Read Nepali New Revised Version, 2012 हबकूक 2 Bible Online

हबकूक 2 - Nepali New Revised Version, 2012 bible

हबकूक 2

¹म मेरो पहरामा नै उभिरहनेछु, र पर्खालमा म आफै खड़ा रहनेछु, र उहाँ मलाई के भन्‍नुहुन्‍छ सो म हेर्दैरहनेछु। यस उजूरको कस्‍तो जवाफ मैले दिनुपर्ने सो म हेरिबस्‍नेछु।

²तब परमप्रभुले मलाई जवाफमा भन्‍नुभयो, “तैंले यो प्रकाश पाटीहरूमा प्रष्‍ट गरी लेख्, र समाचारवाहक त्‍यससित दौड्‌न सकोस्‌।

³किनकि प्रकाश ठहरिएको समय पूरा हुनलाई पर्खिरहेछ। त्‍यसले अन्‍तको विषयमा बताउँछ र त्‍यो झूटो ठहरिनेछैन। त्‍यो पूरा हुन ढिलो भए तापनि त्‍यसको प्रतीक्षा गर्दैबस्, किनभने त्‍यो निश्‍चय नै पूरा हुनेछ, त्‍यसले ढिलो गर्नेछैन।

⁴“हेर्, त्‍यो घमण्‍डले फुलिएको छ, त्‍यसका इच्‍छाहरू सोझा छैनन्‌— तर धर्मीचाहिँ आफ्‍नो विश्‍वासद्वारा जिउनेछ।

⁵निश्‍चय नै दाखमद्यले त्‍यसलाई धोका दिन्‍छ। त्‍यो हठी छ र त्‍यो कहिल्‍यै शान्‍तसित बस्‍दैन, किनभने त्‍यो चिहानझैँ [1] लोभी छ। मृत्‍युझैँ त्‍यो कहिल्‍यै अघाउँदैन। त्‍यसले सारा जाति-जातिहरूलाई आफूकहाँ बटुल्‍छ, र सारा मानिसहरूलाई कैद गर्छ।

⁶“के ती सबैले यसो भनेर त्‍यसको विरुद्धमा हाँसो र ठट्टा गर्दैनन्‌ र? ‘चोरको माल थुपार्ने र जबरजस्‍ती खोसेर ल्‍याएका मालले धनी हुनेलाई धिक्‍कार! त्‍यसले कहिलेसम्‍म त्‍यसो गर्ने?’

⁷के तेरा कर्जादारहरू एक्‍कासि उठ्‌नेछैनन्‌ र? तिनीहरू बिउँझेर तँलाई थर्कमान बनाउँदैनन्‌ र? तब तँ तिनीहरूको शिकार हुनेछस्,

⁸तैंले जाति-जातिहरूलाई लुटेको छस्, यसकारण बाँचेका मानिसहरूले तँलाई लुटनेछन्‌। किनकि तैंले मानिसको रगत बगाइस्, र तैंले देशहरू र सहरहरू र तिनमा रहने सबैलाई सर्वनाश गरिस्‌।

⁹“धिक्‍कार त्‍यसलाई, जसले अन्‍यायबाट कमाएको लाभबाट आफ्‍नो राज्‍य बनाउँछ, ताकि उसको गुँड़ उच्‍च ठाउँमा बनाई ऊ विध्‍वंशबाट बचोस्‌।

¹⁰तैंले धेरै मानिसहरूका सर्वनाशको निम्‍ति षड्‌यन्‍त्र रचेको छस्‌। तैंले आफ्‍नै घरलाई लाजमा डुबाएर आफ्‍नो जीवन गुमाइस्‌।

¹¹पर्खालका भित्तादेखि ढुङ्गाहरूले दुहाई दिनेछन्, र काठका दलिनहरूले त्‍यसको प्रतिध्‍वनि गर्नेछन्‌।

¹²धिक्‍कार त्‍यसलाई, जसले रक्तपातले सहर निर्माण गर्दछ, र अधर्मद्वारा नगर स्‍थापित गर्दछ।

¹³के सर्वशक्तिमान्‌ परमप्रभुले यो ठहराउनुभएको होइन, कि मानिसहरूको परिश्रम त आगोको निम्‍ति मात्र हुन्‍छ, कि जाति-जातिहरू व्‍यर्थैमा आफै थकित हुँदैछन्‌?

¹⁴किनकि समुद्र पानीले ढाकिएझैँ पृथ्‍वी परमप्रभुका महिमाको ज्ञानले भरिपूर्ण हुनेछ।

¹⁵“धिक्‍कार त्‍यसलाई, जसले आफ्‍ना छिमेकीहरूको नाङ्गो शरीर एकटक लगाएर हेर्न आफ्‍नो मशकबाट तिनीहरूलाई मद्यपान गराइ टिल्‍ल पार्छन्‌।

¹⁶गौरवको सट्टा तँ शर्मले भरिनेछस्‌। अब तेरो पालो आयो, तँ पनि पिई र उदाङ्गो हो। परमप्रभुको दाहिने हातको कचौरा तँकहाँ आउँदैछ, र तेरो गौरव लाजले ढाकिनेछ।

¹⁷लेबनानमाथि तैंले गरेको उपद्रवले तँलाई नै ढाक्‍नेछ, र तैंले त्‍यहाँका पशुहरूलाई गरेको सर्वनाशले तँलाई भयभीत तुल्‍याउनेछ। किनकि तैंले मानिसको रगत बगाइस्, र तैंले देशहरू र सहरहरू र तिनमा रहने सबैलाई सर्वनाश गरिस्‌।

¹⁸“मान्‍छेले खोपेर बनाएको मूर्तिको के मूल्‍य छ र? अथवा झूट सिकाउने प्रतिमाको के मूल्‍य छ? किनकि त्‍यो बनाउने कारीगरले आफ्‍नै हातले बनाएको सृष्‍टिमा भरोसा राख्‍तछ। उसले मूर्तिहरू बनाउँछ, जसले बोल्‍न सक्‍दैन।

¹⁹“धिक्‍कार त्‍यसलाई, जसले काठलाई भन्‍छ, ‘जिउँदो होऊ,’ र बोल्‍न नसक्‍ने ढुङ्गालाई भन्‍छ, ‘जाग’। के त्‍यसले मार्ग दर्शन गर्न सक्‍छ? त्‍यो त सुन र चाँदीले मोहोरिएको छ, त्‍यसमा सास नै छैन।

²⁰तर परमप्रभु त आफ्‍नो पवित्र मन्‍दिरमा हुनुहुन्‍छ। सारा पृथ्‍वी उहाँको सामुन्‍ने चूपचाप रहोस्‌।”