Read Nepali New Revised Version, 2012 मर्कूस 14 Bible Online

मर्कूस 14 - Nepali New Revised Version, 2012 bible

मर्कूस 14

¹यसको दुई दिनपछि निस्‍तार र अखमिरी रोटीको चाड थियो। मुख्‍य पूजाहारीहरू र शास्‍त्रीहरू उहाँलाई कसरी छलद्वारा पक्रेर मारौं भन्‍ने दाउमा थिए।

²किनभने तिनीहरूले भनेका थिए, “चाड़को बेलामा होइन, नत्रता मानिसहरूमा हूलदङ्गा मच्‍चिएला।

³उहाँ बेथानियामा सिमोन कुष्‍ठरोगीको घरमा खान बस्‍नुहुँदा एउटी स्‍त्री विशुद्ध जटामसीको बहुमूल्‍य अत्तर सिङ्गमरमरको शीशीमा लिएर आई, र त्‍यो शीशी फुटाएर त्‍यो सुगन्‍धित जटामसीको अत्तर उहाँको शिरमा खन्‍याई।

⁴तर कोही-कोहीले रीस गरेर आपसमा भन्‍न लागे, “यो सुगन्‍धित अत्तर किन यसरी नोक्‍सानी गरेको?

⁵किनकि यो अत्तर तीन सय चाँदीका सिक्‍काभन्‍दा बढ़ीमा बिक्री गरेर गरीबहरूलाई त्‍यो पैसा दिन सकिन्‍थ्‍यो।” अनि तिनीहरूले त्‍यस स्‍त्रीलाई झपारे।

⁶तर येशूले भन्‍नुभयो, “छोडिदेओ, किन तिमीहरू यिनलाई सताउँछौ? यिनले मप्रति असल काम गरेकी छे।

⁷किनभने गरीबहरू त तिमीहरूसँग सधैँ हुन्‍छन्, र इच्‍छा लागेको कुनै पनि समय तिमीहरू तिनीहरूको भलाइ गर्न सक्‍छौ। तर म त सधैँ तिमीहरूका साथमा हुँदिनँ।

⁸यस स्‍त्रीले जे गर्न सक्‍थी त्‍यही गरेकी छे। यिनले मेरो शरीरको दफनको निम्‍ति अघिबाटै सुगन्‍धित अत्तर घसेर तयार पारेकी छे।

⁹साँच्‍चै, म तिमीहरूलाई भन्‍दछु, सारा संसारमा जहाँ-जहाँ यो सुसमाचार प्रचार गरिन्‍छ, यस स्‍त्रीले जे गरेकी छे यिनको सम्‍झनाको लागि यो कार्यको वर्णन गरिनेछ।”

¹⁰तब बाह्र चेलाहरूमध्‍ये एक जना यहूदा इस्‍करियोतचाहिँ येशूलाई तिनीहरूका हातमा पक्राइदिनका निम्‍ति मुख्‍य पूजाहारीहरूकहाँ गयो।

¹¹तिनीहरू यो सुनेर खुसी भए, र त्‍यसलाई पैसा दिने कबूल गरे। अनि उहाँलाई कसरी पक्राऊँ भनी त्‍यसले अनुकूल मौका खोज्‍न लाग्‍यो।

¹²अखमिरी रोटीका चाड़को प्रथम दिनमा, जब तिनीहरूले निस्‍तार-चाड़को थुमा बलिदान चढ़ाउँथे, उहाँका चेलाहरूले उहाँलाई सोधे, “तपाईंको इच्‍छा के छ? हामी कहाँ गएर तपाईंको निम्‍ति निस्‍तार-चाड़को भोज तयार गरौं?”

¹³अनि उहाँले आफ्‍ना चेलाहरूमध्‍ये दुई जनालाई यसो भनेर पठाउनुभयो, “सहरमा जाओ, र गाग्रोमा पानी बोकेर लैजाने एक जना मानिसले तिमीहरूलाई भेट्‌नेछ। उसको पछि लाग।

¹⁴त्‍यो मानिस जहाँ पस्‍ला त्‍यस घरका मालिकलाई भन, ‘गुरुज्‍यू भन्‍नुहुन्‍छ, मेरा चेलाहरूसँग निस्‍तार-चाडको भोज खाने मेरो पाहुना कोठा कहाँ छ?’

¹⁵अनि तिनले तिमीहरूलाई सजिसजाउ गरेर तयार पारिएको माथिल्‍लो तलाको एउटा ठूलो कोठा देखाउनेछन्, र त्‍यहीँ तिमीहरूले हाम्रा निम्‍ति भोज तयार गर।”

¹⁶तब ती चेलाहरू गए, र सहरमा पसे, अनि उहाँले तिनीहरूलाई भन्‍नुभएजस्‍तै भेट्टाए, र तिनीहरूले निस्‍तार-चाड़को भोज तयार गरे।

¹⁷साँझ हुँदा उहाँ बाह्रै जनासँग आउनुभयो।

¹⁸उहाँहरू ढल्‍केर खानुहुँदैगर्दा येशूले भन्‍नुभयो, “साँच्‍चै म तिमीहरूलाई भन्‍दछु, तिमीहरूमध्‍ये मसँग खाने एक जनाले मलाई धोका दिनेछ।”

¹⁹तिनीहरू दुःखित भए, अनि पालैपालो उहाँलाई “के त्‍यो म हुँ?” भनी सोध्‍न लागे।

²⁰उहाँले तिनीहरूलाई भन्‍नुभयो, “बाह्रैमध्‍ये एक जना, जसले मसँग थालमा रोटी चोपिरहेछ।

²¹किनकि मानिसको पुत्रलाई उसको विषयमा लेखिएबमोजिम हुन्‍छ, तर धिक्‍कार त्‍यस व्‍यक्तिलाई जसद्वारा मानिसको पुत्रलाई धोका हुन्‍छ। त्‍यस मान्‍छेको त जन्‍मै नभएको भए असल हुनेथियो।”

²²अनि खाइरहनुहुँदा येशूले रोटी लिनुभयो, आशीर्वाद दिनुभयो र भाँच्‍नुभयो र तिनीहरूलाई दिँदै भन्‍नुभयो, “लेओ, यो मेरो शरीर हो।”

²³अनि कचौरा लिएर धन्‍यवाद दिनुभएपछि उहाँले तिनीहरूलाई दिनुभयो, र तिनीहरू सबैले त्‍यसबाट पिए।

²⁴अनि उहाँले तिनीहरूलाई भन्‍नुभयो, “यो नयाँ करारको मेरो रगत हो, जो धेरैका निम्‍ति बगाइन्‍छ।

²⁵साँच्‍चै, म तिमीहरूलाई भन्‍दछु, म दाखको रसबाट त्‍यस दिनसम्‍म पिउनेछैनँ, जहिलेसम्‍म परमेश्‍वरको राज्‍यमा त्‍यो नयाँ गरी पिउँदिनँ।”

²⁶अनि एउटा भजन गाएर उहाँहरू निस्‍केर जैतून डाँड़ातिर जानुभयो।

²⁷येशूले तिनीहरूलाई भन्‍नुभयो, “तिमीहरू सबै पछि हटिजानेछौ, किनकि यस्‍तो लेखिएको छ, ‘म गोठालालाई प्रहार गर्नेछु, र भेड़ाहरू तितरबितर हुनेछन्‌।’

²⁸तर म जीवित भई उठेपछि म तिमीहरूभन्‍दा पहिले गालीलमा जानेछु।”

²⁹पत्रुसले उहाँलाई भने, “सबै जना पछि हटे तापनि मचाहिँ हट्‌नेछैनँ।”

³⁰तब येशूले तिनलाई भन्‍नुभयो, “साँच्‍चै, म तिमीहरूलाई भन्‍दछु, आजकै राती भाले दुई पल्‍ट बास्‍न अघि तिमीले मलाई तीन पल्‍ट इन्‍कार गर्नेछौ।”

³¹तर तिनले झन्‌ जोड दिएर भने, “तपाईंसँग म मर्नैपरे तापनि म तपाईंलाई इन्‍कार गर्नेछैनँ।” अनि तिनीहरू सबैले त्‍यसै भने।

³²त्‍यसपछि उहाँहरू गेतसमनी नाउँ भएको ठाउँमा जानुभयो, र उहाँले आफ्‍ना चेलाहरूलाई भन्‍नुभयो, “मैले प्रार्थना गरुञ्‍जेल तिमीहरू यहीँ बस।”

³³तब उहाँले पत्रुस, याकूब र यूहन्‍नालाई साथमा लैजानुभयो, र उहाँ अत्‍यन्‍तै विचलित र ज्‍यादै खिन्‍न हुन लाग्‍नुभयो।

³⁴उहाँले तिनीहरूलाई भन्‍नुभयो, “मेरो आत्‍मा मृत्‍युसम्‍मै शोकले व्‍याकुल भएको छ। तिमीहरू यहीँ बस, र जागा रहो।”

³⁵अनि अलि पर गएर उहाँ भूइँमा घोप्‍टिनुभयो, र हुन सक्‍छ भने त्‍यो घड़ी उहाँबाट टलोस्‌ भनी प्रार्थना गर्नुभयो।

³⁶अनि उहाँले भन्‍नुभयो, “अब्‍बा, पिता, तपाईंको निम्‍ति सबै कुरा सम्‍भव छ। यो कचौरा मबाट हटाइदिनुहोस्‌। तर पनि मैले इच्‍छा गरेजस्‍तो होइन, तपाईंले इच्‍छा गर्नुभएजस्‍तो होस्‌।”

³⁷उहाँ फेरि आउनुहुँदा तिनीहरूलाई निदाइरहेका भेट्टाउनुभयो। उहाँले पत्रुसलाई भन्‍नुभयो, “सिमोन, के तिमी निदाइरहेछौ? के एक घण्‍टा पनि जागा बस्‍न सकेनौ?

³⁸जागा रहो, अनि प्रार्थना गर, र तिमीहरू परीक्षामा नपर। आत्‍मा त साँच्‍चै तयार छ, तर शरीर दुर्बल छ।”

³⁹फेरि गएर उहाँले दोहोर्‍याएर त्‍यही प्रार्थना गर्नुभयो।

⁴⁰फेरि आएर उहाँले तिनीहरूलाई निदाइरहेका भेट्टाउनुभयो, किनभने तिनीहरूका आँखा निद्राले साह्रै लट्ठिएका थिए, र उहाँलाई के जवाफ दिने हो, सो जानेनन्‌।

⁴¹उहाँ तेस्रो पल्‍ट आउनुभयो, र तिनीहरूलाई भन्‍नुभयो, “के तिमीहरू अझै निदाउँदैछौ र आराम गरिरहेका छौ? अब भयो, बेला आइपुग्‍यो। हेर, मानिसको पुत्र पापीहरूका हातमा पक्राउ पर्न लागेको छ।

⁴²उठ, जाऔं। हेर, मलाई विश्‍वासघात गर्ने नजिकै छ।”

⁴³येशू बोल्‍दैहुनुहुँदा बाह्रै चेलाहरूमध्‍येको एक जना यहूदा अचानक त्‍यहाँ देखा पर्‍यो। मुख्‍य पूजाहारीहरू, शास्‍त्रीहरू र धर्म-गुरुहरूले पठाएको एक दल तरवार र लाठो लिएर त्‍यससँग त्‍यहाँ आयो।

⁴⁴उहाँलाई विश्‍वासघात गर्नेले तिनीहरूलाई यस्‍तो एउटा सङ्केत दिएको थियो, “जसलाई म म्‍वाइँ खाउँला त्‍यो व्‍यक्ति तिनै हुन्, तिनलाई पक्र र पहरा दिएर लैजाओ।”

⁴⁵अनि सोझै येशूकहाँ गएर यहूदाले भन्‍यो, “हे रब्‍बी,” र उहाँलाई म्‍वाइँ खायो।

⁴⁶तब तिनीहरूले येशूलाई समाते र गिरफ्‍तार गरे।

⁴⁷त्‍यहाँ नजिक उभिनेहरूमध्‍ये कुनै एउटाले तरवार थुतेर प्रधान पूजाहारीको कमारालाई प्रहार गर्‍यो, र त्‍यसको कान च्‍वाट्ट काटिदियो।

⁴⁸येशूले तिनीहरूलाई भन्‍नुभयो, “के तिमीहरू एउटा डाँकूलाई जस्‍तै तरवार र लाठोसमेत लिएर मलाई पक्रन आएका छौ?

⁴⁹दिनदिन मन्‍दिरमा सिकाउँदै म तिमीहरूसँग थिएँ, र तिमीहरूले मलाई गिरफ्‍तार गरेनौ। तर धर्मशास्‍त्र पूरा होस्‌।”

⁵⁰अनि सबै चेलाहरू उहाँलाई त्‍यागेर भागे।

⁵¹आफ्‍नो शरीरलाई एउटा सूती कपड़ाले मात्र बेह्रेको एक जना जवान उहाँको पछि लाग्‍यो। तिनीहरूले त्‍यस जवानलाई समाते,

⁵²तर कपड़ा छोड़ेर त्‍यो नाङ्गै भाग्‍यो।

⁵³तब तिनीहरूले येशूलाई प्रधान पूजाहारीकहाँ लगे, र त्‍यहाँ सबै मुख्‍य पूजाहारीहरू, धर्म-गुरुहरू र शास्‍त्रीहरू जम्‍मा भएका थिए।

⁵⁴पत्रुसचाहिँ टाढ़ैबाट प्रधान पूजाहारीको आँगनभित्र उहाँको पछिपछि लागे, अनि त्‍यहाँ सिपाहीहरूसँग बसेर तिनी आगो ताप्‍न लागे।

⁵⁵अब मुख्‍य पूजाहारी र जम्‍मै महासभाले येशूलाई मार्नको निम्‍ति उहाँको विरुद्धमा गवाही खोजे, तर केही पाएनन्‌।

⁵⁶धेरैले उहाँको विरुद्धमा झूटो गवाही दिए। तर तिनीहरूले दिएको गवाहीले मेल खाएन।

⁵⁷कसै-कसैले उठेर उहाँको विरुद्धमा यसो भन्‍दै गवाही दिए,

⁵⁸“यसले यसो भनेको हामीले सुन्‍यौं, ‘मानिसको हातले बनाएको यो मन्‍दिर म भत्‍काउनेछु, र हातैविना बनाइएको अर्को मन्‍दिर म तीन दिनमा निर्माण गर्नेछु’।”

⁵⁹तर यसमा पनि तिनीहरूको गवाही एकै मतको थिएन।

⁶⁰तब प्रधान पूजाहारीले बीचमा खड़ा भएर येशूलाई सोधे, “के तँसँग केही जवाफ छैन? यी मानिसहरूले तेरो विरुद्धमा गवाही दिएको के हो?”

⁶¹तर येशू चूप लाग्‍नुभयो, र केही जवाफ दिनुभएन। फेरि प्रधान पूजाहारीले उहाँलाई सोधे, “के तँ परमधन्‍यको पुत्र ख्रीष्‍ट होस्‌?”

⁶²येशूले भन्‍नुभयो, “म हुँ, अनि तपाईंहरूले मानिसको पुत्रलाई सर्वशक्तिमान्‌को दाहिने बाहुलीतर्फ बसिरहेको र आकाशका बादलहरूका साथमा आइरहेको देख्‍नुहुनेछ।”

⁶³तब प्रधान पूजाहारीले आफ्‍नो वस्‍त्र च्‍यातेर भने, “हामीलाई अरू साक्षीहरूको के दरकार पर्‍यो र?

⁶⁴तिमीहरूले ईश्‍वर-निन्‍दा त सुनिहाल्‍यौ। तिमीहरूको के विचार छ?” अनि तिनीहरू सबैले उहाँलाई मृत्‍युदण्‍डको योग्‍य ठहराए।

⁶⁵अनि कोही-कोहीले उहाँलाई थुक्‍न लागे, र उहाँको मुख छोपेर उहाँलाई थप्‍पड़ हानेर भने, “अगमवाणी बोल्‌।” त्‍यसपछि पहरादारले उहाँलाई आफ्‍नो जिम्‍मामा लिए, र उहाँलाई मुक्‍का हाने।

⁶⁶पत्रुस तल आँगनमा हुँदा प्रधान पूजाहारीका नोकर्नीहरूमध्‍ये एक जना त्‍यहाँ आई,

⁶⁷र पत्रुसलाई आगो तापिरहेका देखेर तिनलाई नियालेर हेरी भनी, “तिमी पनि येशू नासरीसँग थियौ।”

⁶⁸तर तिनले यसो भन्‍दै इन्‍कार गरे, “तिमीले के भनेकी त्‍यो न जान्‍दछु न बुझ्‍दछु।” अनि तिनी बाहिरको मूल ढोकातिर गए। अनि भाले बास्‍यो।

⁶⁹नोकर्नीले उभिनेहरूसँग फेरि भन्‍न लागी, “यिनी त तिनीहरूमध्‍येका एक हुन्‌।”

⁷⁰तर पत्रुसले फेरि इन्‍कार गरे। तर केही बेरपछि वरपर उभिनेहरूले फेरि पत्रुसलाई भने, “पक्‍कै, तिमी तिनीहरूमध्‍येका एक हौ, किनकि तिमी गालीली हौ।”

⁷¹तर तिनले आफूलाई धिक्‍कार्दै कसम खाएर भन्‍न लागे, “जसको विषयमा तिमीहरू भन्‍छौ त्‍यस मानिसलाई म चिन्‍दिनँ।”

⁷²अनि तुरुन्‍तै दोस्रो पल्‍ट भाले बास्‍यो, र पत्रुसलाई येशूले यसो भन्‍नुभएको कुरा सम्‍झना भयो, “भाले दुई पल्‍ट बास्‍न अघि तिमीले मलाई तीन पल्‍ट इन्‍कार गर्नेछौ।” अनि त्‍यस कुरालाई सम्‍झेर तिनी धुरुधुरु रोए।