Read Nepali New Revised Version, 2012 नहूम 3 Bible Online

नहूम 3 - Nepali New Revised Version, 2012 bible

नहूम 3

¹रगतको सहरलाई धिक्‍कार! त्‍यो झूट र लूटको धनले भरिएको छ, त्‍यहाँ लूटका शिकारको अन्‍त हुँदैन।

²कोर्राहरूको आवाज, पाङ्‌ग्राहरूको आवाज, घोड़ाहरूका फड्‌का, रथहरूको ठेलमठेला गर्ने कुदाइ।

³घोड़चढ़ीहरूको हमला, झल्‍कने तरवार र चम्‍कने भाला। मारिएकाहरूको रास, मुर्दाहरूको ढेर, अनगिन्‍ती लाशहरू— लाशहरूमा मानिसहरू ठोकर खाँदैहिँड्‌छन्‌।

⁴यी सबै एउटी वेश्‍या, टुनामुना गर्नेकी एउटी मालिक्‍नीको निर्लज्‍ज कामवासनाको कारणले हो, जसले आफ्‍नो वेश्‍यापनद्वारा जाति-जातिहरूलाई, र आफ्‍नो टुनामुनाद्वारा मानिसहरूलाई दास बनाउँथी।

⁵सर्वशक्तिमान्‌ परमप्रभु घोषणा गर्नुहुन्‍छ, “हेर्, म तेरो विरुद्धमा छु। तेरा मुखसम्‍म तेरा फरियाहरू उचाल्‍नेछु। जाति-जातिहरूलाई म तेरो नाङ्गोपना, र राज्‍यहरूलाई तेरो शर्म देखाउनेछु।

⁶तँमाथि फोहोर फाल्‍नेछु, म तँलाई नीच व्‍यवहार देखाउनेछु, र तँलाई हाँसोको पात्र तुल्‍याउनेछु।

⁷तँलाई देख्‍ने जत्ति सबै तँदेखि भाग्‍नेछन्, र भन्‍नेछन्, ‘निनवे त नष्‍ट भएको छ। त्‍यसको निम्‍ति कसले विलाप गर्ला?’ तँलाई शान्‍ति दिने व्‍यक्ति मैले कहाँ पाउने?”

⁸के तँ नील नदीको किनारमा अवस्‍थित नो सहरभन्‍दा अझ राम्रो छस्‌? जसको सुरक्षा पानी थियो, त्‍यसको किल्‍ला नदी र पर्खालचाहिँ पानी थियो।

⁹कूश [1] र मिश्र त्‍यसको असीम शक्ति थियो, पूत र लिबिया त्‍यसका मित्रराष्‍ट्र थिए।

¹⁰तैपनि त्‍यो कैदमा लगियो र निर्वासनमा गयो। त्‍यसका ससाना नानीहरू पनि गल्‍लीहरूमा बजारिएर मरे। त्‍यसका भारदारहरूमाथि चिट्ठा हालिए, र त्‍यसका सबै ठूला मानिसहरू साङ्‌लाले बाँधिए।

¹¹तँ पनि मतवाला हुनेछस्, तँ लुकेर बस्‍नेछस्, र शत्रुबाट भाग्‍नलाई शरणस्‍थान खोज्‍नेछस्‌।

¹²तेरा सबै किल्‍लाहरू पहिला फसल पाकेका अञ्‍जीरका रूखहरूजस्‍तै छन्‌। ती हल्‍लाउँदा अञ्‍जीरहरू खानेको मुखैमा खस्‍छन्‌।

¹³तेरा फौजहरूलाई हेर्, ती सबै स्‍त्री मात्र छन्‌। तेरो देशका मूल ढोकाहरू तेरा शत्रुहरूका निम्‍ति उदाङ्गै छन्‌। त्‍यसका गजबारहरू आगोले खाएको छ।

¹⁴घेरामा पर्ने दिनको निम्‍ति पानी भरेर राख्‌। तेरा किल्‍लाहरू बलिया पार्‌। काम गर्, हिलो खुट्टाले कुल्‍ची। इँटको काम मरम्‍मत गर्‌।

¹⁵त्‍यहीँ तँलाई आगोले भस्‍म पार्नेछ, तँलाई तरवारले टुक्र्याउनेछ र सलहहरूले तँलाई स्‍वाहा पार्नेछन्‌। फटेङ्‌ग्राजस्‍तै अनगन्‍ती हो, सलहहरूझैँ संख्‍यामा बढ्‌।

¹⁶आकाशका ताराहरूभन्‍दा बढ्‌ता तैंले आफ्‍ना व्‍यापारीहरू बढ़ाएको छस्‌। तर सलहहरूलेझैँ उनीहरूले देशलाई नाङ्गो पारेर उड़िजान्‍छन्‌।

¹⁷तेरा रक्षकहरू त सलहझैँ छन्, तेरा अधिकारीहरू सलहका बथानझैँ छन्, जो जाड़ोको दिनमा पर्खालहरू हुँदो बस्‍छन्, तर जब घाम लाग्‍छ, ती सबै उड़िहाल्‍छन्‌— कसैले जान्‍दैन, कता जान्‍छन्‌।

¹⁸हे अश्‍शूरको राजा, तेरा गोठालाहरू निदाएका छन्, तेरा भारदारहरू आराम गरेर पल्‍टिबस्‍छन्, तेरा मानिसहरू डाँड़ाकाँड़ातिर छरपष्‍टै भएका छन्, र उनीहरूलाई भेला गर्ने कोही छैन।

¹⁹तेरो घाउलाई केही कुरोले निको पार्न सक्‍दैन। तेरो घाउ घातक छ। जति जनाले तेरो विषयमा सुन्‍छ त्‍यसले तेरो पतनमा ताली बजाउँछ, किनकि तेरो अन्‍त्‍यै नहुने निष्‍ठुरता कसले भोगेको छैन र?