Read Nepali New Revised Version, 2012 जकरिया 6 Bible Online

जकरिया 6 - Nepali New Revised Version, 2012 bible

जकरिया 6

¹फेरि मैले माथि हेरें, र मेरो अगि दुई पर्वतहरूका बीचबाट चार वटा रथहरू आएका देखें। ती पर्वतहरू काँसाका थिए।

²पहिलो रथमा राता घोड़ाहरू, दोस्रो रथमा काला घोड़ाहरू,

³तेस्रो रथमा सेता घोड़ाहरू र चौथो रथमा पाङ्‌ग्रे घोड़ाहरू थिए— ती सबै बलिया थिए।

⁴मसित कुरा गर्ने ती स्‍वर्गदूतलाई मैले सोधें, “हे मेरा प्रभु, यी के हुन्‌?”

⁵ती स्‍वर्गदूतले जवाफ दिएर मलाई भने, “यी स्‍वर्गका चार आत्‍माहरू हुन्, जो सारा संसारका परमप्रभुको सामुन्‍ने खड़ा भएर निस्‍किआएका हुन्‌।

⁶काला घोड़ाहरू भएको रथ उत्तर देशतिर जान्‍छ, सेता घोड़ाहरू भएको रथ पश्‍चिमतिर जान्‍छ, र पाङ्‌ग्रे घोड़ाहरू भएको रथ दक्षिणतिर जान्‍छ।”

⁷जब ती बलिया घोड़ाहरू बाहिर निस्‍के, तिनीहरू चारैतिर जानलाई तम्‍सिरहेका थिए। तिनले भने, “पृथ्‍वीका चारैतिर जाओ।” तब तिनीहरू पृथ्‍वीका चारैतिर गए।

⁸तब तिनले कराएर मलाई भने, “हेर, ती उत्तरको देशतिर लाग्‍नेहरूले मेरो आत्‍मालाई त्‍यहाँ आराम दिएका छन्‌।”

⁹परमप्रभुको यो वचन मकहाँ आयो:

¹⁰“बेबिलोनको निर्वासनबाट आएका हेल्‍दै, तोबियाह र यदायाहबाट भेटी ली। त्‍यही दिन सपन्‍याहको छोरो योशियाहको घरमा जा।

¹¹सुन र चाँदी लिएर एउटा मुकुट बना, र त्‍यो यहोसादाकको छोरो प्रधान पूजाहारी यहोशूको शिरमा लगाइदे।

¹²त्‍यसलाई भन्, ‘सर्वशक्तिमान्‌ परमप्रभु यसो भन्‍नुहुन्‍छ: “हेर, यो मानिस जसको नाउँ हाँगो हो, त्‍यो आफ्‍नो ठाउँमा बढ्‌नेछ, र परमप्रभुको मन्‍दिर बनाउनेछ।

¹³त्‍यसले नै परमप्रभुको मन्‍दिर बनाउनेछ, र त्‍यो महामहिमाले पहिर्‍याइनेछ, र आफ्‍नो सिंहासनमा विराजमान भएर राज्‍य गर्नेछ, र त्‍यो सिंहासनमा एक जना पूजाहारी हुनेछ। अनि दुवैको बीचमा मिलाप हुनेछ’।”

¹⁴हेल्‍दै, तोबियाह, यदायाह र सपन्‍याहको छोरो हेनलाई परमप्रभुको मन्‍दिरमा सम्‍झनाको निम्‍ति त्‍यो मुकुट दिइनेछ।

¹⁵जो टाढ़ा-टाढ़ामा छन्, ती आएर परमप्रभुको मन्‍दिर बनाउन सघाउनेछन्, र सर्वशक्तिमान्‌ परमप्रभुले मलाई तिमीहरूकहाँ पठाउनुभएको हो भनी तिमीहरूले जान्‍नेछौ। तिमीहरूले मन लगाएर परमप्रभु आफ्‍ना परमेश्‍वरको आज्ञा मान्‍यौ भनेदेखि सो हुनेछ।”