revised Version, 2012 आमोस 9 Bible Online

आमोस 9 - Nepali New Revised Version, 2012 bible

आमोस 9

¹मैले परमप्रभुलाई वेदीको छेउमा उभिरहनुभएको देखें, र उहाँले मलाई भन्‍नुभयो: “खम्‍बाका टुप्‍पा-टुप्‍पा हिर्का र सँघारहरू हल्‍लिऊन्‌। सबै मानिसहरूका शिरहरू काटिदे र बचेकाहरूलाई चाहिँ म तरवारले मार्नेछु। एकैजना पनि भाग्‍न पाउनेछैन, एक जना पनि उम्‍कन पाउनेछैन।

²तिनीहरूले चिहानको [1] गहिराइमा खनेर गए तापनि मेरो हातले तिनीहरूलाई त्‍यहाँबाट तानेर ल्‍याउनेछ। तिनीहरू माथि स्‍वर्गमा उक्‍ले तापनि म तिनीहरूलाई उँधो तानेर झार्नेछु।

³तिनीहरू कर्मेलको टाकुरामा लुके तापनि म त्‍यहाँबाट खोजी-खोजीकन तिनीहरूलाई पक्रनेछु। तिनीहरू मदेखि समुद्रको पीधमा लुके तापनि म तिनीहरूलाई डस्‍न सर्पलाई आज्ञा दिनेछु।

⁴तिनीहरू आ-आफ्‍ना शत्रुहरूद्वारा निर्वासित गरिए तापनि म तरवारलाई हुकुम गर्नेछु, र त्‍यसले तिनीहरूलाई मार्नेछ। भलाइको निम्‍ति होइन, तर खराबीको निम्‍ति म तिनीहरूमाथि नजर राख्‍नेछु।”

⁵सर्वशक्तिमान्‌ परमप्रभु परमेश्‍वर उहाँ नै हुनुहुन्‍छ, जसले पृथ्‍वीलाई छुनुहुँदा त्‍यो पग्‍लन्‍छ, र त्‍यसमा हुने सबैले विलाप गर्छन्, र सारा देश नील नदीझैँ बढ्‌छ, अनि मिश्रको नदीझैँ घट्‌छ।

⁶उहाँ, जसले आकाशमाथि आफ्‍नो वासस्‍थान बनाउनुहुन्‍छ, र पृथ्‍वीमा यसको जग बसाल्‍नुहुन्‍छ, जसले समुद्रको पानीलाई बोलाउनुहुन्‍छ र त्‍यसलाई जमिनभरि खन्‍याउनुहुन्‍छ— उहाँको नाउँ परमप्रभु नै हो।

⁷“के तिमी इस्राएलीहरू होइनौ, जो मेरो निम्‍ति कूशका सन्‍तानजस्‍तै छौ?” परमप्रभु भन्‍नुहुन्‍छ। “के मैले इस्राएललाई मिश्रदेशदेखि, पलिश्‍तीहरूलाई कप्‍तोरदेखि, [2] र अरामीहरूलाई कीरदेखि निकालेर ल्‍याएको होइनँ र?

⁸“परमप्रभुको नजर दुष्‍ट राज्‍यमाथि परेको छ। म त्‍यसलाई पृथ्‍वीदेखि नाश गर्नेछु, तापनि याकूबको घरानालाई म बिलकुलै सर्वनाश गर्नेछैनँ,” परमप्रभु भन्‍नुहुन्‍छ।

⁹“म आज्ञा गर्नेछु, र इस्राएलको घरानालाई समस्‍त जातिहरूका बीचमा अन्‍न नाङ्‌लोमा निफनेझैँ म चाल्‍नेछु, र एउटा सानो ढुङ्गाको टुक्रा पनि भूइँमा खस्‍नेछैन।

¹⁰‘विपत्ति हामीमाथि आइपर्नेछैन, न त हामीलाई त्‍यसले भेट्‌नेछ’ भन्‍ने मेरो प्रजामध्‍येका सबै पापीहरू तरवारले मारिनेछन्‌।

¹¹“त्‍यस दिन म दाऊदको ढलेको वासस्‍थानलाई पुनर्स्‍थापन गर्नेछु, र त्‍यसका प्‍वालहरू मरम्‍मत गर्नेछु। अनि भत्‍केको अवस्‍थाबाट त्‍यसलाई म खड़ा गर्नेछु र अघिजस्‍तै गरी म त्‍यसलाई निर्माण गर्नेछु,

¹²ताकि तिनीहरूले एदोमको बाँकी रहेका, र मेरो नाउँ भएका सबै जाति-जातिलाई अधिकार गरून्‌।” यसै नै गर्नुहुने परमप्रभु घोषणा गर्नुहुन्‍छ।

¹³“यस्‍ता दिन आउँदैछन्,” परमप्रभु भन्‍नुहुन्‍छ, “जब कटनी गर्नेलाई हलो जोत्‍नेले उछिन्‍नेछ, र बीउ छर्नेलाई दाख पेल्‍नेले उछिन्‍नेछ। पर्वतहरूबाट नयाँ दाखमद्य चुहुनेछ, र सबै डाँड़ाहरूबाट त्‍यो बग्‍नेछ।

¹⁴म मेरो निर्वासनमा गएका प्रजा इस्राएललाई फर्काएर ल्‍याउनेछु। ध्‍वंस भएका सहरहरूलाई तिनीहरूले फेरि निर्माण गरेर तिनमा वास गर्नेछन्‌। तिनीहरूले दाखबारीहरू लगाएर तिनका दाखमद्य पिउनेछन्‌। तिनीहरूले बगैँचाहरू बनाएर तिनका फलहरू खानेछन्‌।

¹⁵म इस्राएललाई तिनीहरूकै देशमा कहिल्‍यै नउखेलिने गरी बसाल्‍नेछु, जुन देश मैले तिनीहरूलाई दिएको छु,” परमप्रभु तिमीहरूका परमेश्‍वर भन्‍नुहुन्‍छ।