Read Nepali New Revised Version, 2012 जकरिया 13 Bible Online

जकरिया 13 - Nepali New Revised Version, 2012 bible

जकरिया 13

¹“त्‍यस दिन तिनीहरूको पाप र अशुद्धता सफा गर्नलाई दाऊदको घराना र यरूशलेमका बासिन्‍दाहरूका निम्‍ति पानीको एउटा मूल फुटेर निस्‍कनेछ।

²सर्वशक्तिमान्‌ परमप्रभु भन्‍नुहुन्‍छ, “म त्‍यस दिन देशबाट देवताहरूको नाउँनिशानै मेटिदिनेछु, र तिनीहरूको सम्‍झना नै हुनेछैन। अगमवक्ताहरू र अशुद्ध आत्‍मालाई पनि देशबाट म निकालिदिनेछु।

³अनि अझै कसैले अगमवाणी गर्‍यो भने, त्‍यसलाई जन्‍माउने बुबा-आमाले त्‍यसलाई भन्‍नेछन्, ‘तँ मर्नैपर्छ, किनभने तैंले परमप्रभुको नाउँमा झूटा बोलेको छस्‌।’ त्‍यसले अगमवाणी गर्दा त्‍यसलाई जन्‍माउने बुबा-आमाले त्‍यसलाई वारपार घोचिदिनेछन्‌।

⁴“त्‍यस दिन हरेक अगमवक्ता आफ्‍नै अगमवाणीको दर्शनदेखि लजाउनेछ, र धोका दिनलाई अगमवक्ताले लाउने रौँका लुगा त्‍यसले लाउनेछैन।

⁵त्‍यसले भन्‍नेछ, ‘म त अगमवक्ता होइनँ, तर किसान मात्र हुँ, किनकि जवान अवस्‍थादेखि नै जमिनबाट मेरो जीविका चलेको छ’।

⁶कसैले त्‍यसलाई ‘तिम्रो शरीरमा भएका यी चोटचाहिँ के हुन्‌?’ भनी सोधे भने, त्‍यसले जवाफ दिनेछ, ‘यी मेरा मित्रहरूको घरमा मैले पाएका चोटहरू हुन्‌।’

⁷“ए तरवार, मेरो गोठालाको विरुद्धमा उठ्, नजिकका मानिसको विरुद्धमा, जो मेरो सङ्गी हो,” सर्वशक्तिमान्‌ परमप्रभु भन्‍नुहुन्‍छ। “गोठालालाई हिर्का, र भेड़ाहरू तितरबितर हुनेछन्, र मेरो हात सानाहरूका विरुद्धमा म उठाउनेछु।”

⁸परमप्रभु भन्‍नुहुन्‍छ, “समस्‍त देशमा दुई-तिहाइ मारिनेछन्, र नष्‍ट हुनेछन्, तापनि एक-तिहाइचाहिँ छोड़िनेछन्‌।

⁹त्‍यस एक-तिहाइलाई म आगोमा ल्‍याउनेछु। चाँदी निखारेझैँ म तिनीहरूलाई निखार्नेछु, र सुन जाँचेझैँ जाँच्‍नेछु। तिनीहरूले मेरो नाउँको पुकारा गर्नेछन्, र म तिनीहरूलाई जवाफ दिनेछु। ‘यिनीहरू मेरा प्रजा हुन्,’ भनी म भन्‍नेछु, र तिनीहरूले भन्‍नेछन्, ‘परमप्रभु हाम्रा परमेश्‍वर हुनुहुन्‍छ’।”