Read Nepali New Revised Version, 2012 लूका 17 Bible Online

लूका 17 - Nepali New Revised Version, 2012 bible

लूका 17

¹येशूले आफ्‍ना चेलाहरूलाई भन्‍नुभयो, “पाप गर्न लाउने परीक्षाहरू निश्‍चय आउँछन्‌। तर धिक्‍कार त्‍यस मानिसलाई, जसद्वारा ती आउँछन्‌!

²जुन मानिसले यी सानाहरूमध्‍ये एउटालाई पाप गर्न लाउँछ त्‍यसको गलामा जाँतोको एउटा पाटा झुण्‍ड्याएर त्‍यसलाई समुद्रमा फालिदिनु त्‍यसको निम्‍ति बेस हुनेछ।

³आफ्‍नो विषयमा होशियार बस। “तिम्रो भाइले अपराध गर्‍यो भने त्‍यसलाई हप्‍काऊ, र त्‍यसले पछुतो गर्‍यो भने तिमीले त्‍यसलाई क्षमा गर।

⁴यदि तिम्रो भाइले दिनमा सात पल्‍ट तिम्रो विरुद्धमा अपराध गर्‍यो, र सातै पल्‍ट तिमीकहाँ फर्किआएर ‘म पछुतो गर्छु’ भन्‍यो भने, तिमीले त्‍यसलाई क्षमा गर्नू।”

⁵प्रेरितहरूले प्रभुलाई भने, “हामीहरूको विश्‍वास बढ़ाइदिनुहोस्‌।”

⁶प्रभुले भन्‍नुभयो, “तिमीहरूमा रायोको दाना जति पनि विश्‍वास भएदेखि तिमीहरूले यस किम्‍बुको रूखलाई, ‘तँ उखेलिएर समुद्रमा रोपिन जा’ भन्‍यौ भने, त्‍यसले मान्‍नेछ।

⁷ “तिमीहरूमध्‍ये कसैको नोकर खेत जोतेर कि भेड़ा चराएर खेतबाट आयो भने, उसले त्‍यस नोकरलाई ‘तुरुन्‍त आएर खान बस्’ भन्‍छ र?

⁸के उसले त्‍यसलाई बरु यसो भन्‍नेछैन? ‘मेरो निम्‍ति खाना तयार गर्, र पटुका कस्‌ र मैले खाई-पिई नसकेसम्‍म मेरो सेवा-टहल गर्‌। त्‍यसपछि तैंले खानपान गर्‌।’

⁹आफूले अह्राएबमोजिमको काम गरेकोमा के उसले त्‍यस नोकरलाई धन्‍यवाद दिन्‍छ र?

¹⁰त्‍यसरी नै तिमीहरूलाई अह्राएका सबै काम पूरा गरेपछि तिमीहरूले पनि यसो भन: ‘हामी नालायक दास हौं, हामीले त हाम्रो कर्तव्‍य मात्र पालन गरेका छौं’।”

¹¹येशू यरूशलेमतिर जाँदैहुनुहुन्‍थ्‍यो। यस यात्रामा उहाँ सामरिया र गालीलको सिमाना भएर जानुभयो।

¹²उहाँ एउटा गाउँमा पस्‍नुहुँदा दश जना कुष्‍ठरोगीसँग उहाँको भेट भयो। टाढ़ै उभिएर तिनीहरूले

¹³चर्को सोरले भने, “हे येशू गुरुज्‍यू, हामीमाथि कृपा गर्नुहोस्‌।”

¹⁴उहाँले तिनीहरूलाई देखेर भन्‍नुभयो, “जाओ, गएर पूजाहारीकहाँ आफैलाई देखाओ।” तिनीहरू जाँदाजाँदै निको भइहाले।

¹⁵तिनीहरूमध्‍ये एक जनाले आफू निको भएको देख्‍यो, र उच्‍च सोरले परमेश्‍वरको महिमा गर्दै त्‍यो फर्क्‍यो,

¹⁶र येशूलाई धन्‍यवाद दिएर त्‍यो येशूका पाउमा घोप्‍टो पर्‍यो। त्‍यो एक सामरी थियो।

¹⁷येशूले भन्‍नुभयो, “के निको भएका दश जना होइनन्‌ र? अरू नौ जना कहाँ छन्‌?

¹⁸के यो विदेशीबाहेक फर्किआएर परमेश्‍वरको प्रशंसा गर्ने अरू कोही भएन?”

¹⁹अनि उहाँले त्‍यसलाई भन्‍नुभयो, “उठ, र आफ्‍नो बाटो लाग। तिम्रो विश्‍वासले तिमीलाई निको पारेको छ।”

²⁰परमेश्‍वरको राज्‍य कहिले आउँछ भन्‍ने फरिसीहरूको प्रश्‍नको जवाफमा उहाँले तिनीहरूलाई भन्‍नुभयो, “परमेश्‍वरको राज्‍य देखिने गरी आउँदैन,

²¹न त मानिसहरूले भन्‍नेछन्, ‘हेर, यहाँ छ!’ अथवा ‘त्‍यहाँ छ!’ किनभने हेर, परमेश्‍वरको राज्‍य तिमीहरूकै बीचमा छ।”

²²उहाँले चेलाहरूलाई भन्‍नुभयो, “ती दिन आउनेछन्, जब तिमीहरू मानिसको पुत्रको कुनै एक दिन हेर्ने इच्‍छा गर्नेछौ, तर तिमीहरूले देख्‍नेछैनौ।

²³मानिसहरूले तिमीहरूलाई भन्‍नेछन्, ‘हेर, ऊ त्‍यहाँ छ!’ अथवा ‘हेर, ऊ यहाँ छ।’ तर नजाओ, र तिनीहरूका पछि नलाग।

²⁴किनकि जसरी बिजुली चम्‍कँदा आकाशको एक छेउदेखि अर्को छेउसम्‍म उज्‍यालो पार्छ, मानिसको पुत्र पनि आफ्‍नो दिनमा त्‍यस्‍तै हुनेछ।

²⁵तर पहिले उसले धेरै कष्‍ट सहनुपर्छ र यस पुस्‍ताबाट बहिष्‍कृत हुनुपर्छ।

²⁶ “नोआको दिनमा जस्‍तो भएको थियो, मानिसको पुत्रको दिनमा पनि त्‍यस्‍तै हुनेछ।

²⁷नोआ जहाजभित्र प्रवेश नहोउञ्‍जेल मानिसहरू खाँदैथिए, पिउँदैथिए, विवाहबारी गर्दैथिए। र जलप्रलय आयो, र सबैलाई नष्‍ट पार्‍यो।

²⁸ “लोतका दिनमा पनि त्‍यस्‍तै भएको थियो, मानिसहरू खाँदैथिए, पिउँदैथिए, किनबेच गर्दैथिए, रोप्‍दैथिए, बनाउँदैथिए,

²⁹तर जुन दिन लोत सदोमबाट निस्‍के, आकाशबाट आगो र गन्‍धक बर्सेर तिनीहरू सबैलाई नष्‍ट पार्‍यो।

³⁰ “मानिसको पुत्र प्रकट हुने दिनमा यस्‍तै हुनेछ।

³¹त्‍यस दिन जो घरको कौसीमाथि छ, त्‍यसको मालसामान घरभित्र छ भने ती लिनलाई त्‍यो तल नझरोस्‌। त्‍यसरी नै खेतमा हुने पनि फर्केर नआओस्‌।

³²लोतकी पत्नीलाई याद गर!

³³जसले आफ्‍नो प्राण बचाउन खोज्‍दछ, त्‍यसले सो गुमाउनेछ, र जसले आफ्‍नो प्राण गुमाउँछ, त्‍यसले त्‍यो सुरक्षित राख्‍नेछ।

³⁴म तिमीहरूलाई भन्‍दछु, त्‍यस रात दुई जना एउटै ओछ्यानमा हुनेछन्‌। एक जना लगिनेछ र अर्को छोडिनेछ।

³⁵दुई जना स्‍त्री एकैसाथ जाँतो पिँधिरहेका हुनेछन्‌। एउटी लगिनेछे, अर्की छोडिनेछे।

³⁶[दुई जना मानिस खेतमा हुनेछन्, एक जना लगिनेछ, अर्कोचाहिँ छोडिनेछ।”]

³⁷अनि तिनीहरूले उहाँलाई सोधे, “कहाँ प्रभु?” उहाँले तिनीहरूलाई भन्‍नुभयो, “जहाँ सिनु छ, गिद्धहरू त्‍यहाँ भेला हुन्‍छन्‌।”