Read Nepali New Revised Version, 2012 जकरिया 14 Bible Online

जकरिया 14 - Nepali New Revised Version, 2012 bible

जकरिया 14

¹परमप्रभुको एउटा यस्‍तो दिन आउँदैछ, जब तिमीहरूबाट लुटिएको लूट तिमीहरूकै बीचमा बाँड़िनेछ।

²म सबै जातिहरूलाई यरूशलेमको विरुद्ध लड़ाइँ गर्नलाई भेला गराउनेछु, र यो सहर लिइनेछ, र घरहरू लुटिनेछन्, र स्‍त्रीहरूलाई बलात्‍कार गरिनेछ। सहरको आधा भाग निर्वासन गरिनेछ, तर बाँकी रहेका मानिसहरूचाहिँ सहरबाट अलग लगिनेछैनन्‌।

³तब युद्धको दिनमा लड़ाइँ गरेझैँ परमप्रभु निस्‍केर ती जाति-जातिहरूसित लड़ाइँ गर्नुहुनेछ।

⁴त्‍यस दिन उहाँका खुट्टाले यरूशलेमको सामु पूर्वतिर भएको जैतून डाँड़ामा टेक्‍नेछन्, अनि पूर्वदेखि पश्‍चिमसम्‍म जैतून डाँड़ाको बीचमा धाँदो फाट्‌नेछ, र त्‍यहाँ एउटा ठूलो खोल्‍सा बनिनेछ। आधा पर्वत उत्तरतिर र आधा पर्वत दक्षिणतिर छुट्टिनेछ।

⁵तिमीहरू मेरो पर्वतको खोल्‍साबाट भएर भाग्‍नेछौ, किनकि त्‍यो आसेलसम्‍म फैलिनेछ। यहूदाका राजा उज्‍जियाहको पालोमा आएको भूकम्‍पमा मानिसहरू भागेझैँ तिमीहरू भाग्‍नेछौ। तब परमप्रभु मेरा परमेश्‍वर उहाँका सबै पवित्र जनहरूसँग आउनुहुनेछ।

⁶त्‍यस दिन न त उज्‍यालो हुनेछ, न ठन्‍डा हुनेछ न तुसारो पर्नेछ।

⁷त्‍यस दिनमा रात हुनेछैन, त्‍यो एउटा अनौठो दिन हुनेछ— जो परमप्रभुले जान्‍नुहुन्‍छ। जब साँझ पर्छ, तब उज्‍यालै रहनेछ।

⁸त्‍यस दिन यरूशलेमबाट जिउँदो पानी निस्‍केर आउनेछ, आधाचाहिँ पूर्वको समुद्रतिर [1] र आधाचाहिँ पश्‍चिमको समुद्रतिर [2] बगिनिस्‍कनेछ, हिउँद र वर्षामा नित्‍य बगिरहनेछ।

⁹परमप्रभु समस्‍त पृथ्‍वीका राजा हुनुहुनेछ। त्‍यस दिन एकमात्र परमप्रभु हुनुहुनेछ र उहाँकै नाउँ मात्र हुनेछ।

¹⁰गेबादेखि यरूशलेमको दक्षिण रिम्‍मोनसम्‍म सारा देश अराबाजस्‍तै हुनेछ। तर यरूशलेमचाहिँ अल्‍गो बनाइनेछ, र बेन्‍यामीनको ढोकादेखि पहिलो ढोकाको ठाउँसम्‍म, कुने ढोकासम्‍म, र हननेलको बुर्जादेखि राजाको दाखको कोलसम्‍म आफ्‍नै ठाउँमा रहनेछ।

¹¹मानिसहरू त्‍यसमा बस्नेछन्, र त्‍यो फेरि कहिल्‍यै नाश गरिनेछैन। यरूशलेम सुरक्षित रहनेछ।

¹²जत्ति जातिहरूले यरूशलेमको विरुद्धमा लड़ाइँ गरे, ती सबैलाई परमप्रभुले यस्‍तो महामारीद्वारा प्रहार गर्नुहुनेछ: तिनीहरू आफ्‍ना खुट्टामा खड़ा भएर उभिएकैमा तिनीहरूको मासु कुहेर जानेछ, तिनीहरूका आँखा तिनीहरूकै खोपिल्‍टामा कुहुनेछन्, र तिनीहरूका जिब्रा तिनीहरूका मुखैमा कुहिजानेछन्‌।

¹³त्‍यस दिन परमप्रभुद्वारा मानिसहरूमा ठूलो त्रास आइलाग्‍नेछ। तिनीहरू हरेकले अर्काको हात समात्‍नेछ, र एउटाले अर्कालाई आक्रमण गर्नेछ।

¹⁴यहूदाले पनि यरूशलेममा लड़ाइँ गर्नेछ। सबै वरिपरिका जातिहरूको धन-सम्‍पत्ति जम्‍मा गरिनेछ— सुन, चाँदी, लुगाफाटाहरू ठूलो परिणाममा बटुलिनेछ।

¹⁵घोड़ाहरू, खच्‍चरहरू, ऊँटहरू, गधाहरू र ती छाउनीहरूमा भएका जम्‍मै पशुहरूलाई पनि यही किसिमको रूढ़ीले मार्नेछ।

¹⁶तब यरूशलेमलाई आक्रमण गर्ने जाति-जातिहरूमा जत्ति बाँचेका हुन्‍छन्, तिनीहरू वर्षेनी सर्वशक्तिमान्‌ परमप्रभुका महाराजालाई दण्‍डवत्‌ गर्न र छाप्रो-वासको चाड़ मान्‍नलाई यरूशलेममा जानेछन्‌।

¹⁷सर्वशक्तिमान्‌ परमप्रभु महाराजालाई दण्‍डवत्‌ गर्न पृथ्‍वीका सबै परिवारमध्‍येका जो जाँदैनन्, तिनीहरूका निम्‍ति पानी पर्नेछैन।

¹⁸मिश्रदेशका मानिसहरू त्‍यहाँ गएनन्‌ भने तिनीहरूका निम्‍ति पानी पर्नेछैन। परमप्रभुले तिनीहरूमाथि पनि त्‍यही रूढ़ी ल्‍याउनुहुनेछ, जुन रूढ़ी छाप्रो-वासको चाड़ नमान्‍नेमाथि परमप्रभुले प्रहार गर्नुहुन्‍छ।

¹⁹मिश्रदेशमाथि र छाप्रो-वासको चाड़ मान्‍नलाई नजाने सबै जातिहरूमाथि पनि त्‍यही दण्‍ड पर्नेछ।

²⁰त्‍यस दिन घोड़ाहरूका घण्‍टीहरूमा पनि ‘परमप्रभुको निम्‍ति पवित्र’ भनी खोपिएको हुनेछ, र परमप्रभुका भवनका भाँड़ाहरू वेदीको सामुन्‍ने भएका पवित्र कचौराहरूजस्‍तै हुनेछन्‌।

²¹यरूशलेममा र यहूदामा भएका हरेक भाँड़ा सर्वशक्तिमान्‌ परमप्रभुको निम्‍ति पवित्र ठहरिनेछ, र बलिदान चढ़ाउने सबै मानिसहरू आएर कुनै-कुनै भाँड़ा लिएर तिनमा नै पकाउनेछन्‌। अनि त्‍यस दिन सर्वशक्तिमान्‌ परमप्रभुको भवनमा फेरि कहिल्‍यै एउटै कनानी पनि हुनेछैन।