Read Nepali New Revised Version, 2012 गन्ती 14 Bible Online

गन्ती 14 - Nepali New Revised Version, 2012 bible

गन्ती 14

²सबै इस्राएलीहरू मोशा र हारूनका विरुद्धमा गनगनाए, र सारा समुदायले तिनीहरूलाई भने, “हामी मिश्रदेशमा नै मरेका भए असल हुनेथियो, अथवा यस उजाड़-स्‍थानमा मरेका भए पनि हुन्‍थ्‍यो।

³किन परमेश्‍वरले हामीलाई तरवारले मर्नलाई यस ठाउँमा ल्‍याउनुहुँदैछ? हाम्रा जहान र बालबच्‍चा लूट स्‍वरूप पक्रिनेछन्‌। अब मिश्रदेशमा नै फर्कन हामीलाई उचित होइन र?”

⁴अनि तिनीहरूले आपसमा भने, “हामी एउटा अगुवा चुनेर मिश्रदेश फर्कौं।”

⁵तब मोशा र हारून इस्राएलीका सारा समुदायका सामुन्‍ने घोप्‍टो परे।

⁶देशको भेद लिन गएकाहरूमध्‍येका नूनका छोरा यहोशू र यपुन्‍नेका छोरा कालेबले आ-आफ्‍ना लुगा च्‍याते,

⁷र इस्राएलीहरूका सारा समुदायलाई तिनीहरूले भने, “हामी भेद लिन गएको देश अत्‍यन्‍तै असल देश छ।

⁸यदि परमप्रभु हामीसित प्रसन्‍न हुनुभयो भने, उहाँले हामीलाई त्‍यस देशमा ल्‍याउनुहुनेछ, र त्‍यो दूध र मह बग्ने देश हामीलाई दिनुहुनेछ।

⁹केवल परमप्रभुको विरुद्धमा खड़ा नहोओ। र त्‍यस देशका मानिसहरूसित नडराओ, किनकि उनीहरू त हाम्रा शिकार हुनेछन्‌। उनीहरूको सुरक्षा उनीहरूबाट हटिसकेको छ, तर परमप्रभु हामीतर्फ हुनुहुन्‍छ। उनीहरूसित नडराओ।”

¹⁰तर सारा समुदायले तिनीहरूलाई ढुङ्गाले हान्‍नुपर्छ भनी मतो गरे। त्‍यस बेला परमप्रभुको महिमा भेट हुने पालमा सबै इस्राएलीहरूकहाँ देखा पर्‍यो।

¹¹अनि परमप्रभुले मोशालाई भन्‍नुभयो, “यी मानिसहरूले मलाई कतिसम्‍म तिरस्‍कार गरिरहनेछन्‌? यिनीहरूका बीचमा मैले गरेका चिन्‍हहरू देखेर पनि यिनीहरूले कतिसम्‍म ममाथि अविश्‍वास गर्नेछन्‌?

¹²यिनीहरूलाई म रूढ़ीले नाश गर्नेछु, तर तँबाटै यिनीहरूभन्‍दा ठूलो र शक्तिशाली जाति बनाउनेछु।”

¹³मोशाले परमप्रभुलाई भने, “मिश्रीहरूले यो सुने भने के भन्‍लान्‌? उनीहरूका बीचबाट आफ्‍नो शक्ति देखाएर तपाईंले नै यिनीहरूलाई ल्‍याउनुभएको हो।

¹⁴यस देशका बासिन्‍दाहरूलाई मिश्रीहरूले यो कुरा बताउनेछन्‌। तपाईं परमप्रभु यिनीहरूका बीचमा हुनुहुन्‍छ भन्‍ने कुरो उनीहरूले सुनिसकेका छन्, तपाईं आमनेसामने नै देखा पर्नुभएको छ, र तपाईंको बादल यिनीहरूमाथि खड़ा हुन्‍छ र दिनमा बादलको खामो र रातमा आगोको खामो भएर तपाईं यिनीहरूका अगिअगि जानुहुन्‍छ।

¹⁵अब तपाईंले यस जातिलाई एकै पटकमा मार्नुभयो भने त तपाईंको कीर्ति सुन्‍ने जातिहरूले यसो भनेर कुरा गर्नेछन्,

¹⁶‘परमप्रभुले ती मानिसहरूलाई दिन्‍छु भनी शपथ खाएर प्रतिज्ञा गर्नुभएको देशमा ल्‍याउन सक्‍नुभएन, यसैकारण तिनीहरूलाई उजाड़-स्‍थानमा मारिदिनुभयो’।

¹⁷“यसैले परमप्रभु, आफ्‍नो महामहिमा प्रकट गर्नुहोस्, जसरी तपाईंले भन्‍नुभएको छ:

¹⁸‘परमप्रभु रीस गर्नमा धैर्यवान्‌ र अति करुणामय, अधर्म र अपराध क्षमा गर्ने, तर दोषीलाई कुनै रीतिले निर्दोष नठहराउने, पिता-पुर्खाका अधर्मको सजाय उनीहरूका तेस्रो र चौथो पुस्‍तासम्‍म पनि दिने हुनुहुन्‍छ।’

¹⁹बिन्‍ती छ, तपाईंको महान्‌ करुणाअनुसार, र मिश्रदेशदेखि अहिलेसम्‍म क्षमा गरिरहनुभएझैँ यी मानिसहरूको अधर्म क्षमा गर्नुहोस्‌।”

²⁰तब परमप्रभुले भन्‍नुभयो, “तैंले भनेबमोजिम मैले यिनीहरूलाई क्षमा गरिदिएको छु।

²¹तापनि, जस्‍तो म जीवित छु र जसरी मेरो महिमाले पृथ्‍वी भरिएको छ,

²²मिश्र र उजाड़-स्‍थानमा मेरा महिमा र आश्‍चर्यकर्महरू देखेर पनि अनाज्ञाकारी भई दश पल्‍ट मेरो जाँच गर्ने यी सारा मानिसहरूले

²³तिनीहरूका पुर्खाहरूलाई शपथ खाएर भनेको प्रतिज्ञाको देश देख्‍नेछैन। मलाई तिरस्‍कार गर्नेले त्‍यो कहिल्‍यै देख्‍नेछैन।

²⁴तर मेरो दास कालेबमा अर्कै आत्‍मा छ, र त्‍यसले पूरै रीतिले मेरो अनुसरण गरेको छ। यसैकारण त्‍यो पसेर आएको देशमा म त्‍यसलाई लैजानेछु र त्‍यसका सन्‍तानले त्‍यो अधिकार गर्नेछन्‌।

²⁵अमालेकी र कनानीहरू बेँसीहरूमा बसेका हुनाले भोलि नै तिमीहरू फर्क र लाल समुद्रको बाटो भएर उजाड़-स्‍थानतिर जाओ।”

²⁶परमप्रभुले मोशा र हारूनलाई भन्‍नुभयो,

²⁷“मेरो विरुद्धमा यस दुष्‍ट समुदायले कतिसम्‍म गनगनाउने? तिनीहरूले मेरो विरुद्धमा गनगनाएका मैले सुनेको छु।

²⁸तिनीहरूलाई भनिदेओ, ‘जस्‍तो म जीवित छु, परमप्रभु घोषणा गर्नुहुन्‍छ, मैले सुन्‍ने गरी तिमीहरूले जे-जे भनेका थियौ, म त्‍यही नै गर्नेछु।

²⁹तिमीहरूका लाश यही उजाड़-स्‍थानमा छोड़िनेछन्,

³⁰अनि यपुन्‍नेका छोरा कालेब र नूनका छोरा यहोशूबाहेक गणना भएको र मेरो विरुद्धमा गनगनाउने बीस वर्षदेखि उँभोको कोही पनि वासको निम्‍ति दिन्‍छु भनी शपथ खाएर प्रतिज्ञा गरेको देशमा जान पाउनेछैन।

³¹लूट स्‍वरूप पक्रिनेछन्‌ भनी तिमीहरूले भनेका तिमीहरूका छोराछोरीहरूलाई चाहिँ म त्‍यहाँ पुर्‍याउनेछु, र तिमीहरूले अवहेलना गरेको ठाउँ तिनीहरूले प्राप्‍त गर्नेछन्‌।

³²तर तिमीहरूका लाशचाहिँ यही उजाड़-स्‍थानमा छोड़िनेछन्‌।

³³तिमीहरूमध्‍येको अन्‍तिम मानिसको मृत्‍यु नभएसम्‍म तिमीहरूको अविश्‍वासको कारण आफ्‍ना छोराछोरीहरू चालीस वर्षसम्‍म गोठाला भएर उजाड़-स्‍थानमा डुल्‍नेछन्‌।

³⁴तिमीहरूले त्‍यस देशको भेद लिन चालीस दिन बिताएका थियौ, यसकारण दिनको एक वर्ष गरी चालीस वर्षसम्‍म तिमीहरूले आफ्‍नो अधर्मको फल भोग्‍दै रहनेछौ, र तिमीहरूप्रति म नाराज भएको तिमीहरूले थाहा पाउनेछौ’।

³⁵यो बोल्‍ने म परमप्रभु हुँ, र मेरो विरुद्ध भेला हुने यस दुष्‍ट समुदायलाई म यसै गर्नेछु। यसै उजाड़-स्‍थानमा तिनीहरू मरेर मेटिजानेछन्‌।”

³⁶मोशाले भेद लिन पठाउँदा आएर खराब समाचार दिने मानिसहरू परमप्रभुको सामुन्‍ने रूढ़ीले मरे,

³⁷किनभने तिनीहरूले अशुभ खबर ल्‍याएर जम्‍मै समुदायलाई मोशाको विरुद्धमा बोल्‍न लाएका थिए।

³⁸देशको भेद लिन जाने मानिसहरूमध्‍ये खालि नूनका छोरा यहोशू र यपुन्‍नेका छोरा कालेब मात्र जीवित रहे।

³⁹जब मोशाले सबै इस्राएलीहरूलाई यी कुरा बताइदिए, तब मानिसहरूले ज्‍यादै बिलौना गर्न लागे।

⁴⁰तिनीहरू बिहान सबेरै उठेर यसो भन्‍दै पहाड़ी क्षेत्रतिर उक्‍लन लागे, “हेर, हामीहरू यहाँबाट अब परमप्रभुले प्रतिज्ञा गर्नुभएको ठाउँमा उक्‍लिजाऔं, किनकि हामीले त पाप गरेछौं।”

⁴¹तर मोशाले भने, “तिमीहरू किन परमप्रभुको आज्ञा उल्‍लङ्घन गर्छौ? यो सफल हुनेछैन।

⁴²नउक्‍ल, नत्रता शत्रुहरूले तिमीहरूलाई मार्नेछन्, किनभने परमप्रभु तिमीहरूका बीचमा हुनुहुन्‍न।

⁴³त्‍यहाँ अमालेकीहरू र कनानीहरूले तिमीहरूलाई सामना गर्नेछन्, र उनीहरूद्वारा तिमीहरू परास्‍त हुनेछौ। तिमीहरू परमप्रभुको पछि लाग्‍न छोड़्यौ। यसकारण परमप्रभु तिमीहरूका साथमा हुनुहुनेछैन, तर तिमीहरू तरवारद्वारा मर्नेछौ।”

⁴⁴तापनि कुरै नसुनी तिनीहरू पहाड़ी क्षेत्रतिर अगि बढ़े। तर परमप्रभुका करारको सन्‍दूक र मोशाचाहिँ छाउनीबाट निस्‍केनन्‌।

⁴⁵तब त्‍यस पहाड़मा बस्‍ने अमालेकी र कनानीहरू तल ओर्लेर तिनीहरूलाई होर्मासम्‍मै मार्दै र खेद्‌दै ल्‍याए।