Read Nepali New Revised Version, 2012 मत्ती 23 Bible Online

मत्ती 23 - Nepali New Revised Version, 2012 bible

मत्ती 23

¹तब येशूले भीड़हरू र आफ्‍ना चेलाहरूलाई यसो भन्‍नुभयो:

²“शास्‍त्रीहरू र फरिसीहरू मोशाको आसनमा बस्‍तछन्‌।

³यसकारण तिनीहरूले भनेका कुरा गर र मान, तर तिनीहरूले गरेजस्‍तो चाहिँ नगर, किनकि तिनीहरूले शिक्षा त दिन्‍छन्, तर त्‍यसअनुसार गर्दैनन्‌।

⁴तिनीहरूले गह्रौँ र बोक्‍न नसक्‍ने भारी बाँधेर मानिसहरूका काँधमा राखिदिन्‍छन्‌। तर तिनीहरू आफैचाहिँ ती उठाउनलाई एक औँलाले पनि छुँदैनन्‌।

⁵ “तर तिनीहरू आफ्‍ना सारा काम मानिसहरूलाई देखाउनलाई गर्दछन्‌। किनभने तिनीहरू आफ्‍ना निधार र नाडीमा व्‍यवस्‍था-पत्री ठूला बनाउँछन्, र आफ्‍ना वस्‍त्रका झुम्‍काहरू लम्‍म्‍याउँछन्,

⁶भोजहरूमा तिनीहरू सम्‍मानका स्‍थान र सभाघरहरूमा प्रमुख आसनहरू मन पराउँछन्,

⁷बजारहरूमा अभिवादन खोज्‍छन्‌ र मानिसहरूले गुरु भनेका रुचाउँछन्‌।

⁸ “तर तिमीहरूलाई कसैले ‘गुरुज्‍यू’ नभनोस्, किनकि तिमीहरूका शिक्षक एउटै हुनुहुन्‍छ, र तिमीहरूचाहिँ सबै दाजुभाइ हौ।

⁹तिमीहरू पृथ्‍वीमा कसैलाई आफ्‍ना पिता नभन, किनकि स्‍वर्गमा तिमीहरूका एउटै पिता हुनुहुन्‍छ।

¹⁰तिमीहरूलाई कसैले ‘मालिक’ नभनोस्, किनकि तिमीहरूका एकमात्र मालिक ख्रीष्‍ट नै हुनुहुन्‍छ।

¹¹तिमीहरूमध्‍ये जो सबैभन्‍दा उच्‍च छ, त्‍यो तिमीहरूको सेवक हुनेछ।

¹²जसले आफूलाई उच्‍च पार्छ, त्‍यो होच्‍याइनेछ, र जसले आफूलाई होच्‍याउँछ, त्‍यो उच्‍च पारिनेछ।

¹³ “धिक्‍कार, तिमीहरूलाई, शास्‍त्री र फरिसी हो, ढोंगीहरू! किनकि तिमीहरू मानिसहरूका सामुन्‍ने स्‍वर्गका राज्‍यको ढोका बन्‍द गर्दछौ। तिमीहरू न त आफै पस्‍तछौ, न पस्‍न चाहनेहरूलाई पस्‍न दिन्‍छौ। [

¹⁴“धिक्‍कार तिमीहरूलाई, शास्‍त्री र फरिसी हो, ढोंगीहरू! किनकि तिमीहरू विधवाहरूका घर खाइदिन्‍छौ, र लामो-लामो प्रार्थना गर्ने भान पार्दछौ। यसैले अरूले भन्‍दा तिमीहरूले ज्‍यादा दण्‍ड पाउनेछौ।]

¹⁵ “धिक्‍कार तिमीहरूलाई, शास्‍त्री र फरिसी हो, ढोंगीहरू! किनकि तिमीहरू एक जनालाई आफ्‍नो मतमा ल्‍याउनलाई समुद्र र जमिन चहार्दछौ, र त्‍यो तिमीहरूको मतमा आएपछि त्‍यसलाई आफूभन्‍दा दोबर नरकको छोरो बनाउँछौ।

¹⁶ “धिक्‍कार तिमीहरूलाई, अन्‍धा अगुवा हो, जसले भन्‍दछौ, ‘कसैले मन्‍दिरको शपथ खाँदा केही हुँदैन, तर मन्‍दिरका सुनको शपथ खाँदा त्‍यस शपथले बाँधिनेछ।’

¹⁷मूर्ख र अन्‍धा हो, कुनचाहिँ ठूलो हो? सुन कि सुनलाई पवित्र पार्ने मन्‍दिर?

¹⁸‘कसैले वेदीको शपथ खाँदा केही हुँदैन, तर त्‍यसमाथि राखिएको भेटीको शपथ खाँदाचाहिँ शपथले बाँधिनेछ।’

¹⁹ए अन्‍धा हो, कुनचाहिँ ठूलो हो? भेटी कि भेटीलाई पवित्र पार्ने वेदी?

²⁰यसकारण वेदीको शपथ खानेले वेदीको र त्‍यसमाथिका सबै थोकको शपथ खान्‍छ।

²¹मन्‍दिरको शपथ खानेले मन्‍दिर र त्‍यसभित्र वास गर्नुहुनेको शपथ खान्‍छ।

²²स्‍वर्गको शपथ खानेले परमेश्‍वरका सिंहासनको र त्‍यसमाथि विराजमान हुनुहुनेको शपथ खान्‍छ।

²³ “धिक्‍कार तिमीहरूलाई, शास्‍त्री र फरिसी हो, ढोंगीहरू! किनकि तिमीहरू पुदीना र सूँप र जीराको दशांश दिन्‍छौ, तर व्‍यवस्‍थाका गहकिला विषयहरू, अर्थात्‌ न्‍याय, दया र विश्‍वासको अवहेलना गरेका छौ। तिमीहरूले दशांश दिने काम गर्नुपर्नेथियो, अनि ती गहकिला विषयहरूको अवहेलना नगर्नुपर्नेथियो।

²⁴अन्‍धा अगुवा हो, तिमीहरू भुसुना चाल्‍दछौ, तर ऊँटलाई चाहिँ निलिहाल्‍दछौ।

²⁵ “धिक्‍कार तिमीहरूलाई, शास्‍त्री र फरिसी हो, ढोंगीहरू! किनभने तिमीहरू कचौरा र थालको बाहिरपट्टि माझ्‍दछौ, तर भित्रपट्टि भने ती लोभ र असंयमले भरिएका हुन्‍छन्‌।

²⁶अन्‍धा फरिसी हो, पहिले कचौरा र थालको भित्रपट्टि सफा पार, र तिनको बाहिरपट्टि पनि सफा होस्‌।

²⁷ “धिक्‍कार तिमीहरूलाई, शास्‍त्री र फरिसी हो, ढोंगीहरू! किनकि तिमीहरू चून लाइराखेका चिहानहरूजस्‍ता छौ, जो बाहिरपट्टि सुन्‍दर देखा पर्छन्, तर भित्रपट्टि भने मरेका मान्‍छेहरूका हाड़हरू र सबै अशुद्धताले भरिएका हुन्‍छन्‌।

²⁸यसरी नै तिमीहरू पनि बाहिर भने मानिसहरूका सामुन्‍ने धर्मी देखा पर्दछौ, तर भित्र भने कपट र दुष्‍टताले भरिएका छौ।

²⁹ “धिक्‍कार तिमीहरूलाई, शास्‍त्री र फरिसी हो, ढोंगीहरू! किनकि तिमीहरू अगमवक्ताका चिहानहरू बनाउँछौ, र धर्मीहरूका स्‍मारकलाई सिङ्गार्छौ,

³⁰र भन्‍दछौ, ‘हामी आफ्‍ना पुर्खाहरूका समयमा भए ता हामी अगमवक्ताहरूको रगत बगाउनमा उनीहरूसँग सहभागी हुनेथिएनौं।’

³¹यसरी तिमीहरू अगमवक्ताहरूलाई हत्‍या गर्नेका सन्‍तान हौ भन्‍ने प्रमाण तिमीहरू आफै दिन्‍छौ।

³²तिमीहरूका पुर्खाहरूले गरेका पापको काम पूरा गर।

³³ “सर्पहरू, साँभे सर्पका बच्‍चा हो, तिमीहरू नरकको दण्‍डदेखि कसरी उम्‍कनेछौ?

³⁴यसकारण म तिमीहरूकहाँ अगमवक्ताहरू, बुद्धिमान्‌ मानिसहरू र शास्‍त्रीहरू पठाउँछु। तिनीहरूमध्‍ये कति जनालाई तिमीहरूले मार्नेछौ र क्रूसमा टाँग्‍नेछौ, र कति जनालाई आफ्‍ना सभाघरहरूमा कोर्रा लगाउनेछौ, र सहर-सहर हुँदो सताउनेछौ।

³⁵पृथ्‍वीमा बगाइएको सब धर्मी जनको रगत— निर्दोष हाबिलको रगतदेखि लिएर बेरेक्‍याहका छोरा जकरियाको रगतसम्‍म, जसलाई तिमीहरूले पवित्रस्‍थान र वेदीका बीचमा हत्‍या गर्‍यौ— सो तिमीहरूकै टाउकामा पर्नेछ।

³⁶साँच्‍चै, म तिमीहरूलाई भन्‍दछु, यी सबै कुरा यसै पुस्‍तामाथि आइपर्नेछन्‌।

³⁷ “ए यरूशलेम, ए यरूशलेम, तँ जसले अगमवक्ताहरूलाई मार्ने र तँकहाँ पठाइएकाहरूलाई ढुङ्गाले हान्‍ने! जसरी कुखुरीले आफ्‍ना चल्‍लाहरूलाई पखेटामुनि बटुल्‍छ, त्‍यसरी नै मैले धेरै पल्‍ट तेरा बालकहरूलाई बटुल्‍ने इच्‍छा गरें, तर तैंले मानिनस्‌।

³⁸हेर, तिमीहरूको घर उजाड छोडिएको छ।

³⁹किनभने म तिमीहरूलाई भन्‍दछु, ‘परमप्रभुको नाउँमा आउने धन्‍यका हुन्’ नभनेसम्‍म तिमीहरूले मलाई देख्‍नेछैनौ।”