Read Nepali New Revised Version, 2012 मर्कूस 3 Bible Online

मर्कूस 3 - Nepali New Revised Version, 2012 bible

मर्कूस 3

¹पछिबाट फेरि उहाँ सभाघरमा पस्‍नुभयो। त्‍यहाँ सुकेको हात भएको एक जना मानिस थियो।

²कतै उहाँले त्‍यसलाई शबाथ-दिनमा निको पार्नुहुन्‍छ कि भनी उहाँलाई दोष लाउन मानिसहरू उहाँको चेवामा थिए।

³तब उहाँले सुकेको हात भएको मानिसलाई भन्‍नुभयो, “यता आऊ।”

⁴उहाँले तिनीहरूलाई भन्‍नुभयो, “शबाथ-दिनमा भलो गर्नु कि खराबी गर्नु, प्राण बचाउनु कि नाश गर्नु, कुनचाहिँ उचित छ?” तर तिनीहरू चूप लागिरहे।

⁵तिनीहरूका हृदयको कठोरतामा दुःखित भई क्रोधित भएर उहाँले तिनीहरू सबैलाई हेर्नुभयो अनि त्‍यस मानिसलाई भन्‍नुभयो, “तिम्रो हात पसार।” त्‍यसले हात पसार्‍यो र त्‍यसको हात निको भयो।

⁶तब निस्‍केर गई उहाँलाई कसरी नाश पारौं भनी फरिसीहरूले तुरुन्‍तै हेरोदीहरूसँग उहाँको विरुद्धमा मतो गरे।

⁷त्‍यसपछि येशू आफ्‍ना चेलाहरूसँग समुद्रतिर जानुभयो, र गालीलबाट मानिसहरूको ठूलो भीड उहाँको पछि लाग्‍यो।

⁸यहूदिया, यरूशलेम, इदुमिआ, यर्दनपारी र टुरोस र सीदोनका वरिपरिबाट मानिसहरूको ठूलो भीड उहाँका अचम्‍मका कामको कीर्ति सुनेर उहाँकहाँ आयो।

⁹भीड़ले उहाँलाई नमिचोस्‌ भनी उहाँले आफ्‍ना चेलाहरूलाई आफ्‍नो निम्‍ति एउटा डुङ्गा तयार पार्न लगाउनुभयो।

¹⁰उहाँले धेरैलाई निको पार्नुभएको हुनाले रोग लागेका सबैले उहाँलाई छोऔं भनेर ठेलमठेला गर्दथे।

¹¹जब अशुद्ध आत्‍माहरूले उहाँलाई देख्‍दथे, तब उहाँको अगि घोप्‍टो परेर यसो भन्‍दै कराउँथे, “तपाईं परमेश्‍वरका पुत्र हुनुहुन्‍छ।”

¹²तर उहाँलाई प्रकट नगर्नू भनी तिनीहरूलाई उहाँले कड़ा हुकुम दिनुभयो।

¹³त्‍यसपछि येशू डाँड़ामा उक्‍लनुभयो, र उहाँले चाहनुभएका जतिलाई बोलाउनुभयो, र तिनीहरू उहाँकहाँ आए।

¹⁴आफूसँग रहन र प्रचार गर्न पठाउनलाई उहाँले बाह्र जनालाई नियुक्त गर्नुभयो,

¹⁵र तिनीहरूलाई भूतहरू निकाल्‍ने अधिकार पनि दिनुभयो।

¹⁶ती बाह्र प्रेरितहरू यी नै हुन्: सिमोन, जसको नाउँ उहाँले पत्रुस राख्‍नुभयो,

¹⁷जब्‍दियाका छोरा याकूब र याकूबका भाइ यूहन्‍ना। उहाँले तिनीहरूलाई बोअनर्गेश, अर्थात्‌ गर्जनका छोराहरू भन्‍ने नाउँ दिनुभयो।

¹⁸अन्‍द्रियास, फिलिप, बारथोलोमाइ, मत्ती, थोमा, अल्‍फयसका छोरा याकूब, र थेदियस, सिमोन कनानी,

¹⁹र यहूदा इस्‍करियोत जसले उहाँलाई धोका दियो।

²⁰त्‍यसपछि येशू फेरि घरतिर जानुभयो। फेरि भीड जम्‍मा भयो, यहाँसम्‍म कि उहाँहरूले भोजन खान पनि पाउनुभएन।

²¹जब येशूका परिवारले यो सुने, तब उहाँलाई लैजानलाई उनीहरू निस्‍के, किनकि उहाँको मन ठेगानमा छैन भनी उनीहरू भन्‍थे।

²²यरूशलेमबाट आएका व्‍यवस्‍थाका शास्‍त्रीहरूले भने, “त्‍यसमा बालजिबुल भूत छ, र भूतहरूको मालिकद्वारा नै त्‍यसले भूतहरू निकाल्‍दछ।”

²³तर उहाँले तिनीहरूलाई आफूकहाँ बोलाएर दृष्‍टान्‍तहरूमा भन्‍नुभयो, “शैतानले शैतानलाई कसरी निकाल्‍न सक्‍छ?

²⁴कुनै राज्‍यको आपसमा फूट भयो भने त्‍यो राज्‍य टिक्‍न सक्‍दैन।

²⁵कुनै घरको पनि आपसमा फूट भयो भने त्‍यो घर टिक्‍न सक्‍नेछैन।

²⁶यदि शैतानले शैतानकै विरुद्धमा खड़ा भएर फाटो ल्‍याएको छ भने त्‍यो टिक्‍न सक्‍दैन, तर त्‍यसको अन्‍त्‍य आइसकेको हुन्‍छ।

²⁷कसैले बलियो मानिसको घरमा पसेर उसको धनमाल लुट्‌न सक्‍दैन जबसम्‍म त्‍यसले त्‍यो बलियो मानिसलाई पहिला बाँध्‍दैन। तब पो त्‍यसले उसको घर लुट्‌न सक्‍छ।

²⁸साँच्‍चै, म तिमीहरूलाई भन्‍दछु, मानिसहरूका सबै पाप र ईश्‍वर-निन्‍दा क्षमा गरिनेछन्,

²⁹तर पवित्र आत्‍माको विरुद्धमा निन्‍दा गर्नेलाई कदापि क्षमा हुनेछैन, तर त्‍यो अनन्‍त पापकर्मको दोषी ठहर्छ।’

³⁰उहाँले यो वचन भन्‍नुभयो, किनकि “उसमा अशुद्ध आत्‍मा छ” भनी तिनीहरूले भनेका थिए।

³¹तब उहाँकी आमा र उहाँका भाइहरू त्‍यहाँ आए, र बाहिरै खड़ा भएर उहाँलाई डाकिपठाए।

³²भीड उहाँको वरिपरि बसिरहेको थियो र तिनीहरूले उहाँलाई भने, “हेर्नुहोस्, तपाईंकी आमा र तपाईंका भाइहरू तपाईंलाई बाहिर खोज्‍दैछन्‌।”

³³उहाँले तिनीहरूलाई जवाफ दिएर भन्‍नुभयो, “मेरी आमा र मेरा भाइहरू को हुन्‌?”

³⁴अनि आफ्‍नो वरिपरि चारैतिर हेरेर उहाँले भन्‍नुभयो, “हेर, यी नै हुन्‌ मेरी आमा र मेरा भाइहरू।

³⁵किनकि जसले परमेश्‍वरको इच्‍छा पालन गर्छ त्‍यो नै मेरो भाइ र मेरी बहिनी र मेरी आमा हुन्‌।”