Read Nepali New Revised Version, 2012 जकरिया 3 Bible Online

जकरिया 3 - Nepali New Revised Version, 2012 bible

जकरिया 3

¹तब उहाँले प्रधान पूजाहारी यहोशूलाई परमप्रभुका दूतको सामुन्‍ने उभिरहेका र शैतान [1] तिनको विरोध गर्नलाई तिनको दाहिने हाततिर उभिरहेको मलाई देखाउनुभयो।

²परमप्रभुले शैतानलाई भन्‍नुभयो “ए शैतान, परमप्रभुले तँलाई हकारून्‌। यरूशलेमलाई चुन्‍नुहुने परमप्रभुले तँलाई हकारून्‌! के यो मानिस आगोबाट निकालिएको अगुल्‍टो होइन र?”

³अब यहोशूचाहिँ स्‍वर्गदूतको अगि फोहोर लुगा लगाएर उभेका थिए।

⁴तब ती स्‍वर्गदूतले आफ्‍नो सामुन्‍ने उभिरहनेहरूलाई भने, “त्‍यसको फोहोर लुगाहरू फुकालिदेओ।” तब तिनले यहोशूलाई भने, “हेर, मैले तिम्रा पाप दूर गरिदिएँ, र म तिमीलाई दामी-दामी लुगा लगाइदिनेछु।”

⁵तब मैले भनें, “तिनको शिरमा एउटा सफा फेटा लगाइदेऊ।” यसैले तिनीहरूले तिनलाई एउटा सफा फेटा र लुगा लगाइदिए, र परमप्रभुका स्‍वर्गदूत नजिक उभिरहेका थिए।

⁶तब परमप्रभुका स्‍वर्गदूतले यहोशूलाई यो कड़ा आज्ञा दिए:

⁷“सर्वशक्तिमान्‌ परमप्रभु यसो भन्‍नुहुन्‍छ, ‘यदि तँ मेरो मार्गमा हिँड़िस्‌ र तैंले मेरा आज्ञा पालन गरिस्‌ भने, तँ मेरो घरको जिम्‍मेवार र मेरो मन्‍दिरको हेरचाह गर्ने हुनेछस्, र यी यहाँ उभिरहनेहरूका बीचमा म तँलाई एउटा स्‍थान दिनेछु।

⁸“‘हे यहोशू प्रधान पूजाहारी र तेरो सामुन्‍ने बस्‍ने तेरा साथीहरू, जो पछि हुने कुराका चिन्हजस्‍ता छन्‌। यी कुरा सुन। हेर्, म मेरो दास, अर्थात्‌ हाँगालाई ल्‍याउनेछु।

⁹यहोशूको सामु राखिएको ढुङ्गालाई हेर्‌। त्‍यसमा सात वटा आँखा छन्, र म त्‍यसमा लेखोट खोप्‍नेछु, र एकै दिनमा यस देशको पाप हटाउनेछु,’ सर्वशक्तिमान्‌ परमप्रभु भन्‍नुहुन्‍छ।

¹⁰“‘त्‍यस दिन तिमीहरू हरेकले आफ्‍नो छिमेकीलाई दाखको बोटमुनि र नेभाराको बोटमुनि बस्‍न निम्‍तो दिनेछौ,” सर्वशक्तिमान्‌ परमप्रभु भन्‍नुहुन्‍छ।