Read Nepali New Revised Version, 2012 गन्ती 10 Bible Online

गन्ती 10 - Nepali New Revised Version, 2012 bible

गन्ती 10

¹परमप्रभुले मोशालाई भन्‍नुभयो,

²“दुई वटा चाँदीका तुरहीहरू बना। ती पिटेर बनाइएका होऊन्‌। समुदायलाई भेला गराउँदा र शिविरबाट प्रस्‍थान गर्दा ती प्रयोग गर्नू।

³ती दुवै फुक्‍दा सारा समुदाय भेट हुने पालको ढोकामा तँकहाँ भेला होऊन्‌।

⁴तर एउटा मात्र फुक्‍दा नेताहरू, अर्थात्‌ इस्राएलीहरूका कुलनायकहरू तँकहाँ भेला होऊन्‌।

⁵जब जनाउ-ध्‍वनि बजाइन्‍छ, तब पूर्वपट्टि भएका शिविरकाहरू प्रस्‍थान गरून्‌।

⁶जब दोस्रो पल्‍ट जनाउ-ध्‍वनि बजाइन्‍छ, तब दक्षिणपट्टि भएका शिविरकाहरू प्रस्‍थान गरून्‌। जनाउ-ध्‍वनि प्रस्‍थानको लागि सङ्केत हुनेछ।

⁷समुदाय भेला गर्ने समयमा पनि फुक्‍नू, तर जनाउ-ध्‍वनि उस्‍तै नहोस्‌।

⁸“हारूनका छोराहरू, पूजाहारीले नै तुरहीहरू फुक्‍ने गरून्‌। यो तिमीहरू र तिमीहरूका भावी पुस्‍ताका लागि अनन्‍तको विधि होस्‌।

⁹आफ्‍नै देशमा तिमीहरूमाथि थिचोमिचो गर्ने शत्रुका विरुद्धमा तिमीहरू लड़ाइँ गर्न जाँदा तिमीहरूले तुरहीद्वारा जनाउ-ध्‍वनि फुक्‍नू। तब परमप्रभु तिमीहरूका परमेश्‍वरको सामु तिमीहरूको सम्‍झना हुनेछ, र तिमीहरूका शत्रुहरूबाट तिमीहरूको रक्षा हुनेछ।

¹⁰तिमीहरूका हर्षका दिनमा— तिमीहरूका तोकिएका चाड़हरू र औंसीका चाड़हरूमा— आफ्‍ना होमबलि र मेलबलिहरू चढ़ाउँदा तिमीहरूले तुरही बजाउनू, र आफ्‍ना परमेश्‍वरको सामुन्‍ने ती तिमीहरूका सम्‍झनाको निम्‍ति होऊन्‌। म परमप्रभु तिमीहरूका परमेश्‍वर हुँ।”

¹¹दोस्रो वर्षको दोस्रो महिनाको बीसौँ दिनमा गवाहीको मण्‍डपमाथिबाट बादल हट्यो।

¹²सीनैको उजाड़-स्‍थानबाट प्रस्‍थान गरेर इस्राएलीहरू ठाउँ-ठाउँमा गए, र पारानको मरुभूमिमा आइपुगेपछि बादल अड़ियो।

¹³पहिलो पटक मोशाद्वारा परमप्रभुले दिनुभएको आज्ञाअनुसार तिनीहरूले आफ्‍नो यात्रा सुरु गरे।

¹⁴पहिले यहूदाका शिविरका दलहरू आफ्‍नो झन्‍डा उठाएर अगि बढ़े। अम्‍मीनादाबका छोरा नहशोनले दलहरूको नेतृत्‍व गरे।

¹⁵इस्‍साखारका कुलको दलअगि सूआरका छोरा नतनेल थिए।

¹⁶जबूलूनका कुलको दलअगि हेलोनका छोरा एलीआब थिए।

¹⁷तब पवित्र वासस्‍थान उठाइयो, र त्‍यो बोकेर गेर्शोनीहरू र मरारीहरू अगि बढ़े।

¹⁸त्‍यसपछि रूबेनको शिविरका दलहरू आफ्‍नो झन्‍डा उठाएर अगि बढ़े। शदेऊरका छोरा एलीसूरले दलहरूको नेतृत्‍व गरे।

¹⁹शिमियोनका कुलको दलअगि सूरीशद्दैका छोरा शलूमीएल थिए,

²⁰अनि गादका कुलको दलअगि दूएलका छोरा एल्‍यासाप थिए।

²¹तब कहातीहरू पवित्र कुरा बोकेर अगि लागे। तिनीहरू आइपुग्‍नुभन्‍दा पहिले पवित्र वासस्‍थान उभ्‍याइसकेको हुनुपर्थ्‍यो।

²²त्‍यसपछि एफ्राइमको शिविरका दलहरू आफ्‍नो झन्‍डा उठाएर अगि बढ़े। अम्‍मीहूदका छोरा एलीशामाले दलहरूको नेतृत्‍व गरे।

²³मनश्‍शेका कुलको दलअगि पदासूरका छोरा गमलिएल थिए,

²⁴अनि बेन्‍यामीनका कुलको दलअगि गिदेओनीका छोरा अबीदान थिए।

²⁵त्‍यसपछि सबैभन्‍दा पछाड़ि रहेको दानको शिविरका दलहरू आफ्‍नो झन्‍डा उठाएर अगि बढ़े। अम्‍मीशद्दैका छोरा अहीएजेरले दलहरूको नेतृत्‍व गरे।

²⁶आशेरका कुलको दलअगि ओक्रानका छोरा पगीएल थिए,

²⁷अनि नप्‍तालीका कुलको दलअगि एनानका छोरा अहीरा थिए।

²⁸आ-आफ्‍ना दलबलअनुसार इस्राएलीहरू यसरी प्रस्‍थान गरे।

²⁹अनि मोशाले आफ्‍ना ससुरा मिद्यानी रूएलका छोरा होबाबलाई भने, “परमप्रभुले हामीलाई दिनेछु भन्‍नुभएको ठाउँमा हामी जाँदैछौं। तपाईं पनि हामीसितै आउनुहोस्, हामी तपाईंलाई हित नै गर्नेछौं, किनभने परमप्रभुले इस्राएलको बारेमा शुभ प्रतिज्ञा गर्नुभएको छ।”

³⁰तर उनले तिनलाई भने, “म जान्‍नँ। म आफ्‍नै देश र आफ्‍नै कुटुम्‍बकहाँ फर्कनेछु।”

³¹तर मोशाले भने, “बिन्‍ती छ, हामीलाई नछोड्‌नुहोस्‌। तपाईंलाई हामीले उजाड़-स्‍थानमा कहाँ-कहाँ छाउनी हाल्‍नुपर्छ सो थाहा छ, अनि तपाईं हाम्रा निम्‍ति आँखा हुन सक्‍नुहुनेछ।

³²तपाईं हामीसँग आउनुभयो भने परमप्रभुले हामीलाई जे दिनुहुन्‍छ हामी तपाईंसित बाँड्‌नेछौं।”

³³अनि परमप्रभुको डाँड़ाबाट तिनीहरूले तीन दिनसम्‍म यात्रा गरे। अनि परमप्रभुका करारको सन्‍दूक बोक्‍नेहरू तिनीहरूका निम्‍ति वास बस्‍ने ठाउँ खोज्‍न ती तीन दिनसम्‍म अगिअगि गए।

³⁴तिनीहरू छाउनीबाट हिँड्‌दा परमप्रभुको बादल दिउँसो तिनीहरूमाथि रहन्‍थ्‍यो।

³⁵जब सन्‍दूक अगि लगिन्‍थ्‍यो, तब मोशाले यसो भन्‍थे, “हे परमप्रभु, उठ्‌नुहोस्, तपाईंका शत्रुहरू तितरबितर होऊन्‌। तपाईंलाई तिरस्‍कार गर्नेहरू तपाईंका अगिअगि भागून्‌।”

³⁶अनि सन्‍दूकले विश्राम गर्दा तिनले यसो भन्‍थे, “हे परमप्रभु, इस्राएलका हजारौँ हजारकहाँ फर्केर आउनुहोस्‌।”