Read Nepali New Revised Version, 2012 गन्ती 24 Bible Online

गन्ती 24 - Nepali New Revised Version, 2012 bible

गन्ती 24

¹इस्राएलीहरूलाई आशिष्‌ दिने परमप्रभुको इच्‍छा छ भन्‍ने जब बालामले देखे, तब तिनी अरू बेलाजस्‍तै टुनामुना गर्न गएनन्, तर तिनले आफ्‍नो मुख उजाड़-स्‍थानतिर फर्काए।

²जब बालामले आफ्‍ना आँखा उचालेर हेरे, र इस्राएलीहरूलाई आफ्‍नो कुल-कुल गरी बसेका तिनले देखे, तब परमेश्‍वरका आत्‍मा तिनीमाथि आउनुभयो।

³अनि तिनले आफ्‍नो ईश्‍वरवाणी दिए: “बओरको छोरो बालामले भन्‍छ, जुन मानिसको आँखा खुला छ, त्‍यसको वाणी।

⁴परमेश्‍वरका वचन सुन्‍नेले यसो भन्‍छ, जसले सर्वशक्तिमान्‌बाट दर्शन पाउँछ, जसले साष्‍टाङ्ग दण्‍डवत्‌ गर्दछ, र जसका आँखा खोलिएका छन्‌।

⁵“हे याकूब, तिम्रा पालहरू, हे इस्राएल, तिम्रा वासस्‍थानहरू कति राम्रा!

⁶“ती उपत्‍यकाझैँ फैलिएका छन्, खोलाका किनारका बगैँचाझैँ, परमप्रभुले रोप्‍नुभएका एलवाहरूजस्‍ता, पानीनेरका देवदारुहरूजस्‍ता फैलिएका छन्‌।

⁷तिनका गाग्राहरूबाट पानी भरिएर पोखिनेछ, अनि तिनको बीउले प्रचुर पानी पाउनेछ। “तिनीहरूका राजा अगागभन्‍दा पनि महान्‌ हुनेछन्, अनि तिनीहरूको राज्‍य समृद्ध बनाइनेछ।

⁸“परमेश्‍वरले तिनीहरूलाई मिश्रबाट निकालेर ल्‍याउनुभयो। तिनीहरूको शक्ति जङ्गली साँढ़ेको जस्‍तै छ। तिनीहरूले आफ्‍ना विरोधी जातिहरूलाई निल्‍नेछन्, र उनीहरूको हड्डी चूर पारेर फोर्नेछन्, आफ्‍ना बाणहरूले उनीहरूलाई छेड़ेर मार्नेछन्‌।

⁹तिनीहरू सिंहझैँ लेटिरहन्‍छन्, अनि सिंहनीझैँ— तिनीहरूलाई कसले उठाउने? “तिमीहरूलाई आशिष्‌ दिने हरेक आशिषित होस्‌। तिमीहरूलाई सराप दिने हरेक श्रापित होस्‌।”

¹⁰तब बालाकलाई बालामसित रीस उठ्यो। उनले जोडले आफ्‍ना हात ठटाएर बालामलाई भने, “मेरा शत्रुहरूलाई सराप दिनलाई मैले तपाईंलाई डाकेथें, तर हेर्नुहोस्, तपाईंले तीन पल्‍ट तिनीहरूलाई आशिष्‌ दिनुभयो।

¹¹यसकारण अब तपाईं आफ्‍नो ठाउँमा फर्किहाल्‍नुहोस्‌। तपाईंलाई ठूलो सम्‍मान दिने मैले विचार गरेको थिएँ, तर परमप्रभुले तपाईंलाई सम्‍मान प्राप्‍त गर्नदेखि रोक्‍नुभएको छ।”

¹²बालामले बालाकलाई भने, “तपाईंले मकहाँ पठाउनुभएका दूतहरूलाई मैले भनेकै थिइनँ र?

¹³‘बालाकले मलाई सुन र चाँदीले भरिएको आफ्‍नो महल दिए पनि परमप्रभुको वचन नाघेर मेरो आफ्‍नो खुशीले असल वा खराब गर्न सक्‍दिनँ। परमप्रभुले मलाई जे भन्‍नुहुन्‍छ, त्‍यही म बोल्‍नेछु’।

¹⁴अब म आफ्‍ना मानिसहरूकहाँ जान्‍छु, तर इस्राएलीहरूले तपाईंका मानिसहरूलाई पछि के गर्नेछन्, त्‍यो म तपाईंलाई बताउँछु।”

¹⁵तब तिनले यसरी आफ्‍नो ईश्‍वरवाणी दिए: “बओरको छोरो बालाम भन्‍छ, जुन मानिसको आँखा खुला छ, त्‍यसको वाणी।

¹⁶परमेश्‍वरका वचन सुन्‍नेले यसो भन्‍छ, जसले सर्वोच्‍चको ज्ञान जान्‍नेको, जसले सर्वशक्तिमान्‌बाट दर्शन पाउँछ, जसले साष्‍टाङ्ग दण्‍डवत्‌ गर्दछ, र जसका आँखा खोलिएका छन्‌।

¹⁷“म उहाँलाई देख्‍छु, तर अहिले त होइन। म उहाँलाई हेर्छु, तर नजिकै त होइन। याकूबबाट एउटा तारा आउनेछ, र इस्राएलबाट एउटा राजदण्‍ड उदय हुनेछ। उहाँले मोआबका टाउको किच्‍च्‍याउनुहुनेछ, अनि शेथका सन्‍तानलाई ध्‍वंस पार्नुहुनेछ।

¹⁸एदोम पराजित हुनेछ, र त्‍यसको शत्रु सेइर पनि पराजित हुनेछ, तर इस्राएलचाहिँ बलियो हुनेछ।

¹⁹याकूबबाट एउटा शासक उत्‍पन्‍न हुनेछन्, र सहरका बाँचेकाहरूलाई नाश गर्नेछन्‌।”

²⁰तब तिनले अमालेकीहरूतिर हेरेर आफ्‍नो ईश्‍वरवाणी दिए: “सबै जातिहरूमा अमालेक पहिलो थियो, तर विनाश नै त्‍यसको अन्‍त हुनेछ।”

²¹अनि तिनले केनीहरूलाई हेरेर आफ्‍नो ईश्‍वरवाणी दिए: “तिमीहरूको बस्‍ने ठाउँ सुरक्षित छ, र तिमीहरूको गुँड़ चट्टानमा बसालिएको छ।

²²तर तिमी केनीहरू ध्‍वंस पारिनेछौ, जब अश्‍शूरले तिमीहरूलाई कैद गरेर लैजानेछ।”

²³फेरि तिनले आफ्‍नो ईश्‍वरवाणी दिए: “हाय! परमेश्‍वरले यसो गर्नुहुँदा को बाँच्‍न सक्‍छ?

²⁴कित्तीमको किनारबाट जहाजहरू आउनेछन्, र उनीहरूले अश्‍शूर र एबेरलाई कष्‍ट दिनेछन्, तर तिनीहरू पनि नष्‍ट हुनेछन्‌।”

²⁵तब बालाम उठेर आफ्‍नो घरमा फर्के, र बालाक पनि आफ्‍नो बाटो लागे।