Read Nepali New Revised Version, 2012 गन्ती 25 Bible Online

गन्ती 25 - Nepali New Revised Version, 2012 bible

गन्ती 25

¹इस्राएलीहरू शित्तीममा हुँदा मानिसहरूले मोआबका छोरीहरूसँग व्‍यभिचार गर्न लागे।

²तिनीहरूले यी मानिसहरूलाई तिनका देवताहरूका बलिदानमा निम्‍तो दिए, र यी मानिसहरूले खाएर तिनका देवताहरूलाई दण्‍डवत्‌ गरे।

³यसरी इस्राएलीहरू पोरको बाल देवतालाई पुज्‍न लागे। अनि इस्राएलीहरूसित परमप्रभु रिसाउनुभयो।

⁴परमप्रभुले मोशालाई भन्‍नुभयो, “यी मानिसहरूका सबै नायकहरूलाई लिएर मार्‌ र परमप्रभुकै सामुन्‍ने चर्को घाममा राखिदे, कि परमप्रभुको भयानक क्रोध इस्राएलीहरूबाट हटोस्‌।”

⁵मोशाले इस्राएलका न्‍यायकर्ताहरूलाई भने, “तिमीहरू हरेकले पोरको बाल देवतालाई पुज्‍ने सबै मानिसहरूलाई मार्नुपर्छ।”

⁶इस्राएलीहरू भेट हुने पालको ढोकामा रोइरहेका थिए। त्‍यस बेला एक-जना इस्राएलीले मोशा र इस्राएली समुदायकै सामुन्‍ने आफ्‍नो परिवारमा एउटी मिद्यानी आइमाईलाई ल्‍यायो।

⁷जब एलाजारको छोरा, हारूनका नाति पीनहासले त्‍यो देखे, तब तिनले समुदायको मध्‍यबाट उठेर आफ्‍नो हातमा एउटा भाला लिएर

⁸त्‍यस इस्राएलीको पछिपछि पालभित्र गएर त्‍यस इस्राएली र त्‍यस आइमाई दुवैलाई वारपार रोपिदिए। त्‍यसपछि इस्राएलीहरूबाट त्‍यो विपत्ति हट्यो।

⁹तर विपत्तिमा मर्नेहरू चौबीस हजार थिए।

¹⁰तब परमप्रभुले मोशालाई भन्‍नुभयो,

¹¹“एलाजारको छोरो, पूजाहारी हारूनको नाति पीनहासले इस्राएलीहरूका बीचमा मेरो खातिर राँकिएर इस्राएलीहरूबाट मेरो क्रोध हटाइदियो। यसैले मेरो क्रोधमा मैले तिनीहरूलाई भस्‍म पारिनँ।

¹²यसकारण यसो भन्, ‘हेर्, म त्‍यससँग मेरो शान्‍तिको करार बाँध्‍छु।

¹³त्‍यसलाई र त्‍यसको वंशलाई पनि सधैँको लागि पूजाहारीपदमा स्‍थिर गरिनेछन्, किनभने त्‍यो आफ्‍ना परमेश्‍वरको निम्‍ति जोशिलो थियो। त्‍यसले इस्राएलीहरूका निम्‍ति प्रायश्‍चित गर्‍यो’।”

¹⁴त्‍यस मिद्यानी आइमाईको साथमा मारिने इस्राएलीको नाउँ जिम्री थियो, जो शिमियोनको कुलको एक परिवारका मुखिया सालूको छोरो थियो।

¹⁵त्‍यो मारिने मिद्यानी आइमाईको नाउँचाहिँ कोजबी थियो, जो मिद्यानको एक घरानाका मुखिया सूरकी छोरी थिई।

¹⁶फेरि परमप्रभुले मोशालाई भन्‍नुभयो,

¹⁷“मिद्यानीहरूलाई सताएर मार्,

¹⁸किनभने उनीहरूले पनि तिमीहरूलाई सताए, र पोरमा छल गरी पूजाआजा गर्न लगाए, जुन बेला मिद्यानका मुखियाकी छोरी कोजबी पोरको विपत्तिको दिनमा मारिएकी थिई।”