Read Nepali New Revised Version, 2012 जकरिया 10 Bible Online

जकरिया 10 - Nepali New Revised Version, 2012 bible

जकरिया 10

¹वसन्‍त ऋतुको समयमा परमप्रभुसँग वर्षा माग। परमप्रभुले नै बादलहरू भएको आँधी बनाउनुहुन्‍छ। उहाँले मानिसहरूलाई पानीको झरी बर्साइदिनुहुन्‍छ, हरेकलाई खेतमा बोटबिरुवा दिनुहुन्‍छ।

²मूर्तिहरू छलका कुरा बोल्‍छन्, र मन्‍त्रतन्‍त्र गर्नेहरूले झूटा दर्शनहरू देख्‍छन्‌ र झूटा सपनाहरू बताउँछन्, तिनीहरू व्‍यर्थमा सान्‍त्‍वना दिन्‍छन्‌। यसैकारण गोठालाको कमीले गर्दा अत्‍याचारमा परेका भेड़ाझैँ मानिसहरू बरालिन्‍छन्‌।

³“मेरो रीस गोठालाहरूमाथि पर्छ, म अगुवाहरूलाई दण्‍ड दिनेछु, किनकि सर्वशक्तिमान्‌ परमप्रभुले आफ्‍नो बगाल, यहूदाको घरानालाई हेरचाह गर्नुहुनेछ, र तिनीहरूलाई लड़ाइँको अहङ्कारी घोड़ाझैँ बनाउनुहुनेछ।

⁴यहूदाबाट कुने-ढुङ्गो, त्‍यसबाट पालको कीला, त्‍यसबाट लड़ाइँको धनु र त्‍यसैबाट हरेक शासक निस्‍कनेछन्‌।

⁵तिनीहरू साथसाथै लड़ाइँमा आफ्‍ना शत्रुहरूलाई गल्‍लीको हिलोमा कुल्‍चीमिल्‍ची गर्ने शक्तिशाली मानिसझैँ हुनेछन्, किनभने परमप्रभु तिनीहरूसँग हुनुहुनेछ, तिनीहरूले लड़ाइँ गर्नेछन्, र घोड़ामा सवार हुनेहरूलाई पराजय गर्नेछन्‌।

⁶“म यहूदाको घरानालाई बलियो पार्नेछु, र योसेफको घरानालाई बचाउनेछु। म तिनीहरूको पुनर्स्‍थापन गर्नेछु, किनभने म तिनीहरूमाथि टिठ्याउनेछु। मैले तिनीहरूलाई इन्‍कार नगरेझैँ तिनीहरू हुनेछन्, किनभने म परमप्रभु तिनीहरूका परमेश्‍वर हुँ, र म तिनीहरूलाई उत्तर दिनेछु।

⁷एफ्राइमीहरूचाहिँ शक्तिशाली हुनेछन्, र दाखमद्य खाएर खुशी भएझैँ तिनीहरूका हृदय हुनेछन्‌। तिनीहरूका छोराछोरीहरूले त्‍यो देखेर रमाहट गर्नेछन्‌। तिनीहरूका हृदय परमप्रभुमा रमाउनेछन्‌।

⁸“म तिनीहरूलाई इशाराले बोलाएर भित्र जम्‍मा गर्नेछु। म निश्‍चय नै मोल तिरेर तिनीहरूलाई छुटाउनेछु, तिनीहरू अघिजस्‍तै संख्‍यामा धेरै हुनेछन्‌।

⁹मैले तिनीहरूलाई जाति-जातिहरूका बीचमा तितरबितर पारें तापनि टाढ़ा-टाढ़ा देशहरूमा तिनीहरूले मेरो सम्‍झना गर्नेछन्‌। तिनीहरू र तिनीहरूका छोराछोरीहरू बाँच्‍नेछन्‌ र फर्कनेछन्‌।

¹⁰म तिनीहरूलाई मिश्रदेशदेखि फर्काएर ल्‍याउनेछु, र अश्‍शूर देशबाट तिनीहरूलाई भेला गर्नेछु। तिनीहरूलाई गिलाद र लेबनान देशहरूमा ल्‍याउनेछु, र तिनीहरूलाई त्‍यहाँ यथेष्‍ट ठाउँ हुँदैन।

¹¹तिनीहरू दु:खको सागरबाट पार हुनेछन्‌। त्‍यसका छालहरू साम्‍य हुनेछन्, र नील नदीका सबै गहिरा-गहिरा ठाउँहरू सुक्‍दैजानेछन्‌। अश्‍शूरको अहङ्कार झारिनेछ, र मिश्रको राजदण्‍ड बितेर जानेछ।

¹²म तिनीहरूलाई परमप्रभुमा सामर्थी तुल्‍याउनेछु, र तिनीहरू उहाँकै नाउँमा हिँड्‌डुल गर्नेछन्,” परमप्रभु भन्‍नुहुन्‍छ।