Read Nepali New Revised Version, 2012 लूका 16 Bible Online

लूका 16 - Nepali New Revised Version, 2012 bible

लूका 16

¹येशूले आफ्‍ना चेलाहरूलाई भन्‍नुभयो, “कुनै धनी मानिसको एक जना व्‍यवस्‍थापक थियो। त्‍यसले आफ्‍नो मालिकको धन-सम्‍पत्ति उड़ाइरहेको छ भन्‍ने अभियोग त्‍यसको विरुद्धमा लागेको थियो।

²तब मालिकले त्‍यसलाई बोलाएर भन्‍यो, ‘तेरो विषयमा म जे सुन्‍दैछु त्‍यो के हो? व्‍यवस्‍थापकको तेरो कामको हिसाब मलाई दे। अब उप्रान्‍त तँ व्‍यवस्‍थापक रहनेछैनस्‌।’

³ “तब व्‍यवस्‍थापकले आफ्‍नो मनमनै भन्‍यो, ‘अब म के गरूँ, किनकि मेरा मालिकले मबाट व्‍यवस्‍थापकको काम खोस्‍न लागेका छन्‌। खनजोत गर्ने मेरो ताकत छैन, भीख माग्‍न मलाई लाज लाग्‍छ।

⁴अब मैले के गर्नुपर्ने हो मैले सोचिसकेको छु। व्‍यवस्‍थापकको कामबाट निकालिएपछि मानिसहरूले मलाई तिनीहरूका घरमा कसरी स्‍वागत गर्नेछन्‌ सो निश्‍चय गरेको छु।’

⁵ “तब त्‍यसले मालिकका ऋणीहरू एक-एकलाई बोलायो, र पहिलालाई भन्‍यो, ‘तिमीलाई मालिकको ऋण कति छ?’

⁶ “उसले भन्‍यो, ‘तीन हजार लिटर तेल।’ “तब व्‍यवस्‍थापकले उसलाई भन्‍यो, ‘तिम्रो तमसुक लेऊ, र चाँड़ै बसेर पन्‍ध्र सय लिटर लेख।’

⁷ “त्‍यसपछि त्‍यसले अर्कालाई भन्‍यो, ‘तिम्रो ऋण कति छ?’ “उसले भन्‍यो, ‘तीन सय पचास क्‍विन्‍टल गहूँ।’ त्‍यसले उसलाई भन्‍यो, ‘तिम्रो तमसुक लेऊ, र तीन सय क्‍विन्‍टल लेख।’

⁸ “अब त्‍यसको मालिकले त्‍यस अधर्मी व्‍यवस्‍थापकको तारीफ गर्‍यो किनकि त्‍यसले चतुर्‍याइँसित काम गरेको थियो। किनकि यस संसारका मानिसहरू आफ्‍नै पुस्‍ताका अरू मानिसहरूसँग व्‍यवहार गर्दा ज्‍योतिका सन्‍तानभन्‍दा अझ बढ़ी चतुर हुन्‍छन्‌।

⁹म तिमीहरूलाई भन्‍दछु, आफ्‍नो निम्‍ति संसारको धनले मित्रहरू बनाओ, र जब त्‍यो धन शेष हुन्‍छ, तब तिनीहरूले तिमीहरूलाई अनन्‍त वासस्‍थानमा स्‍वागत गरून्‌।

¹⁰ “जो थोरै कुरामा ईमानदार हुन्‍छ, त्‍यो धेरैमा पनि ईमानदार हुन्‍छ, र जो अति सानो कुरामा बेईमान हुन्‍छ, त्‍यो धेरैमा पनि बेईमान हुन्‍छ।

¹¹यसकारण तिमीहरू सांसारिक धनमा ईमानदार भएनौ भने, तिमीहरूलाई साँचो धनको जिम्‍मा कसले देला?

¹²यदि तिमीहरू अर्काको धनमा ईमानदार भएनौ भने, तिमीहरूको आफ्‍नै धन तिमीहरूलाई कसले देला र?

¹³ “कुनै नोकरले दुई मालिकको सेवा गर्न सक्‍दैन, किनकि त्‍यसले एउटालाई घृणा गरेर अर्कालाई प्रेम गर्छ, अथवा त्‍यो एउटाको भक्त भएर अर्कालाई तुच्‍छ ठान्‍छ। तिमीहरू परमेश्‍वर र धन दुवैको सेवा गर्न सक्‍दैनौ।”

¹⁴धनका लोभी फरिसीहरूले यी सबै कुरा सुनेर उहाँको उपहास गरे।

¹⁵तब उहाँले तिनीहरूलाई भन्‍नुभयो, “मानिसहरूका सामुन्‍ने आफैलाई धर्मी ठहराउने तिमीहरू नै हौ, तर परमेश्‍वरले तिमीहरूका हृदय जान्‍नुहुन्‍छ, किनकि मानिसहरूका बीचमा जे उच्‍च गनिएको छ, परमेश्‍वरको दृष्‍टिमा त्‍यो तुच्‍छ ठहरिन्‍छ।

¹⁶ “बप्‍तिस्‍मा-दिने यूहन्‍नाको समयसम्‍म मोशाको व्‍यवस्‍था र अगमवक्ताहरू प्रचार गरिए। त्‍यस बेलादेखि परमेश्‍वरका राज्‍यको सुसमाचार प्रचार गरिएको छ, र सबै जना त्‍यस राज्‍यभित्र बलपूर्वक प्रवेश गर्दछन्‌।

¹⁷तर व्‍यवस्‍थाबाट एक मात्रा मेटिनभन्‍दा स्‍वर्ग र पृथ्‍वी टलिजान सजिलो छ।

¹⁸ “जसले आफ्‍नी पत्नीलाई त्‍यागेर अर्कीलाई विवाह गर्छ, त्‍यसले व्‍यभिचार गर्दछ, र श्रीमान्‌बाट त्‍यागिएकी स्‍त्रीलाई विवाह गर्ने मानिसले पनि व्‍यभिचार गर्दछ।

¹⁹ “एक जना धनी मानिस थियो, जो बहुमूल्‍य वस्‍त्र र मिहीन मलमल लगाएर दिनहुँ मोजमज्‍जामा बस्‍तथ्‍यो।

²⁰उसको ढोकामा लाजरस नाउँको एक जना गरीब मानिसलाई ल्‍याएर राखिदिन्‍थे। त्‍यो घावैघाउले भरिएको थियो।

²¹त्‍यस धनी मानिसको टेबिलबाट झरेका टुक्राटाक्री खाएर लाजरसले आफ्‍नो पेट भर्ने इच्‍छा गर्थ्‍यो। कुकुरहरूले पनि आएर त्‍यसका घाउहरू चाट्‌थे।

²² “त्‍यो गरीब मानिस मर्‍यो, र स्‍वर्गदूतहरूले त्‍यसलाई लगेर अब्राहामको साथमा राखे। त्‍यो धनी मानिस पनि मर्‍यो र गाडियो।

²³नरकमा कठोर कष्‍ट भोगिरहेको बेला उसले नजर उठाएर हेर्‍यो र टाढ़ामा अब्राहाम र उनको साथमा लाजरसलाई देख्‍यो।

²⁴अनि उसले कराएर भन्‍यो, ‘हे पिता अब्राहाम, ममाथि दया गरेर लाजरसलाई पठाइदिनुहोस्, र त्‍यसले आफ्‍नो औँलाको टुप्‍पा पानीमा चोपेर मेरो जिब्रोलाई शीतल पारिदेओस्, किनकि म यस ज्‍वालामा भयङ्कर वेदना पाइरहेछु।’

²⁵ “तर अब्राहामले भने, ‘छोरो, याद गर्, तैंले आफ्‍नो जीवनकालमा असल-असल कुराहरू भोग गरिस्, र त्‍यसै गरी लाजरसले दुःखैदुःख भोग्‍यो। त्‍यो अब यहाँ आराममा छ, र तँचाहिँ कष्‍टमा छस्‌।

²⁶यी सबै कुराबाहेक यहाँबाट तँकहाँ पारि जान खोज्‍नेहरू जान नसकून्‌ र त्‍यहाँबाट यहाँ हामीकहाँ वारि आउन पनि नसकून्‌ भनेर हामीहरू र तिमीहरूका बीचमा एउटा अति गहिरो धाँदो छ।’

²⁷ “उसले भन्‍यो, ‘पिता, यसैकारण म तपाईंलाई बिन्‍ती गर्दछु, तपाईंले त्‍यसलाई मेरा बाबुको घरमा पठाइदिनुहोस्,

²⁸किनभने मेरा पाँच भाइ छन्, र त्‍यसले तिनीहरूलाई चेताउनी देओस्, नत्रता तिनीहरू पनि यस कष्‍टको ठाउँमा आउलान्‌।’

²⁹ “तर अब्राहामले भने, ‘तिनीहरूका साथमा मोशा र अगमवक्ताहरूका पुस्‍तक छन्‌। तिनीहरूले ती सुनून्‌।’

³⁰ “तर उसले भन्‍यो, ‘होइन, पिता अब्राहाम, मरेकाबाट कोही एक जना तिनीहरूकहाँ गयो भनेता तिनीहरूले पश्‍चात्ताप गर्नेछन्‌।’

³¹ “उनले उसलाई भने, ‘मोशा र अगमवक्ताहरूका कुरा तिनीहरूले सुन्‍दैनन्‌ भने, मृतकहरूबाट कोही जीवित भए पनि तिनीहरूले विश्‍वास गर्नेछैनन्‌’।”