Read Nepali New Revised Version, 2012 मत्ती 12 Bible Online

मत्ती 12 - Nepali New Revised Version, 2012 bible

मत्ती 12

¹त्‍यस समय येशू शबाथमा [1] अन्‍नका खेतहरूबाट भएर जाँदैहुनुहुन्‍थ्‍यो। उहाँका चेलाहरू भोकाएका थिए र अन्‍नका बाला टिप्‍दै खान लागे।

²तर फरिसीहरूले यो देखेर उहाँलाई भने, “हेर्नोस्, तपाईंका चेलाहरू शबाथमा जे गर्नु अनुचित छ, त्‍यही गर्दछन्‌।”

³तर उहाँले तिनीहरूलाई भन्‍नुभयो, “दाऊदले, उनी र उनका साथमा हुनेहरू भोकाउँदा के गरेथे, के तिमीहरूले पढ़ेका छैनौ?

⁴कसरी उनले परमेश्‍वरको भवनभित्र पसेर चढ़ाइएको रोटी खाएथे? त्‍यो रोटी खान न त उनलाई न उनीसँग हुनेहरूलाई, तर केवल पूजाहारीहरूलाई मात्र उचित थियो।

⁵अथवा के व्‍यवस्‍थामा पढ़ेका छैनौ, कसरी शबाथमा पूजाहारीहरूले मन्‍दिरमा शबाथलाई अपवित्र तुल्‍याउँछन्, र पनि निर्दोषी ठहरिन्‍छन्‌?

⁶तर म तिमीहरूलाई भन्‍दछु, मन्‍दिरभन्‍दा महान्‌ कोही यहाँ छ।

⁷तर ‘म बलिदान होइन, दया चाहन्‍छु’ भनेको अर्थ के हो सो तिमीहरूले जानेका भए तिमीहरूले निर्दोषीलाई दोष लाउनेथिएनौ।

⁸किनकि मानिसको पुत्र शबाथको प्रभु हो।”

⁹त्‍यहाँबाट निस्‍केर उहाँ तिनीहरूको सभाघरमा जानुभयो।

¹⁰त्‍यहाँ एउटा हात सुकेको मानिस थियो। तिनीहरूले येशूलाई दोष लगाउने अभिप्रायले उहाँलाई सोधे, “के शबाथमा कसैलाई निको पार्नु उचित छ?”

¹¹उहाँले तिनीहरूलाई भन्‍नुभयो, “तिमीहरूमध्‍ये कसैको एउटा भेड़ा छ, र शबाथमा त्‍यो खाल्‍डोमा पर्‍यो भने, के तिमी त्‍यसलाई समातेर बाहिर निकाल्‍दैनौ र?

¹²भेड़ाभन्‍दा मानिस कति बढ़ी मूल्‍यवान्‌ छ? यसैकारण शबाथमा भलो गर्नु उचित छ।”

¹³तब उहाँले त्‍यस मानिसलाई भन्‍नुभयो, “तिम्रो हात पसार।” त्‍यसले हात पसार्‍यो, र त्‍यो हात अर्को जस्‍तै सद्दे भइगयो।

¹⁴तर फरिसीहरूले बाहिर गएर उहाँलाई कसरी नाश गरौं भनेर उहाँको विरुद्धमा मतो गर्न लागे।

¹⁵तब त्‍यो कुरा थाहा पाएर येशू त्‍यहाँबाट गइहाल्‍नुभयो, र धेरै जना उहाँको पछि लागे, र उहाँले तिनीहरू सबैलाई निको पार्नुभयो,

¹⁶र उहाँ को हुनुहुन्‍छ सो कसैलाई नबताउने चेताउनी तिनीहरूलाई दिनुभयो।

¹⁷यशैया अगमवक्ताद्वारा भनिएको वचन पूरा हुनलाई नै यो भएको हो,

¹⁸“मेरा दास जसलाई मैले चुनेको छु, मेरा प्रिय जोसँग म प्रसन्‍न छु, म मेरो आत्‍मा तिनमा राखिदिनेछु, र तिनले जाति-जातिलाई न्‍यायको घोषणा गरिदिनेछन्‌।

¹⁹तिनी न त झगड़ा गर्नेछन्‌ न साह्रै चिच्‍च्‍याउनेछन्, न त कसैले तिनको सोर गल्‍लीहरूमा सुन्‍नेछ।

²⁰फुटेको निगालो तिनले भाँच्‍नेछैनन्, र धिपधिप भइरहेको सलेदो तिनले निभाउनेछैनन्, र अन्‍त्‍यमा न्‍यायलाई विजयसम्‍म पुर्‍याउनेछन्‌।

²¹तिनैको नाउँमा जाति-जातिहरूले आशा राख्‍नेछन्‌।”

²²तब उहाँकहाँ भूत लागेको एक जना अन्‍धो र गूँगो मान्‍छे ल्‍याइयो। येशूले त्‍यसलाई निको पार्नुभयो, यतिसम्‍म कि, त्‍यो गूँगो मानिस बोल्‍ने र देख्‍ने भयो।

²³अनि सबै भीड़ले अचम्‍म मानेर भने, “के यिनी दाऊदका पुत्र नै हुन सक्‍छन्‌?”

²⁴तर यो सुनेर फरिसीहरूले भने, “यस मानिसले भूतको मालिक बालजिबुलद्वारा मात्र भूतहरूलाई धपाउँछ।”

²⁵तर उहाँले तिनीहरूको विचार थाहा पाएर तिनीहरूलाई भन्‍नुभयो, “आपसमा फूट परेको हरेक राज्‍य उजाड पारिनेछ, र हरेक सहर अथवा परिवार आफ्‍नै बीचमा फाटो पर्‍यो भने टिक्‍नेछैन।

²⁶यदि शैतानले शैतानलाई निकाल्‍दछ भने, त्‍यो आफ्‍नै विरुद्ध विभाजित हुन्‍छ, र त्‍यसो भए त्‍यसको राज्‍य कसरी टिक्‍न सक्‍छ?

²⁷यदि मैले बालजिबुलद्वारा भूतहरू धपाउँछु भने, तिमीहरूका छोराहरूले चाहिँ कसद्वारा ती निकाल्‍दछन्‌? यसकारण तिनीहरू नै तिमीहरूका न्‍यायकर्ता हुनेछन्‌।

²⁸तर यदि परमेश्‍वरका आत्‍माद्वारा म भूतहरू धपाउँछु भने परमेश्‍वरको राज्‍य तिमीहरूमा आइसकेको छ।

²⁹ “पहिले बलियो मानिसलाई नबाँधिकन, त्‍यसको घरभित्र पसेर कसले त्‍यसको धनमाल लिएर जान सक्‍छ? त्‍यस बलियो मानिसलाई बाँधेपछि मात्र त्‍यसको घर लुट्‌न सक्‍छ।

³⁰ “जो मेरो साथ छैन, त्‍यो मेरो विरुद्धमा छ, र जसले मसँग बटुल्‍दैन, त्‍यसले छरपष्‍ट पार्छ।

³¹त्‍यसैकारण म तिमीहरूलाई भन्‍दछु, मानिसहरूले गरेको हरेक पाप र ईश्‍वर-निन्‍दा क्षमा हुनेछ, तर पवित्र आत्‍माको विरुद्धमा गरिएको निन्‍दा क्षमा हुनेछैन।

³²कसैले मानिसको पुत्रको विरुद्धमा केही भन्‍यो भने त्‍यसलाई क्षमा हुनेछ, तर कसैले पवित्र आत्‍माको विरुद्धमा बोल्‍यो भने त्‍यसलाई यस युगमा र आउने युगमा पनि क्षमा हुनेछैन।

³³ “कि रूखलाई असल बनाओ, र त्‍यसको फल असल हुनेछ। कि रूखलाई खराब बनाओ र त्‍यसको फल पनि खराब हुनेछ। किनभने फलबाट नै रूख चिनिन्‍छ।

³⁴ए सर्पका बच्‍चा हो! तिमीहरू आफै दुष्‍ट छौ, असल कुरा कसरी बोल्‍न सक्‍छौ? किनभने हृदयमा भरिएका कुराहरू नै मुखबाट निस्‍कन्‍छन्‌।

³⁵असल मानिसले आफू भित्र भरिएका असल थोकबाट असलै थोक निकाल्‍छ, तर दुष्‍ट मानिसले आफूमा भरिएको दुष्‍टताबाट दुष्‍ट थोक नै निकाल्‍छ।

³⁶म तिमीहरूलाई भन्‍दछु, हरेक व्‍यर्थको कुरा जो मानिसहरू बोल्‍दछन्, न्‍यायको दिनमा तिनीहरूले त्‍यसको लेखा दिनुपर्नेछ।’

³⁷किनकि तिम्रा वचनहरूले तिमी निर्दोष ठहरिनेछौ, र तिम्रा वचनहरूले तिमी दोषी ठहरिनेछौ।”

³⁸तब शास्‍त्रीहरू र फरिसीहरूमध्‍ये कुनै-कुनैले उहाँलाई भने, “गुरुज्‍यू, हामी तपाईंबाट एउटा चिन्‍ह हेर्न चाहन्‍छौं।”

³⁹उहाँले तिनीहरूलाई जवाफ दिनुभयो, “दुष्‍ट र व्‍यभिचारी पुस्‍ताले चिन्‍ह खोज्‍दछ। तर यस पुस्‍तालाई योना अगमवक्ताको चिन्‍हबाहेक अरू चिन्‍ह दिइनेछैन।

⁴⁰किनकि जसरी योना ठूलो माछाको पेटभित्र तीन दिन र तीन रात थिए, उसरी नै मानिसको पुत्र पनि पृथ्‍वीको गर्भमा तीन दिन र तीन रात रहनेछ।

⁴¹निनवेका मानिसहरू न्‍यायको दिनमा यस पुस्‍ताको साथ खड़ा हुनेछन्, र यसलाई दोषी ठहराउनेछन्, किनकि तिनीहरूले योनाको प्रचारमा पश्‍चात्ताप गरेथे, तर हेर, योनाभन्‍दा महान्‌ कोही यहाँ छ।

⁴²दक्षिणकी महारानी न्‍यायको दिनमा यस पुस्‍ताको साथ खड़ा हुनेछिन्, र यसलाई दोषी ठहराउनेछिन्, किनकि तिनी पृथ्‍वीको पल्‍लो छेउदेखि सोलोमनको बुद्धिका कुरा सुन्‍नलाई आइन्‌। तर हेर, सोलोमनभन्‍दा महान्‌ कोही यहाँ छ।

⁴³ “जब अशुद्ध आत्‍मा मानिसबाट निस्‍केर जान्‍छ, त्‍यो विश्राम खोज्‍दै ओबानो ठाउँतिर डुलिहिँड्‌छ, तर कतै पाउँदैन।

⁴⁴तब त्‍यसले भन्‍छ, ‘जहाँबाट म निस्‍केर आएँ, त्‍यहीँ आफ्‍नो घरमा म फर्किजानेछु।’ फर्किआउँदा त्‍यसले घर रित्तो, सफा गरिराखेको, र सजिएको भेट्टाउँछ।

⁴⁵तब त्‍यो जान्‍छ र आफूभन्‍दा बढ़ी दुष्‍ट अरू सात वटा भूतात्‍मा आफूसँग ल्‍याउँछ, र भित्र पसेर तिनीहरू त्‍यहाँ वास गर्छन्, र त्‍यस मानिसको पछिल्‍लो दशा अघिल्‍लोभन्‍दा अझ नराम्रो हुन्‍छ। यस दुष्‍ट पुस्‍तालाई पनि त्‍यस्‍तै हुनेछ।”

⁴⁶येशू भीड़हरूसँग बोलिरहनुभएको बेला, उहाँका आमा र भाइहरू बाहिर खड़ा थिए, र उहाँसँग कुरा गर्न चाहन्‍थे।

⁴⁷तब एक जनाले येशूलाई भन्‍यो, “हेर्नुहोस्, तपाईंकी आमा र तपाईंका भाइहरू बाहिर खड़ा छन्, र तपाईंसँग कुरा गर्न चाहन्‍छन्‌।”

⁴⁸तर उहाँसँग बोल्‍नेलाई येशूले भन्‍नुभयो, “मेरी आमा को हुन्‌? मेरा भाइहरू को हुन्‌?”

⁴⁹अनि उहाँले आफ्‍नो हातले चेलाहरूलाई देखाउँदै भन्‍नुभयो, “हेर मेरी आमा र मेरा भाइहरू।

⁵⁰किनभने जसले स्‍वर्गमा हुनुहुने मेरा पिताको इच्‍छा पालन गर्दछ, त्‍यही नै मेरो भाइ, र मेरी बहिनी, र मेरी आमा हुन्‌।”