Read Nepali New Revised Version, 2012 गन्ती 19 Bible Online

गन्ती 19 - Nepali New Revised Version, 2012 bible

गन्ती 19

¹परमप्रभुले मोशा र हारूनलाई भन्‍नुभयो,

²“परमप्रभुले दिनुभएको व्‍यवस्‍थाको एउटा विधि यही हो: निष्‍खोट र निष्‍कलङ्क, कहिल्‍यै जुवा नपरेको एउटा रातो कोरली तिनीहरूकहाँ ल्‍याउनू भनी इस्राएलीहरूलाई भन। तिनीहरूले ल्‍याऊन्‌।

³तिमीहरूले एलाजार पूजाहारीलाई त्यो दिनू, र त्‍यसलाई छाउनीबाहिर ल्‍याइओस्, र उसको सामुन्‍ने त्‍यो मारिओस्‌।

⁴त्‍यसपछि एलाजार पूजाहारीले आफ्‍नो औँलाले त्‍यसको रगत लिएर भेट हुने पालको अगिल्‍तिर सात चोटि छर्कोस्‌।

⁵उसका नजरको सामु त्‍यो कोरली, त्‍यसको छाला, मासु, रगत र गोबरसमेत जलाइओस्‌।

⁶तब पूजाहारीले देवदारुको काठ, हिसप, सिन्‍दूरे रङ्गको ऊन लिएर जलिरहेको कोरलीमा फालिदेओस्‌।

⁷त्‍यसपछि पूजाहारीले आफ्‍ना लुगा धोओस्‌ र पानीले नुहाएर छाउनीमा फर्कोस्‌। तर त्‍यो पूजाहारी साँझसम्‍म अशुद्ध रहनेछ।

⁸त्‍यसलाई जलाउनेले पनि आफ्‍ना लुगा धोओस्‌ र पानीले नुहाओस्‌। साँझसम्‍मै ऊ पनि अशुद्ध रहनेछ।

⁹“कुनै एक जना शुद्ध मानिसले त्‍यस कोरलीको खरानी बटुलेर छाउनीदेखि बाहिर कुनै शुद्ध ठाउँमा शुद्धीकरणका पानीको निम्‍ति इस्राएली समुदायले त्‍यो राखिओस्‌। त्‍यो पाप-शुद्धिको निम्‍ति हो।

¹⁰कोरलीको खरानी बटुल्‍नेले आफ्‍ना लुगा धोओस्, र साँझसम्‍मै ऊ पनि अशुद्ध रहनेछ। इस्राएलीहरू र तिनीहरूका बीचमा प्रवास गर्ने परदेशीका निम्‍ति पनि यो अनन्‍तको विधि होस्‌।

¹¹“मान्‍छेको लाश छुने व्‍यक्ति सात दिनसम्‍म अशुद्ध रहनेछ।

¹²त्‍यसले आफूलाई त्‍यस पानीले तेस्रो र सातौँ दिनमा चोख्‍याओस्, अनि त्‍यो शुद्ध हुनेछ। तर त्‍यसले तेस्रो र सातौँ दिनमा आफूलाई चोख्‍याएन भनेता त्‍यो शुद्ध हुँदैन।

¹³जसले कसैको लाश छोएर आफूलाई चोख्‍याउँदैन, त्‍यसले परमप्रभुको पवित्र वासस्‍थान अशुद्ध पार्छ। त्‍यो मानिस इस्राएलीहरूबाट बहिष्‍कार गरिओस्‌। शुद्धीकरणको पानी त्‍यसमाथि छर्किएन, यसैकारण त्‍यो अशुद्धै छ। त्‍यसको अशुद्धि त्‍यसमाथि रहिरहनेछ।

¹⁴“कुनै मानिस पालमा मर्‍यो भने त्‍यसको बारे नियम यही हो: त्‍यस पालमा आउने र पालभित्र हुने हरेक मानिस सात दिनसम्‍म अशुद्ध हुन्‍छ।

¹⁵ढकनी नलगाएको हरेक खुला भाँड़ा अशुद्ध हुन्‍छ।

¹⁶“बाहिरतिर तरवारले मारिएको वा आफै मरेको लाश अथवा मानिसको हड्डी अथवा चिहान जसले छुन्‍छ, त्‍यो सात दिनसम्‍म अशुद्ध हुन्‍छ।

¹⁷“त्‍यस अशुद्ध मानिसको निम्‍ति पापबलिको जलाइएको खरानी लिएर भाँड़ामा हाली बगुवा पानी पनि त्‍यसमा हाल्‍नू।

¹⁸तब कुनै शुद्ध मानिसले हिसप लिई त्‍यस पानीमा चोपेर पाल र त्‍यसमा भएका भाँड़ाकुँड़ामाथि र त्‍यहाँ भएका मानिसहरूमाथि, अनि हड्डी, मारिएको वा आफै मरेको लाश, वा चिहान छुनेमाथि छर्कोस्‌।

¹⁹शुद्ध मानिसले अशुद्ध भएकोमाथि तेस्रो र सातौँ दिनमा त्‍यो पानी छर्कोस्‌। सातौँ दिनमा चाहिँ उसले त्‍यसलाई चोख्‍याओस्, र त्‍यसले आफ्‍ना लुगा धोई नुहाओस्, अनि साँझमा त्‍यो शुद्ध हुनेछ।

²⁰तर अशुद्ध हुने मानिसले आफूलाई चोख्‍याएन भनेता त्‍यो व्‍यक्ति समुदायबाट बहिष्‍कार गरिओस्, किनभने त्‍यसले परमप्रभुको पवित्रस्‍थान अशुद्ध पार्‍यो। त्‍यसमाथि शुद्धीकरणको पानी छर्किएन, यसैकारण त्‍यो अशुद्धै रहन्‍छ।

²¹तिनीहरूका निम्‍ति यो अनन्‍तको विधि होस्‌। “शुद्धीकरणको पानी छर्कनेले पनि आफ्‍ना लुगा धोओस्‌। त्‍यो शुद्धीकरणको पानी छुने पनि साँझसम्‍म अशुद्ध रहनेछ।

²²अशुद्ध मानिसले जेसुकै छोए पनि त्‍यो अशुद्ध हुन्‍छ, र त्‍यो छुने पनि साँझसम्‍म अशुद्ध हुन्‍छ।”