Read Nepali New Revised Version, 2012 मलाकी 2 Bible Online

मलाकी 2 - Nepali New Revised Version, 2012 bible

मलाकी 2

¹“अब हे पूजाहारी हो, यो चेताउनी तिमीहरूका निम्‍ति हो।”

²सर्वशक्तिमान्‌ परमप्रभु भन्‍नुहुन्‍छ, “मेरो नाउँलाई सम्‍मान दिन यदि तिमीहरू सुन्‍दैनौ र यो तिमीहरूका हृदयमा राखेनौ भने, म तिमीहरूलाई सराप पठाउनेछु, र तिमीहरूका आशिष्‌हरूलाई सराप दिनेछु। मैले अघि नै ती सरापेको छु, किनकि तिमीहरूले मलाई इज्‍जत दिन आफ्‍ना हृदयलाई ठीक पारेका छैनौ।

³“तिमीहरूको कारण म तिमीहरूका सन्‍ततिलाई हप्‍काउनेछु। म तिमीहरूका मुखमा तिमीहरूका चाड़हरूमा बलि चढ़ाइएका पशुहरूको मैला फिँजाइदिनेछु, र तिमीहरू पनि त्‍यसैसित लगिनेछौ।

⁴लेवीसित बाँधेको मेरो करार रहिरहोस्‌ भनी मैले यो चेताउनी तिमीहरूलाई दिएको हुँ भनी तिमीहरूले थाहा पाउनेछौ,” सर्वशक्तिमान्‌ परमप्रभु भन्‍नुहुन्‍छ।

⁵“मेरो करार त्‍यससँग थियो, जीवन र शान्‍तिको करार, र मेरो सम्‍मान गरोस्‌ भनेर मैले ती त्‍यसलाई दिएँ, र त्‍यसले सम्‍मान गर्‍यो र मेरो नाउँको श्रद्धापूर्वक भय मान्‍यो।

⁶सत्‍यको शिक्षा त्‍यसको मुखमा नै थियो, र त्‍यसका ओठमा कुनै झूटो कुरा पाइएन। शान्‍ति र सोझोपनमा त्‍यो मसँगै हिँड़्यो, र धेरैलाई त्‍यसले पापबाट फर्कायो।

⁷“किनकि पूजाहारीका ओठले ज्ञानको रक्षा गर्नुपर्दछ, र मानिसहरूले त्‍यसको मुखबाट शिक्षा खोज्‍नुपर्दछ, किनभने त्‍यो सर्वशक्तिमान्‌ परमप्रभुको समाचारवाहक हो।

⁸तर तिमीहरू त बाटोदेखि एकातिर लागेका छौ, र तिमीहरूको शिक्षा धेरैलाई ठोकरको कारण भएको छ। लेवीसँग बाँधिएको करार तिमीहरूले भङ्ग गरेका छौ,” सर्वशक्तिमान्‌ परमप्रभु भन्‍नुहुन्‍छ।

⁹“यसैले मैले तिमीहरूलाई सबै मानिसहरूका सामुन्‍ने तुच्‍छ र विनम्र तुल्‍याएको छु, किनभने तिमीहरू मेरो बाटोमा हिँड़ेका छैनौ, तर व्‍यवस्‍थाका कुरामा तिमीहरूले पक्षपात गरेका छौ।”

¹⁰“हामी सबैका एउटै पिता हुनुहुन्‍न र? के एउटै परमेश्‍वरले हामीलाई सृष्‍टि गर्नुभएको होइन र? त किन हामी एकले अर्काको विश्‍वास भङ्ग गरेर हाम्रा पिता-पुर्खाको करारलाई अपवित्र पार्छौं?

¹¹यहूदाले विश्‍वास भङ्ग गरेको छ। इस्राएल र यरूशलेममा घिनलाग्‍दो काम गरिएको छ। यहूदाले पराई देवताकी छोरीलाई विवाह गरेर परमप्रभुलाई मन पर्ने पवित्रस्‍थानलाई अपवित्र पारेको छ।

¹²यसो गर्ने जोसुकै मानिस भए तापनि, त्‍यसले सर्वशक्तिमान्‌ परमप्रभुमा भेटी ल्‍याए तापनि परमप्रभुले त्‍यसलाई याकूबका पालहरूबाट बहिष्‍कृत गरिदेऊन्।

¹³फेरि तिमीहरू अर्को कुरा गर्दछौ: तिमीहरू परमप्रभुको वेदीलाई आँसुले भिजाउँदछौ। तिमीहरू रुँदछौ र विलाप गर्दछौ, किनभने उहाँले तिमीहरूका हातको भेटीलाई कहिल्‍यै ध्‍यान दिनुहुन्‍न, न त त्‍यो उहाँलाई ग्रहणयोग्‍य हुन्‍छ।

¹⁴तिमीहरू सोध्‍छौ, “किन?” किनभने परमप्रभु तिमीहरू र तिमीहरूको जवानीपनकी पत्‍नीको बीचमा साक्षीको काम गर्दैहुनुहुन्‍छ, किनकि तिमीहरूले त्‍यससँगको विश्‍वास भङ्ग गर्‍यौ, यद्यपि तिनी तिम्री जीवन-साथी र वैवाहिक करारमा बाँधिएकी पत्‍नी हो।

¹⁵के परमप्रभुले तिनीहरूलाई एउटै बनाउनुभएको होइन र? शरीर र आत्‍मामा तिनीहरू उहाँकै हुन्‌। अनि तिनीहरू किन एउटै हुन्‌? किनभने उहाँले ईश्‍वरीय सन्‍तान खोज्‍दैहुनुहुन्‍थ्‍यो। यसैले तिमीहरू आफ्‍नो आत्‍माको रक्षा गर, र आफ्‍नो जवानीपनकी पत्‍नीसँगको विश्‍वास भङ्ग नगर।

¹⁶“सम्‍बन्‍धविच्‍छेदको कुरालाई म घृणा गर्दछु,” परमप्रभु इस्राएलका परमेश्‍वर भन्‍नुहुन्‍छ। “मानिसले आफैलाई आफ्‍नो वस्‍त्रलेझैँ अत्‍याचारले ढाक्‍ने कामलाई पनि म घृणा गर्दछु,” सर्वशक्तिमान्‌ परमप्रभु भन्‍नुहुन्‍छ। यसैले आफूलाई आत्‍मामा स्‍वयम्‌ रक्षा गर, र विश्‍वास भङ्ग नगर।

¹⁷तिमीहरूले आफ्‍नो कुराले परमप्रभुलाई थकित तुल्‍याएका छौ। तिमीहरू सोध्‍छौ, “हामीले उहाँलाई कसरी थकित तुल्‍यायौं?” यसो भनेर, “दुष्‍ट काम गर्ने सबै परमप्रभुको दृष्‍टिमा असलै छन्, र उहाँ उनीहरूदेखि खुशी नै हुनुहुन्‍छ,” अथवा “न्‍याय गर्ने परमेश्‍वर कहाँ हुनुहुन्‍छ?”