Read Nepali New Revised Version, 2012 योना 2 Bible Online

योना 2 - Nepali New Revised Version, 2012 bible

योना 2

¹योनाले माछाको पेटभित्रबाट परमप्रभु आफ्‍ना परमेश्‍वरलाई प्रार्थना गरे।

²तिनले भने, “मैले आफ्‍नो सङ्कष्‍टमा परमप्रभुमा पुकारा गरें, र उहाँले मलाई जवाफ दिनुभयो। चिहानको गहिराइबाट सहायताको निम्‍ति मैले पुकारें, र तपाईंले मेरो क्रन्‍दन ध्‍यानसित सुन्‍नुभयो।

³तपाईंले मलाई समुद्रको गहिराइभित्र, समुद्रको मुटुभित्रै फालिदिनुभयो, र प्रवाहहरू मेरा चारैतिर घुमे। तपाईंका सबै छालहरू र लहरहरूले मलाई डुबाए।

⁴मैले भनें, ‘म त तपाईंको दृष्‍टिबाट निकालिएको छु, तैपनि म फेरि तपाईंको पवित्र मन्‍दिरतिर हेर्नेछु’।

⁵डुबाउने पानीले मलाई तर्सायो, समुद्रको गहिराइ मेरो चारैतिर थियो, समुद्रका झ्‍याउहरू मेरो टाउकोभरि बेहेरिएका थिए।

⁶म त डाँड़ाहरूका फेदीसम्‍मै तल डुबें, पृथ्‍वीले मलाई सदाको निम्‍ति थुनिदियो। तर हे परमप्रभु मेरा परमेश्‍वर, तपाईंले मेरो ज्‍यानलाई खाल्‍डोबाट उठाएर ल्‍याउनुभयो।

⁷“जब मेरो प्राण गलिसकेको थियो, तब मैले, हे परमप्रभु, तपाईंलाई सम्‍झें, र मेरो प्रार्थना तपाईंकहाँ उठ्यो, तपाईंको पवित्र मन्‍दिरभित्रै पुग्‍यो।

⁸“जस-जसले व्‍यर्थका मूर्तिहरूतिर मन लगाउँछन्, तिनीहरूले पाउनुपर्ने अनुग्रहबाट तिनीहरू वञ्‍चित हुन्‍छन्‌।

⁹तर म त धन्‍यवादको स्‍तुतिसहित तपाईंमा बलिदान चढ़ाउनेछु। मैले जे भाकल गरेको छु, सो म पूरा गर्नेछु। उद्धार परमप्रभुबाटै हुन्‍छ।”

¹⁰तब परमप्रभुले माछालाई आज्ञा गर्नुभयो, र त्‍यसले योनालाई पाखामा उकेलिदियो।